(ភ្នំពេញ)៖ បុណ្យកឋិនទានមហាសាមគ្គីដង្ហែចូលវត្តព្រះវិហារធំសសរ១០០ ស្ថិតស្ថិត​នៅ​ភូមិ​សំបូរ ឃុំសំបូរ ស្រុកសំបូរ ខេត្តក្រចេះ នឹងប្រព្រឹត្តទៅថ្ងៃចន្ទ-អង្គារ ១៤-១៥កើត ខែកត្តិក ឆ្នាំមមី អដ្ឋស័ក ពុទ្ធសករាជ២៥៧០ ត្រូវនឹងថ្ងៃទី២៣-២៤ ខែវិច្ឆិកា ឆ្នាំ២០២៦។

បុណ្យកឋិនទានមហាសាមគ្គីនេះ ត្រូវបានផ្តួចផ្តើមដោយថ្នាក់ដឹកនាំមន្ត្រីរាជការ កងកម្លាំងប្រដាប់អាវុធទាំង៣ប្រភេទ លោកអាចារ្យ គណៈកម្មការ អគ្គមហាឧបាសក អគ្គមហាឧបាសិកា មហាឧបាសក មហាឧបាសិកា ឧបាសក ឧបាសិកា នាយក នាយិកា ពុទ្ធបរិស័ទរាជធានី ខេត្ត ក្នុង និងក្រៅប្រទេស ចំណុះជើងព្រះវិហាធំសសរ១០០។

សូមបញ្ជាក់ថា បុណ្យកឋិនទាន គឺជាពិធីបុណ្យប្រពៃណីព្រះពុទ្ធសាសនាមួយដ៏សំខាន់ ដែល​ប្រជាជនខ្មែរតែងតែប្រារព្ធធ្វើឡើងរៀងរាល់ឆ្នាំ បន្ទាប់ពីបុណ្យចេញព្រះវស្សា។ ពិធីបុណ្យនេះ​មានលក្ខណៈពិសេសនៅក្នុងព្រះពុទ្ធសាសនា ដោយសារជាកាលទាន ដែលមានកំណត់​ពេល​វេលាច្បាស់លាស់។ បុណ្យកឋិនទានអាចប្រារព្ធធ្វើបានតែក្នុងរយៈពេល ២៩ថ្ងៃប៉ុណ្ណោះ គឺ​ចាប់​ពីថ្ងៃ ១រោច ខែអស្សុជ ដល់ថ្ងៃ១៥កើត ខែកត្តិក។ ក្នុងរយៈពេលនេះ វត្តអារាម​នីមួយៗ​អាចទទួលអង្គកឋិនបានតែមួយប៉ុណ្ណោះ។

គោលបំណងសំខាន់នៃបុណ្យកឋិនទាន គឺដើម្បី វេរប្រគេនសំពត់ត្រៃចីវរ និងបច្ច័យ ដល់​ព្រះ​សង្ឃដែលគង់ចាំវស្សាអស់ត្រីមាសក្នុងពុទ្ធសីមា។ បច្ច័យដែលបានពីបុណ្យកឋិនទាន ត្រូវ​បាន​យកទៅកសាងសមិទ្ធផលនានាក្នុងវត្ត ដូចជា ព្រះវិហារ កុដិ សាលា និងជួយឧបត្ថម្ភ​ដល់​វិស័យសង្គមកិច្ចផងដែរ។

ពិធីបុណ្យនេះមាន ផលានិសង្សខ្ពស់ ទាំងចំពោះទាយក ទាយិកា និងបដិគ្គាហក ដែលជាទី​ជ្រះ​ថ្លា​របស់ពុទ្ធបរិស័ទខ្មែរ។ ការរៀបចំបុណ្យកឋិនទាន គឺត្រូវធ្វើត្រៃចីវរឱ្យបានត្រឹមត្រូវ​តាម​ពណ៌ រួចដង្ហែទៅវេរប្រគេនព្រះសង្ឃ បន្ទាប់មកសុំវត្តដែលត្រូវធ្វើកឋិន និងផ្សាយដំណឹង​បុណ្យកឋិន៕