(អ៊ីស្ថានប៊ុល, តួកគីយ៉េ)៖ នៅរសៀលថ្ងៃសុក្រ ទី១៦ ខែតុលា ឆ្នាំ២០២៦នេះ ក្នុងដំណើរអមសម្តេចមហាបវរ​ធិបតី ហ៊ុន ម៉ាណែត នាយករដ្ឋមន្ត្រីបំពេញការងារនៅតួកគីយ៉េ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញទស្សនាព្រះវិហារឥស្លាម Hagia Sophia និងវិមាន Dolmabahce ដែលជាអតីតព្រះបរមរាជ​វាំង​នៃចក្រភពអូតូម៉ង់ ស្ថិតនៅតាមច្រកសមុទ្រ Bosphorus ក្នុងទីក្រុងអ៊ីស្ថានប៊ុល ប្រទេសតួកគីយ៉េ។

ព្រះ​វិហារ​ឥស្លាម Hagia Sophia គឺជាសំណង់ប្រវត្តិសាស្ត្រដ៏ល្បីល្បាញមួយ ដែលដើមឡើយ​ត្រូវបាន​សាងសង់​ឡើងជាវិហារគ្រិស្តសាសនាអូស្សូដក់នៅសតវត្សរ៍ទី៦ មុនពេលត្រូវបានប្តូរទៅជាវិហារឥស្លាម និងក្រោយមកជាសារមន្ទីរ រហូតដល់បច្ចុប្បន្នបានក្លាយជាព្រះវិហារឥស្លាមឡើងវិញ។ វាជាទីតាំងដែល​ឆ្លុះ​បញ្ចាំង​ពីប្រវត្តិសាស្ត្រដ៏វែងឆ្ងាយ និងស្មុគស្មាញនៃទីក្រុងអ៊ីស្ថានប៊ុល។

ចំណែកឯវិមាន Dolmabahce វិញ ត្រូវបានសាងសង់ឡើងនៅពាក់កណ្តាលសតវត្សរ៍ទី១៩ ជាព្រះបរមរាជ​វាំង​ដ៏ប្រណិត ដែលបង្ហាញពីភាពរុងរឿងចុងក្រោយនៃចក្រភពអូតូម៉ង់ ជាមួយនឹងស្ថាបត្យកម្ម​បែបអឺរ៉ុប​ដ៏ស្រស់​ស្អាត។

លោកជំទាវបណ្ឌិត បានបង្ហាញការចាប់អារម្មណ៍ខ្ពស់ចំពោះទីតាំងប្រវត្តិសាស្ត្រដ៏ល្បាញល្បីទាំងពីរនេះ។ ដំណើរទស្សនកិច្ចនេះបានបង្ហាញពីចំណាប់អារម្មណ៍របស់លោកជំទាវ​បណ្ឌិត ចំពោះបេតិកភណ្ឌវប្បធម៌ និងប្រវត្តិសាស្ត្រដ៏សម្បូរបែបរបស់តួកគីយ៉េ៕