(កំពត)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្តែងការគាំទ្រយ៉ាងពេញទំហឹង ចំពោះការចូលរួមផ្តល់គំនិតដ៏ល្អ របស់ប្រជាពលរដ្ឋ ក្នុងការបន្ថែមរចនាបថខ្មែរលើរូបសំណាក «បាតដៃសុភមង្គល» ដែលជាសមិទ្ធផលទេសចរណ៍ថ្មីមួយទៀត នៅខេត្តកំពត។

ការគាំទ្រនេះត្រូវបានសម្តេចធិបតីបង្ហោះលើបណ្តាញទំនាក់ទំនងសង្គមផ្ទាល់ខ្លួន នៅថ្ងៃទី១៤ ខែតុលា ឆ្នាំ២០២៦នេះ។

សម្តេចធិបតីបានសរសេរថា៖ «ខ្ញុំសូមគាំទ្រចំពោះការចូលរួមផ្តល់គំនិតដ៏ល្អនេះ។ ខ្ញុំសង្ឃឹមថា ឯកឧត្តម ម៉ៅ ធនិន្ទ អភិបាលនៃគណៈអភិបាលខេត្តកំពត ដែលបានផ្តួចផ្តើមនិងកសាងរូបសំណាក "បាតដៃសុភមង្គល" ជាសមិទ្ធផលទេសចរណ៍ថ្មីមួយទៀតនៅខេត្តកំពត នឹងពិភាក្សាគ្នាជាមួយក្រសួងវប្បធម៌ និងវិចិត្រសិល្បៈ ដើម្បីបន្ថែមរចនាបថខ្មែរ ស្របតាមការលើកយោបល់របស់បងប្អូនប្រជាពលរដ្ឋ»។

រូបសំណាក «បាតដៃសុភមង្គល» ត្រូវបានផ្តួចផ្តើម និងកសាងឡើងដោយលោក ម៉ៅ ធនិន្ទ អភិបាលខេត្តកំពត ក្នុងគោលបំណងទាក់ទាញភ្ញៀវទេសចរ និងបន្ថែមភាពទាក់ទាញដល់ខេត្តមួយនេះ។ ការបន្ថែមរចនាបថខ្មែរទៅលើរូបសំណាកនេះ នឹងមិនត្រឹមតែបង្កើនសោភ័ណភាពប៉ុណ្ណោះទេ ថែមទាំងជួយផ្សព្វផ្សាយនូវតម្លៃវប្បធម៌ និងកេរដំណែលដ៏សម្បូរបែបរបស់កម្ពុជាទៅកាន់ពិភពលោកផងដែរ។ នេះជាការរួមចំណែកដ៏សំខាន់ក្នុងការអភិវឌ្ឍវិស័យទេសចរណ៍ប្រកបដោយចីរភាព និងអត្តសញ្ញាណជាតិ៕