(អាស៊ែបៃហ្សង់)៖ លោក ហួត ហាក់ រដ្ឋមន្ត្រីក្រសួងទេសចរណ៍ និងលោក Fuad Naghiyev ប្រធានទីភ្នាក់ងារទេសចរណ៍រដ្ឋ នៃសាធារណរដ្ឋអាស៊ែបៃហ្សង់ បានឯកភាពគ្នាជំរុញការអនុវត្តអនុស្សរណៈ នៃការយោគយល់គ្នា (MoU) ស្តីពីកិច្ចសហប្រតិបត្តិការទេសចរណ៍ទ្វេភាគី ដែលបានចុះហត្ថលេខាកាលពីខែកក្កដា ឆ្នាំ២០២៥ ឱ្យកាន់តែសកម្ម និងមានលទ្ធផលជាក់ស្តែង ដើម្បីពង្រឹងទំនាក់ទំនង និងជំរុញការអភិវឌ្ឍវិស័យទេសចរណ៍នៃប្រទេសទាំងពីរ។

ការឯកភាពនេះធ្វើឡើងក្នុងជំនួបពិភាក្សាការងារ និងផ្លាស់ប្តូរទស្សនៈរវាងលោក ហួត ហាក់ និងលោក Fuad Naghiyev នៅរដ្ឋធានីបាគូ ប្រទេសអាស៊ែបៃហ្សង់ នាថ្ងៃទី១៣ ខែតុលា ឆ្នាំ២០២៦ ដោយមានការចូលរួមពីលោក Florian Sengstschmid នាយកប្រតិបត្តិនៃក្រុមប្រឹក្សាភិបាលផ្សព្វផ្សាយទេសចរណ៍អាស៊ែបៃហ្សង់ (Azerbaijan Tourism Board) និងសហការីជាន់ខ្ពស់។

ជំនួបនេះបានធ្វើឡើងក្នុងឱកាសលោករដ្ឋមន្ត្រី អមដំណើរសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បំពេញទស្សនកិច្ចផ្លូវការ និងទស្សនកិច្ចការងារនៅសាធារណរដ្ឋអាស៊ែបៃហ្សង់ សាធារណរដ្ឋតួកគីយ៉េ និងសាធារណរដ្ឋកាហ្សាក់ស្ថាន ព្រមទាំងចូលរួមកិច្ចប្រជុំកំពូលលើកទី៧ នៃសន្និសីទស្តីពីអន្តរសកម្ម និងវិធានការកសាងទំនុកចិត្តនៅអាស៊ី។

ក្នុងជំនួបនោះ ភាគីទាំងពីរបានឯកភាពបង្កើនទំនាក់ទំនង និងការផ្លាស់ប្តូរដំណើរទស្សនកិច្ចស្វែងយល់ពីសក្តានុពលទេសចរណ៍ (FAM Trip) រវាងស្ថាប័នទេសចរណ៍ជាតិទាំងពីរ ព្រមទាំងជំរុញការផ្សព្វផ្សាយពីសក្តានុពលទេសចរណ៍ និងកាលានុវត្តភាពវិនិយោគរបស់ប្រទេសទាំងពីរ ដើម្បីទាក់ទាញភ្ញៀវទេសចរ និងវិនិយោគិនឱ្យមានការចាប់អារម្មណ៍កាន់តែខ្លាំងឡើង។

ទន្ទឹមនឹងនេះ ភាគីទាំងពីរក៏បានឯកភាពភ្ជាប់កិច្ចសហការរវាងក្រុមប្រឹក្សាភិបាលផ្សព្វផ្សាយទេសចរណ៍អាស៊ែបៃហ្សង់ (Azerbaijan Tourism Board) និងក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា (Cambodia Tourism Board-CTB) ដើម្បីរួមគ្នាជំរុញការផ្សព្វផ្សាយទេសចរណ៍ដែលមានលក្ខណៈបំពេញបន្ថែមគ្នា និងរៀបចំជំនួបការងារជាមួយវិស័យឯកជនទេសចរណ៍កម្ពុជា សំដៅបង្កើតឱកាសសហប្រតិបត្តិការថ្មីៗ និងពង្រីកទីផ្សារទេសចរណ៍រវាងប្រទេសទាំងពីរ៕