(ពោធិ៍សាត់)៖ ទោះបីជាពេលវេលាបានកន្លងផុតទៅអស់រយៈពេល ១៤ឆ្នាំ (១៥ តុលា ២០១២ - ១៥ តុលា ២០២៦) ហើយយ៉ាងណាក្តី ប៉ុន្តែស្នាមញញឹម ព្រះសូរៀង និងព្រះរាជសកម្មភាពដ៏ថ្លៃថ្លារបស់ ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» នៅតែស្ថិតស្ថេរក្នុងបេះដូងកូនចៅ ចៅទួតខ្មែរគ្រប់រូបជានិច្ច គ្មានថ្ងៃបំភ្លេចបានឡើយ។

ដើម្បីសម្តែងនូវកតញ្ញូកតវេទិតាធម៌ និងក្តីនឹករលឹកឥតឧបមា នាព្រឹកថ្ងៃទី១៥ ខែតុលា ឆ្នាំ២០២៦ ត្រូវនឹងថ្ងៃព្រហស្បតិ៍ ៤កើត ខែអស្សុជ ឆ្នាំមមី អដ្ឋស័ក ព.ស.២៥៧០ រដ្ឋបាលខេត្តពោធិ៍សាត់ បានរៀបចំពិធីគោរពព្រះវិញ្ញាណក្ខន្ធ និងបង្សុកូលឧទ្ទិសថ្វាយព្រះរាជកុសលជូនព្រះអង្គយ៉ាងមហោឡារិក និងក្រៀមក្រំបំផុត នៅបុរីវប្បធម៌កោះសំពៅមាស ស្ថិតក្នុងភូមិសំពៅមាស សង្កាត់ផ្ទះព្រៃ ក្រុងពោធិ៍សាត់។

ពិធីដ៏មានអត្ថន័យជ្រាលជ្រៅនេះ ត្រូវបានប្រារព្ធឡើងក្រោមអធិបតីភាព លោក ម៉ក់ រ៉ា ប្រធានក្រុមប្រឹក្សាខេត្តពោធិ៍សាត់ និងលោក ខូយ រីដា អភិបាលនៃគណៈអភិបាលខេត្ត ដោយមានការចូលរួមយ៉ាងកុះករពីសមាជិក-សមាជិកាក្រុមប្រឹក្សាខេត្ត គណៈអភិបាលខេត្ត ក្រុង ស្រុក ថ្នាក់ដឹកនាំ មន្ត្រីរាជការ មន្ទីរអង្គភាព និងកងកម្លាំងប្រដាប់អាវុធទាំង៣ប្រភេទយ៉ាងច្រើនកុះករ។

ការរៀបចំតុបតែង និងពិធីតាមគន្លងព្រះពុទ្ធសាសនា
ដើម្បីតបស្នងព្រះមហាករុណាធិគុណដ៏ថ្លៃថ្លា រដ្ឋបាលខេត្តពោធិ៍សាត់បានចាត់តាំងរៀបចំឱ្យមានការតុបតែងលម្អ ដាក់តាំងព្រះបរមឆាយាលក្ខណ៍ បំភ្លឺភ្លើងពណ៌ លើកទង់ជាតិ ទង់សាសនា និងទង់ព្រះមហាក្សត្រ នៅតាមគ្រប់មន្ទីរ អង្គភាព រដ្ឋបាលក្រុង-ស្រុក និងគ្រឹះស្ថាននានារហូតដល់មូលដ្ឋាន។

នៅក្នុងពិធីផ្លូវការ ថ្នាក់ដឹកនាំគ្រប់ស្ថាប័នបានអញ្ជើញដាក់កម្រងផ្កា (ចំនួន១១ផែន) និងអុជប្រទានព្រះអគ្គីជ័យ ទាន ធូប ដើម្បីគោរពព្រះវិញ្ញាណក្ខន្ធ ព្រមទាំងបាននិមន្តព្រះសង្ឃចំនួន ៧អង្គ បង្សុកូលឧទ្ទិសថ្វាយព្រះរាជកុសល ទៅតាមប្រពៃណីសាសនា ជាមួយស្មារតីចងចាំជានិច្ចនូវព្រះមហាករុណាធិគុណរបស់ព្រះអង្គ។

សមណទុក្ខយ៉ាងជ្រាលជ្រៅ និងការបាត់បង់ដ៏ធំធេង
ផ្អែកតាមសារលិខិតរបស់រដ្ឋបាលខេត្តពោធិ៍សាត់ បានបញ្ជាក់ថា ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ព្រះសង្ឃ និងប្រជានុរាស្ត្រគ្រប់ជាតិសាសន៍ទូទាំងខេត្តពោធិ៍សាត់ សូមសម្តែងនូវសមណទុក្ខយ៉ាងក្រៀមក្រំប្រកបដោយក្តីអាឡោះអាឡៃ រកទីបំផុតគ្មាន។

ព្រះករុណា «ព្រះបរមរតនកោដ្ឋ» ព្រះអង្គប្រសូត្រនៅថ្ងៃទី៣១ ខែតុលា ឆ្នាំ១៩២២ និងបានយាងចូលព្រះទិវង្គតកាលពីថ្ងៃទី១៥ ខែតុលា ឆ្នាំ២០១២ នៅមន្ទីរពេទ្យក្រុងបេកាំង សាធារណរដ្ឋប្រជាមានិតចិន ក្នុងព្រះជន្មាយុ ៩០ព្រះវស្សា។ ព្រះអង្គគឺជាព្រះមហាក្សត្រដែលប្រកបដោយទសពិធរាជធម៌ ជាចាស់ទុំនយោបាយ និងជាកំពូលស្ថាបនិកសន្តិភាព បង្រួបបង្រួមជាតិ ដែលបានបូជាព្រះកាយពល និងបញ្ញាញាណពេញមួយព្រះជន្មដើម្បីបុព្វហេតុជាតិ មាតុភូមិ និងប្រជាជនខ្មែរ។

ក្នុងឱកាសខួប១៤ឆ្នាំនៃការឃ្លាតឆ្ងាយនេះ ប្រជានុរាស្ត្រទូទាំងខេត្តពោធិ៍សាត់ សូមលើកហត្ថប្រណម្យបួងសួងដល់គុណបុណ្យព្រះរតនត្រ័យ និងបារមីព្រះមហាក្សត្រគ្រប់ព្រះអង្គ សូមជួយយិតយោងព្រះវិញ្ញាណក្ខន្ធ «សម្តេចតា សម្តេចតាទួត» ឱ្យបានយាងទៅកាន់សុគតិភព ពោលគឺឋានសួគ៌ និងព្រះនិព្វាន កុំបីឃ្លៀងឃ្លាតឡើយ។

ជាមួយគ្នានេះដែរ ទូលព្រះបង្គំយើងខ្ញុំទាំងអស់គ្នា សូមថ្វាយព្រះរាជកុសលជូន ព្រះករុណាព្រះបាទសម្តេចព្រះ នរោត្តម សីហមុនី ព្រះមហាក្សត្រនៃកម្ពុជា និងសម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ សូមព្រះអង្គទាំងទ្វេទ្រង់មានព្រះសុខភាពល្អបរិបូរណ៍ ព្រះជន្មាយុយឺនយូរ ទ្រង់គង់ប្រថាប់ជាម្លប់ដ៏ត្រជាក់ដល់ប្រជានុរាស្ត្រខ្មែរតរៀងទៅ៕