(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន នៅរសៀលថ្ងៃទី១៤ ខែតុលា ឆ្នាំ២០២៦នេះ បានអញ្ជើញជាអធិបតីភាពដឹកនាំកិច្ចប្រជុំស្តីពីការត្រៀមលក្ខណៈរៀបចំសន្និបាតបូកសរុបលទ្ធផលការងារព័ត៌មាន និងសោតទស្សន៍ ឆ្នាំ២០២៦ និងលើកទិសដៅការងារឆ្នាំ២០២៧ និងការត្រៀមលក្ខណៈរៀបចំសន្និសីទពហុភាគីពាក់ព័ន្ធរបស់អាស៊ាន ស្តីពីការងារប្រឆាំងព័ត៌មានក្លែងក្លាយ និងការគ្រប់គ្រងព័ត៌មានសំយោគក្នុងសម័យឌីជីថល។

កិច្ចប្រជុំនេះមានការអញ្ជើញចូលរួមពីលោកស្រីរដ្ឋលេខាធិការប្រចាំការ រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយិការ ព្រមទាំងថ្នាក់ដឹកនាំក្រសួងជាច្រើនរូបទៀត។ ការរៀបចំសន្និបាតបូកសរុបលទ្ធផលការងារប្រចាំឆ្នាំ គឺជាកិច្ចការចាំបាច់ដើម្បីវាយតម្លៃសមិទ្ធផលដែលសម្រេចបាន កំណត់នូវបញ្ហាប្រឈម និងដាក់ចេញទិសដៅយុទ្ធសាស្ត្រសម្រាប់ឆ្នាំបន្ទាប់ ដើម្បីជំរុញវិស័យព័ត៌មាន និងសោតទស្សន៍នៅកម្ពុជាឱ្យកាន់តែរីកចម្រើន។

តាមរយៈការរៀបចំសន្និបាតបូកសរុបលទ្ធផលការងាររបស់ក្រសួងព័ត៌មាន ក៏ដើម្បីពិនិត្យនិងវាយតម្លៃលើសមិទ្ធផលនានា ដែលសម្រេចបាននាពេលកន្លងមក និងចូលរួមពិភាក្សាផ្លាស់ប្តូរយោបល់ និងចែករំលែកបទពិសោធល្អៗ ក្នុងរិះរកដំណោះស្រាយសមស្រប ចំពោះបញ្ហាប្រឈមនានា ហើយដាក់ចេញនូវទិសដៅការងារសម្រាប់ការអនុវត្តបន្តសំដៅលើកកម្ពស់វិស័យព័ត៌មាន និងសោតទស្សន៍នៅកម្ពុជា ឱ្យកាន់តែប្រសើរឡើងថែមទៀតក្នុងឧត្តមប្រយោជន៍ជាតិ និងប្រជាជនកម្ពុជា។ សន្និបាតបូកសរុបលទ្ធផលការងាររបស់ក្រសួងព័ត៌មាន ធ្វើឡើងក៏ជាការចូលរួមក្នុងគោលនយោបាយកំណែទម្រង់សុីជម្រៅនៃយុទ្ធសាស្រ្តបញ្ចកោណ ដំណាក់កាលទី១ អាណត្តិទី៧ របស់រាជរដ្ឋាភិបាលកម្ពុជា។

ដើម្បីធ្វើឱ្យដំណើរការនៃអង្គសន្និបាតប្រព្រឹត្តទៅដោយរលូន លោករដ្ឋមន្ត្រ្តី នេត្រ​​ ភក្ត្រា​ បានបង្កើតគណៈកម្មការ និងអនុគណៈកម្មការ រៀបចំសន្និបាតបូកសរុបលទ្ធផលការងារព័ត៌មាន និងសោតទស្សន៍ឆ្នាំ២០២៦ និងលើកទិសដៅការងារឆ្នាំ២០២៧ ហើយគណៈកម្មការនេះមានតួនាទីដឹកនាំ ចាត់ចែង និងត្រួតពិនិត្យដំណើរការរៀបចំសន្និបាតឱ្យមានប្រសិទ្ធភាព និងទទួលបានជោគជ័យ សម្របសម្រួល និងផ្តល់ការណែនាំដល់គ្រប់អនុគណៈកម្មការ លើរាល់ការអនុវត្តកិច្ចការ រដ្ឋបាល ហិរញ្ញវត្ថុ និងការងារបច្ចេកទេសតាមតួនាទី ភារកិច្ច និងពេលវេលាដែលបានកំណត់ និងអនុវត្តនូវរាល់បណ្តាភារកិច្ចនានា តាមការណែនាំរបស់ប្រធានគណៈកម្មការ។

គួរបញ្ជាក់ដែរថា នៅក្នុងអាណត្តិទី៧ របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចបវរធិបតី នាយកដ្ឋមន្ត្រី ហ៊ុន ម៉ាណែត, ក្រសួងព័ត៌មាន ដែលមាន លោក នេត្រ ភក្ត្រា ជារដ្ឋមន្ត្រី បានដឹកនាំរៀបចំសន្និបាតបូកសរុបលទ្ធផលការងាររបស់ខ្លួន បានចំនួន ៣លើករួចមកហើយ ដោយបានបង្ហាញពីសមិទ្ធផលថ្មីៗគួរជាទីមោទនៈ៕