(កំពង់ធំ)៖ រដ្ឋបាលស្រុកស្ទោង ខេត្តកំពង់ធំ បានប្រារព្ធពិធីគោរពព្រះវិញ្ញាណក្ខន្ធ សម្តេចព្រះបរមរតនកោដ្ឋ ព្រះបាទនរោត្តម សីហនុ គម្រប់ខួប១៤ឆ្នាំ កាលពីព្រឹកថ្ងៃទី១៥ ខែតុលា ឆ្នាំ២០២៦ នៅវត្តឥន្ទរង្សី ក្នុងឃុំទ្រា ស្រុកស្ទោង។ ពិធីដ៏ឧត្តុង្គឧត្តមនេះ ត្រូវបានដឹកនាំដោយលោក ឡាយ ស៊ីលី ប្រធានក្រុមប្រឹក្សាស្រុក និងលោក សាយ គឹមឡម អភិបាលស្រុកស្ទោង ព្រមទាំងមានការចូលរួមពីសមាជិក សមាជិកា និងសហការីជាច្រើនរូប។

ការប្រារព្ធពិធីនេះ ធ្វើឡើងក្នុងគោលបំណងសម្តែងនូវការដឹងគុណយ៉ាងជ្រាលជ្រៅបំផុតចំពោះព្រះមហាវីរក្សត្រ ដែលព្រះអង្គបានលះបង់ព្រះកាយពល និងព្រះបញ្ញាញាណពេញមួយព្រះជន្មាយុ ដើម្បីបុព្វហេតុជាតិមាតុភូមិ។ ព្រះអង្គបានទាមទារឯករាជ្យជាតិជូនប្រទេសកម្ពុជាពីអាណានិគមនិយមបារាំង នៅថ្ងៃទី៩ ខែវិច្ឆិកា ឆ្នាំ១៩៥៣ ដែលជាព្រឹត្តិការណ៍ប្រវត្តិសាស្ត្រដ៏សំខាន់សម្រាប់ប្រជាជាតិខ្មែរទាំងមូល។

ជាមួយគ្នានេះ ពិធីនេះក៏មានអត្ថន័យយ៉ាងជ្រាលជ្រៅក្នុងការបណ្តុះស្មារតីស្នេហាជាតិដល់កូនខ្មែរ ជាពិសេសយុវជនជំនាន់ក្រោយ ឲ្យបានយល់ដឹងពីប្រវត្តិសាស្ត្រ ការលះបង់ និងការតស៊ូរបស់ព្រះអង្គ ដើម្បីរៀនសូត្រតាមគំរូស្នេហាជាតិជាអមតៈ។ ព្រះអង្គជាព្រះបិតាឯករាជ្យជាតិ ព្រះបិតាសន្តិភាព និងការបង្រួបបង្រួមជាតិ ដែលជានិមិត្តរូបនៃកត្តារួបរួមជាតិ និងសាមគ្គីភាព។

សរុបមក ពិធីគោរពព្រះវិញ្ញាណក្ខន្ធនេះ មិនត្រឹមតែជាកិច្ចការកាន់ទុក្ខប៉ុណ្ណោះទេ ប៉ុន្តែជាស្មារតីជាតិដ៏មានតម្លៃក្នុងការរំលឹកកូនខ្មែរឲ្យចេះស្រឡាញ់ជាតិ ថែរក្សាសន្តិភាព អធិបតេយ្យភាព និងរួមគ្នាកសាងប្រទេសជាតិឲ្យកាន់តែរីកចម្រើនទៅមុខបន្ថែមទៀត។ គ្រប់ឃុំទាំងអស់ក្នុងស្រុកស្ទោង ក៏បានប្រារព្ធពិធីនេះផងដែរ ដោយមានការបង្សុកូលឧទ្ទិសកុសល និងវេរប្រគេនទេយ្យទានដល់ព្រះសង្ឃ៕