(បន្ទាយមានជ័យ)៖ រដ្ឋបាលខេត្តបន្ទាយមានជ័យ បានរៀបចំពិធីគោរពវិញ្ញាណក្ខន្ធ ព្រះករុណា ព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» គម្រប់ខួប ១៤ឆ្នាំ ប្រកបដោយភាពមហោឡារិក និងសេចក្តីគោរពដ៏ខ្ពង់ខ្ពស់។ ពិធីនេះ ត្រូវបានប្រារព្ធឡើងនៅសាលប្រជុំធំ សាលាខេត្តបន្ទាយមានជ័យ នាព្រឹកថ្ងៃទី១៤ ខែតុលា ឆ្នាំ២០២៦។

ពិធីនេះបានប្រព្រឹត្តទៅក្រោមអធិបតីភាពលោក ប្លែក វ៉ារី ប្រធានក្រុមប្រឹក្សាខេត្ត និងលោក អ៊ុំ រាត្រី អភិបាលខេត្តបន្ទាយមានជ័យ ព្រមទាំងមានការអញ្ជើញចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ អភិបាលក្រុង-ស្រុកទាំង៩ សិស្ស-និស្សិត យុវជនកាកបាទក្រហមកម្ពុជាខេត្ត យុវជនកាយរឹទ្ធខេត្ត និងតាជី-យាយជី ជាច្រើនរូប។ វត្តមានរបស់អង្គពិធីទាំងមូល បានឆ្លុះបញ្ចាំងពីការដឹងគុណ និងការចងចាំជានិច្ចនូវព្រះរាជបូជនីយកិច្ចដ៏ឧត្តុង្គឧត្តមរបស់ព្រះអង្គ។

ក្នុងឱកាសដ៏ឧត្តុង្គឧត្តមនេះ លោក អ៊ុំ រាត្រី អភិបាលខេត្តបន្ទាយមានជ័យ បានឡើងថ្លែងនូវជីវប្រវត្តិសង្ខេប និងរំឭកអំពីស្នាព្រះហស្តដ៏ធំធេងរបស់ព្រះករុណា ព្រះបរមរតនកោដ្ឋ ដែលបានលះបង់ព្រះកាយពល និងព្រះបញ្ញាញាណ ដើម្បីបុព្វហេតុឯករាជ្យជាតិ បូរណភាពទឹកដី និងសុខសន្តិភាពរបស់ប្រជាជនកម្ពុជា។ ព្រះអង្គបានបន្សល់ទុកនូវកេរដំណែលដ៏ថ្លៃថ្លាជាច្រើនសម្រាប់ប្រទេសជាតិ និងប្រជាជនជំនាន់ក្រោយ។

ជាមួយគ្នានោះ ថ្នាក់ដឹកនាំ និងមន្ត្រីរាជការទាំងអស់ ក៏បាននិមន្តព្រះសង្ឃសូត្រមន្ត បង្សុកូល និងបួងសួងដល់គុណព្រះរតនត្រ័យ ថ្វាយព្រះរាជកុសលដល់ព្រះវិញ្ញាណក្ខន្ធ ព្រះករុណាព្រះមហាវីរក្សត្រ ព្រះបរមរតនកោដ្ឋ សូមបានយាងទៅសោយព្រះបរមសុខក្នុងសុគតិភព។ ព្រមទាំងបានបួងសួងសូមឱ្យព្រះវិញ្ញាណក្ខន្ធដ៏សក្តិសិទ្ធិរបស់ព្រះអង្គ តាមជួយប្រោសប្រទានពរជ័យដល់ទឹកដីនៃព្រះរាជាណាចក្រកម្ពុជា និងប្រជារាស្ត្រខ្មែរទូទាំងប្រទេស ប្រកបដោយវឌ្ឍនភាព វិបុលភាព និងសុខក្សេមក្សាន្ត រុងរឿងជាអង្វែងតរៀងទៅ។ ក្នុងនោះ ក៏មានការចែកអំណោយជូនតាជី យាយជី ចំនួន ២០នាក់ ដែលបានចូលរួមក្នុងពិធីផងដែរ៕