(ភ្នំពេញ)៖ លោក សួន សេរីរដ្ឋា ប្រធានក្រុមប្រឹក្សាភិបាល នៃវេទិកាសន្តិភាពកម្ពុជា នៅថ្ងៃទី១៤ ខែតុលា ឆ្នាំ២០២៦នេះ បានលើកឡើង និងវាយបកយ៉ាងមុតស្រួចជុំវិញការទាមទារសំណាក់លោក អ៊ុំ សំអាន និងក្រុមប្រឆាំង ឱ្យរាជរដ្ឋាភិ​បាលលើកលែងទោសដល់ក្រុមរបស់ខ្លួន ដោយបានចោទសួរ និងបង្ហាញចំណុចសំខាន់ៗចំនួន៣។

ការចោទសួរនោះ​មានដូចខាងក្រោម៖

១. លោក សួន សេរីរដ្ឋា បានចោទសួរចំៗថា តើរដ្ឋាភិបាល(២៣តុលា) របស់ពួកលោកឯងហ្នឹង មានប្រទេសណាគេទទួលស្គាល់ឲ្យតែងតាំងដាក់អគ្គរដ្ឋទូតតំណាង? និងមានអង្គការអន្តរជាតិណាគេទទួលស្គាល់ឲ្យតែងតាំងដាក់អ្នកតំណាងអចិន្ត្រៃយ៍ដែរឬទេ?

២. ពាក់ព័ន្ធនឹងបញ្ហាព្រំដែន លោក សួន សេរីរដ្ឋា បានលើកឡើងថា តើលោក អ៊ុំ សំអាន និងក្រុមប្រឆាំងទាំងនោះចេះអានអក្សរខ្មែរ និងភាសាខ្មែរដែល សម្តេចធិបតី នាយករដ្ឋមន្ត្រីកម្ពុជា បានសរសេរអញ្ជើញឱ្យប្រមូលឯកសារដែលខ្លួនអះអាងថា កម្ពុជាកាត់ដីឱ្យសៀម យកមកដាក់បង្ហាញរកការពិតដែរឬទេ?

៣. ចំពោះការទាមទារឱ្យលើកលែងទោស លោក សួន សេរីរដ្ឋា បានបញ្ជាក់ថា គ្មានការអីត្រូវលើកលែងទោសក្បត់ជាតិឱ្យបក្ខពួកដែលក្រុមនោះហៅថា «ប្រតិភូ» នោះឡើយ។ លោកបានរំលឹកថា សម្តេចធិបតី បានសរសេរយ៉ាងច្បាស់រួចហើយថា ចន្លោះពេលចូលមកស្នាក់នៅក្នុងប្រទេសរហូតដល់ចេញទៅវិញ គឺមិនឱ្យមានរឿងអ្វីកើតឡើងឡើយ ពោលគឺ បើអត់លុយ រដ្ឋចេញលុយឱ្យ, បើអត់ឡានជិះ រដ្ឋផ្ដល់មធ្យោបាយធ្វើដំណើរ, បើអត់កន្លែងដេក រដ្ឋផ្ដល់ទីកន្លែងឱ្យ និងបើអត់បាយស៊ី រដ្ឋផ្ដល់ឱ្យរហូតចប់កិច្ចការ និងបានចេញទៅវិញដោយសុវត្ថិភាព។

លោក សួន សេរីរដ្ឋា បានសន្និដ្ឋានថា វាគ្មានអ្វីដែលក្រុមលោក អ៊ុំ សំអាន និងបក្ខពួកត្រូវទាមទារ និងបញ្ជារដ្ឋាភិបាលឱ្យសរសេរសំបុត្រទៅបារាំង រួមទាំងការទាមទារឱ្យលើកលែងទោសដល់គ្នីគ្នាក្បត់ជាតិ ដែលរួមមានទាំងមេក្បត់ជាតិនោះឡើយ៕