(ព្រុចសែល)៖ សហភាពអឺរ៉ុប (EU) និងបណ្តាប្រទេសនៅតំបន់ឈូងសមុទ្រ នៅថ្ងៃព្រហស្បតិ៍ បានសម្រេចពន្យារពេលកិច្ចប្រជុំកំពូលរួមគ្នាមួយ ដែលគ្រោងនឹងរៀបចំឡើងនៅប្រទេសអារ៉ាប៊ីសាអូឌីត នាសប្តាហ៍ក្រោយ ខណៈការវាយប្រហារឥតឈប់ឈររបស់ក្រុមហ៊ូទី (Houthi) បានបង្កការព្រួយបារម្ភយ៉ាងខ្លាំងដល់សុវត្ថិភាពធ្វើដំណើរតាមផ្លូវអាកាសចេញ-ចូលប្រទេសនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី១៥ ខែតុលា ឆ្នាំ២០២៦។

ក្រុមប្រឹក្សាសហប្រតិបត្តិការឈូងសមុទ្រ (GCC) បានឱ្យដឹងថា ការសម្រេចពន្យារពេលកិច្ចប្រជុំកំពូលដែលគ្រោងធ្វើឡើងនៅថ្ងៃទី២៤ ខែតុលា ក្នុងរដ្ឋធានីរីយ៉ាដ គឺដោយសារការបន្តគំរាមកំហែងវាយប្រហាររបស់ក្រុមហ៊ូទី និងការបន្តផ្អាកដំណើរការព្រលានយន្តហោះអន្តរជាតិ King Khalid។ ចំណែកសហភាពអឺរ៉ុប មិនបានបញ្ជាក់មូលហេតុលម្អិតនៃការពន្យារពេលនេះទេ ដោយគ្រាន់តែលើកឡើងថាកាលបរិច្ឆេទថ្មីនឹងត្រូវប្រកាសនៅពេលក្រោយ ព្រមទាំងអះអាងថា EU នៅតែផ្តល់សារៈសំខាន់ជាយុទ្ធសាស្ត្រយ៉ាងខ្លាំងចំពោះទំនាក់ទំនងជាមួយតំបន់ឈូងសមុទ្រ។

គួរបញ្ជាក់ថា ការពន្យារពេលកិច្ចប្រជុំកំពូលដែលមានបំណងបង្ហាញពីសាមគ្គីភាពរបស់អឺរ៉ុបជាមួយអារ៉ាប៊ីសាអូឌីត និងប្រទេសឈូងសមុទ្រនេះ បានឆ្លុះបញ្ចាំងឱ្យឃើញពីស្ថានភាពសន្តិសុខដ៏ធ្ងន់ធ្ងរ បន្ទាប់ពីការវាយប្រហាររបស់ក្រុមហ៊ូទី លើព្រលានយន្តហោះអន្តរជាតិរីយ៉ាដ កាលពីចុងសប្តាហ៍មុន បានសម្លាប់មនុស្ស ១៣ នាក់ និងរបួសរាប់រយនាក់ រហូតធ្វើឱ្យព្រលានយន្តហោះដែលថ្នាក់ដឹកនាំអន្តរជាតិត្រូវចុះចតនោះ ត្រូវបន្តបិទទ្វាររហូតមកទល់ពេលនេះ៕