(បន្ទាយមានជ័យ)៖ លោក ឡាំ ហេងហួត រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានគណៈកម្មាធិការជាតិគ្រប់គ្រងគ្រោះមហន្តរាយ រួមជាមួយលោក អ៊ុំ រាត្រី អភិបាលខេត្តបន្ទាយមានជ័យ នៅព្រឹកថ្ងៃទី១៥ ខែតុលា ឆ្នាំ២០២៦នេះ បានដឹកនាំកិច្ចប្រជុំមួយជាមួយមន្ទីរ-ស្ថាប័នពាក់ព័ន្ធ និងអភិបាលក្រុង-ស្រុក។

កិច្ចប្រជុំនេះមានគោលបំណងពិភាក្សា ពិនិត្យ និងវាយតម្លៃលើផលប៉ះពាល់ដំណាំស្រូវរបស់ប្រជាកសិករ ដែលរងគ្រោះដោយសារទឹកជំនន់ ដើម្បីស្នើសុំស្រូវពូជសម្រាប់ស្តារឡើងវិញ។

លោក អ៊ុំ រាត្រី បានបញ្ជាក់ថា ក្នុងចំណោម ៩ក្រុង-ស្រុក ក្រុងប៉ោយប៉ែត ស្រុកមង្គលបូរី និងក្រុងសិរីសោភ័ណ រងផលប៉ះពាល់ខ្លាំងជាងគេ ដោយសារទឹកជំនន់បានបំផ្លាញផ្ទះសម្បែង ដំណាំ និងហេដ្ឋារចនាសម្ព័ន្ធ។ ទឹកជំនន់បានចាប់ផ្តើមកើនឡើងពីថ្ងៃទី២៤ ខែកញ្ញា រហូតដល់ថ្ងៃទី១៣ ខែតុលា ទើបចាប់ផ្តើមស្រកចុះជាបណ្តើរៗ។ អាជ្ញាធរខេត្តកំពុងបន្តធ្វើការជាមួយមន្ទីរជំនាញ ដើម្បីស្រង់ទិន្នន័យពីការខូចខាត និងវាយតម្លៃលទ្ធភាពនៃការស្តារដំណាំឡើងវិញ។

លោក ឡាំ ហេងហួត បានសង្កត់ធ្ងន់ថា ទឹកជំនន់មិនត្រឹមតែប៉ះពាល់ដល់ជីវភាពប្រជាពលរដ្ឋប៉ុណ្ណោះទេ ថែមទាំងបំផ្លាញហេដ្ឋារចនាសម្ព័ន្ធ និងដំណាំស្រូវផងដែរ។ ក្នុងនាមគណៈកម្មាធិការជាតិគ្រប់គ្រងគ្រោះមហន្តរាយ លោកបានផ្តល់អនុសាសន៍ចំនួន៣ រួមមាន៖ ការផ្ទៀងផ្ទាត់ទិន្នន័យផលប៉ះពាល់ឱ្យបានត្រឹមត្រូវ ការកំណត់តំបន់ដែលអាចស្តារឡើងវិញបាន និងការបន្តសហការគ្នារវាងមន្ត្រីជំនាញ និងមូលដ្ឋាន ដើម្បីវាយតម្លៃការខូចខាត និងស្នើសុំជំនួយស្បៀង គ្រាប់ពូជ ព្រមទាំងវិធានការស្តារឡើងវិញឱ្យស្របតាមតម្រូវការជាក់ស្តែងរបស់ប្រជាពលរដ្ឋ៕