(ព្រះវិហារ)៖ រដ្ឋបាលខេត្តព្រះវិហារ នៅព្រឹកថ្ងៃទី១៥ ខែតុលា ឆ្នាំ២០២៦ បានរៀបចំពិធីគោរពព្រះវិញ្ញាណក្ខន្ធ ព្រះករុណា ព្រះបាទ សម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» ក្នុងឱកាសគម្រប់ខួប ១៤ឆ្នាំ នៃការយាងចូលព្រះទិវង្គតរបស់ព្រះអង្គ។

ពិធីនេះបានប្រារព្ធឡើងនៅសាលប្រជុំប្រាសាទព្រះវិហារ នៃអគាររដ្ឋបាលសាលាខេត្តព្រះវិហារ ជាន់ទី៣ ក្រោមអធិបតីភាពលោក ប្រាក់ សុវណ្ណ ប្រធានក្រុមប្រឹក្សាខេត្ត និងលោក គីម រិទ្ធី អភិបាលខេត្តព្រះវិហារ ដោយមានការចូលរួមពីសមាជិកក្រុមប្រឹក្សាខេត្ត អភិបាលរងខេត្ត តំណាងកងកម្លាំងប្រដាប់អាវុធទាំងបីប្រភេទ ថ្នាក់ដឹកនាំមន្ទីរ អង្គភាពជុំវិញខេត្ត អភិបាលក្រុង-ស្រុកទាំង៨ មន្ត្រីរាជការ សមាជិកសមាជិកាសហភាព សហព័ន្ធយុវជនកម្ពុជា និងលោកយាយជីជាច្រើនរូប។

ការប្រារព្ធពិធីនេះ គឺជាការបង្ហាញនូវកតញ្ញូតាធម៌ និងការចងចាំមិនភ្លេចចំពោះព្រះរាជគុណូបការៈដ៏ឧត្តុង្គឧត្តមរបស់ព្រះបរមរតនកោដ្ឋ ដែលព្រះអង្គបានបូជាព្រះកាយពល និងព្រះបញ្ញាញាណក្នុងបុព្វហេតុជាតិមាតុភូមិ ជាពិសេសការតស៊ូទាមទារឯករាជ្យជាតិ ការការពារបូរណភាពទឹកដី និងការបង្រួបបង្រួមជាតិខ្មែរ។

ព្រះបរមរតនកោដ្ឋ ព្រះអង្គនៅតែជាព្រះមហាវីរក្សត្រដ៏ឆ្នើម ដែលប្រជារាស្ត្រខ្មែរគ្រប់ជំនាន់ចងចាំ និងគោរពសក្ការៈចំពោះព្រះរាជបូជនីយកិច្ចដ៏ថ្លៃថ្លា ដើម្បីឱ្យប្រទេសកម្ពុជាទទួលបានឯករាជ្យ សន្តិភាព និងឯកភាពជាតិ។ ការរៀបចំពិធីគោរពព្រះវិញ្ញាណក្ខន្ធនាឱកាសនេះ ក៏ជាការរំលឹកដល់កូនចៅខ្មែរជំនាន់ក្រោយ ឱ្យបន្តថែរក្សាមរតកប្រវត្តិសាស្ត្រ ស្មារតីស្នេហាជាតិ និងសាមគ្គីភាព ដើម្បីចូលរួមកសាង និងអភិវឌ្ឍប្រទេសជាតិឱ្យកាន់តែរីកចម្រើនរុងរឿង។

សូមជម្រាបថា ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» បានយាងចូលព្រះទិវង្គតនៅថ្ងៃទី១៥ ខែតុលា ឆ្នាំ២០១២ ថ្ងៃទី១៥ ខែតុលា ឆ្នាំ២០២៦ គឺជាខួប ១៤ឆ្នាំ នៃការយាងចូលព្រះទិវង្គតរបស់ព្រះអង្គ៕