(សិង្ហបុរី)៖ នៅថ្ងៃទី១៦ ខែតុលា ឆ្នាំ២០២៦ និស្សិតកម្ពុជាដែលកំពុងសិក្សាថ្នាក់អនុបណ្ឌិតនៅសាលាគោលនយោបាយសាធារណៈ លី ក្វាន់យូ នៃសាកលវិទ្យាល័យជាតិសិង្ហបុរី (National University of Singapore – NUS) បានចូលរួមរៀបចំស្តង់តំណាងប្រទេសកម្ពុជា ក្នុងកម្មវិធីរាត្រីវប្បធម៌ LKYSPP Cultural Night 2026 ដែលបានប្រព្រឹត្តទៅនៅបរិវេណសាកលវិទ្យាល័យ NUS Bukit Timah ប្រទេសសិង្ហបុរី។

កម្មវិធីនេះមានការចូលរួមពីតំណាងប្រទេសចំនួន១៥ ក្នុងគោលបំណងលើកកម្ពស់ការផ្លាស់ប្តូរវប្បធម៌ ការយល់ដឹងគ្នាទៅវិញទៅមក និងការពង្រឹងចំណងមិត្តភាពរវាងនិស្សិតអន្តរជាតិ តាមរយៈការតាំងបង្ហាញវប្បធម៌ ម្ហូបអាហារប្រពៃណី និងការសម្តែងសិល្បៈ។

ក្នុងឱកាសនេះ និស្សិតកម្ពុជាបានចូលរួមផ្សព្វផ្សាយអំពីបេតិកភណ្ឌវប្បធម៌ ប្រពៃណី ទំនៀមទម្លាប់ និងអត្តសញ្ញាណជាតិខ្មែរ ទៅកាន់និស្សិត និងសមាជិកនៃសហគមន៍ LKYSPP មកពីបណ្តាប្រទេសផ្សេងៗ។

លើសពីនេះ អ្នកចូលរួមត្រូវបានលើកទឹកចិត្តឱ្យស្លៀកពាក់សម្លៀកបំពាក់ប្រពៃណីជាតិរបស់ខ្លួន ដើម្បីបង្ហាញពីបេតិកភណ្ឌវប្បធម៌ និងរួមចំណែកបង្កើតបរិយាកាសពហុវប្បធម៌នៅក្នុងកម្មវិធី។

ការចូលរួមនេះមិនត្រឹមតែជាឱកាសក្នុងការបង្ហាញពីភាពសម្បូរបែបនៃវប្បធម៌ខ្មែរនៅលើឆាកអន្តរជាតិប៉ុណ្ណោះទេ ប៉ុន្តែថែមទាំងជាការចូលរួមចំណែកដល់ការលើកកម្ពស់ការទូតវប្បធម៌ ទំនាក់ទំនងរវាងប្រជាជននិងប្រជាជន និងការពង្រឹងមិត្តភាពរវាងកម្ពុជា និងសហគមន៍អន្តរជាតិផងដែរ៕