(អាស៊ែបៃហ្សង់)៖ លោក ហួត ហាក់ រដ្ឋមន្ត្រីក្រសួងទេសចរណ៍ នៅថ្ងៃទី១៣ ខែតុលា ឆ្នាំ២០២៦ បានជួបពិភាក្សាការងារជាមួយលោក Bilal Gasimli នាយកក្រុមហ៊ុន MARSOL Group និងសហការីជាន់ខ្ពស់ ដើម្បីជំរុញកិច្ចសហប្រតិបត្តិការក្នុងការទាក់ទាញព្រឹត្តិការណ៍ពាណិជ្ជកម្ម និងពិព័រណ៍អន្តរជាតិធំៗមករៀបចំនៅកម្ពុជា។

ជំនួបនេះធ្វើឡើងក្នុងឱកាសលោក ហួត ហាក់ អមដំណើរសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បំពេញទស្សនកិច្ចផ្លូវការ និងការងារនៅប្រទេសអាស៊ែបៃហ្សង់ តួកគីយ៉េ និងកាហ្សាក់ស្ថាន ព្រមទាំងចូលរួមកិច្ចប្រជុំកំពូលលើកទី៧ នៃសន្និសីទស្តីពីអន្តរសកម្ម និងវិធានការកសាងទំនុកចិត្តនៅអាស៊ី។

ក្នុងជំនួបនេះ តំណាងក្រុមហ៊ុន MARSOL Group បានបញ្ជាក់ពីគម្រោងរៀបចំដំណើរទស្សនកិច្ចស្វែងយល់ពីសក្តានុពលទេសចរណ៍ និងឱកាសធុរកិច្ចនៅកម្ពុជា (FAM Trip) នាពេលខាងមុខ សម្រាប់សមាជិកក្លឹបធុរកិច្ចរបស់ខ្លួន និងក្រុមហ៊ុនដែលប្រកបអាជីវកម្មក្នុងវិស័យទេសចរណ៍។ ជាមួយគ្នានេះ ក្រុមហ៊ុនក៏បានស្នើសុំកិច្ចសម្របសម្រួលពីក្រសួងទេសចរណ៍ ដើម្បីទទួលស្វាគមន៍ និងជួយសម្រួលដល់ដំណើរទស្សនកិច្ចរបស់គណៈប្រតិភូផងដែរ។

ជាការឆ្លើយតប លោក ហួត ហាក់ បានស្វាគមន៍ និងថ្លែងអំណរគុណចំពោះគម្រោងរៀបចំដំណើរទស្សនកិច្ចនេះ ដោយបញ្ជាក់ថា ក្រសួងទេសចរណ៍នឹងសហការជាមួយភាគីពាក់ព័ន្ធទាំងផ្នែករដ្ឋ និងឯកជន ដើម្បីសម្របសម្រួលដល់គណៈប្រតិភូក្នុងការស្វែងយល់ពីគោលដៅទេសចរណ៍សក្តានុពល និងហេដ្ឋារចនាសម្ព័ន្ធសម្រាប់រៀបចំព្រឹត្តិការណ៍ពាណិជ្ជកម្ម និងពិព័រណ៍ខ្នាតធំនៅកម្ពុជា។

កិច្ចសហការនេះត្រូវបានរំពឹងថា នឹងរួមចំណែកផ្សព្វផ្សាយសក្តានុពលទេសចរណ៍កម្ពុជាទៅកាន់ទីផ្សារអន្តរជាតិ ព្រមទាំងបង្កើនឱកាសទាក់ទាញព្រឹត្តិការណ៍ពាណិជ្ជកម្ម និងពិព័រណ៍អន្តរជាតិធំៗមករៀបចំនៅកម្ពុជា នាពេលអនាគត។

សូមជម្រាបថា ក្រុមហ៊ុន MARSOL Group ជាក្រុមហ៊ុនរៀបចំជំនួបធុរកិច្ច (B2B) ដ៏ធំមួយនៅប្រទេសអាស៊ែបៃហ្សង់ ដែលមានជំនាញរៀបចំកម្មវិធីបណ្តាញទំនាក់ទំនងធុរកិច្ច សន្និសីទ ពិព័រណ៍ និងដំណើរទស្សនកិច្ចធុរកិច្ចក្នុងតំបន់ និងអន្តរជាតិ តាំងពីឆ្នាំ២០១៧មក និងមានសមាជិកក្លឹបជិត៦០០៕