(សៀមរាប)៖ យុវជន និងយុវតី ចំនួន ១, ៧២២នាក់ មានស្រី ៣០៩នាក់ បាន​ដាក់ពាក្យសុំចូលបំពេញកាតព្វកិច្ចយោធា នៅតាមមូលដ្ឋានកងរាជអាវុធហត្ថក្រុង ស្រុកទាំង១៣ ក្នុងខេត្តសៀមរាប ដើមី្បបំពេញកាតព្វកិច្ចជាពលរដ្ឋខែ្មរ និងក្នុងស្មារតីស្នេហាជាតិមាតុភូមិផងដែរ។

តាមការបញ្ជាក់ពីលោកឧត្តមសេនីយ៍ត្រី សៀ ទីន មេបញ្ជាការកងរាជអាវុធហត្ថខេត្ត បានឲ្យដឹងថា យោងតាមច្បាប់ស្តីពីកាតព្វកិច្ចយោធា ត្រូវបានប្រកាសឲ្យប្រើប្រាស់ជាផ្លូវការ ដោយកំណត់ឲ្យប្រជាពលរដ្ឋខ្មែរជាបុរស ដែលមានអាយុចាប់ពី ១៨ឆ្នាំ ដល់២៥ឆ្នាំ ត្រូវចូលរួមបំពេញកាតព្វកិច្ចយោធា ខណៈ​ស្ត្រីផ្អែកលើគោលការណ៍ស្ម័គ្រចិត្ត។

លោកឧត្តមសេនីយ៍ត្រី បានបន្តថា គ្រប់មូលដ្ឋានកងរាជអាវុធហត្ថក្រុង ស្រុកទាំង១៣ បានធ្វើការចែកពាក្យចូលបំពេញកាតព្វកិច្ចយោធា តាំងពីថ្ងៃទី០១ ដល់ថ្ងៃទី៩ ខែតុលា ឆ្នាំ២០២៦ ហើយនៅពេលទទួលពាក្យចាប់ពីថ្ងៃទី១០ ដល់ទី១៥ ខែតុលានេះ មានយុវជន និងយុវតី មានចំនួន ១, ៧២២នាក់ មានស្រី ៣០៩នាក់។

មេបញ្ជាការកងរាជអាវុធហត្ថខេត្ត បញ្ជាក់ថា ក្នុងចំនួន ១, ៧២២នាក់ ដែលបានអញ្ជើញមកដាក់ពាក្យនេះ គណៈកម្មាធិការកាតព្វកិច្ចយោធា និងធ្វើការត្រួតពិនិត្យ វាយតម្លៃទៅលើកាយសម្បទាទាំង៥ របស់យុវជន។ ក្នុងនោះមាន ១. កាយសម្បទាគ្រប់គ្រាន់, ២. សុខភាពរាងកាយរឹងមាំ, ៣. កម្លាំងពលំមាំមួន, ៤. សមត្ថភាពប្រឆាំងនឹងជម្ងឺ និងទី៥. សុខភាពផ្លូវចិត្តល្អ។

លោកឧត្តមសេនីយ៍ត្រី បន្ថែមថា ច្បាប់កាតព្វកិច្ចយោធា គឺជាគោលនយោបាយមួយក្នុងការវិនិយោគកសាង ពង្រឹងធនធានមនុស្ស ដែលមិនខុសពីក្រសួងអប់រំ ក្រសួងការងារ បណ្តុះបណ្តាលវិជ្ជាជីវៈ មិនខុសពីក្រសួងធម្មការ និងសាសនា ក្នុងការកសាងធនធានមនុស្សនូវសមត្ថភាព និងឥរិយាបថ។

លោកឧត្តមសេនីយ៍ត្រី សៀ ទីន ក៏បានលើកនូវប្រសាសន៍រស់សម្តេចធិបតី ហ៊ុន ម៉ាណែត នាយករដ្ឋមន្ត្រី បានថ្លែងថា «កាតព្វកិច្ចយោធា គឺជាការវិនិយោគ សូមយុវជន កុំមើលកាតព្វកិច្ចយោធាជាបន្ទុក តែជាឱកាសចូលបម្រើជាតិ ពង្រឹងវិន័យសីលធម៌ ពិសេសសមត្ថភាព និងជំនាញក្នុងវិស័យកងទ័ព»។

យុវជន ឈ្មោះ លី សាវុធ អាយុ ២០ឆ្នាំ រស់នៅភូមិស្វាយដង្គំ សង្កាត់ស្វាយដង្គំ ក្រុង សៀមរាប និងយុវជនឈ្មោះ ជន បញ្ញាពេជ្រ អាយុ ១៨ឆ្នាំ រស់នៅភូមិបឹងដូនប៉ា សង្កាត់ស្លក្រាម ក្រុងសៀមរាប និងយុវតី ឃឹន ស្រីណុច អាយុ ១៨ឆ្នាំ រស់នៅភូមិ បង្កោង ឃុំអំពិល ស្រុកប្រាសាទបាគង ខេត្តសៀមរាប បានឲ្យដឹងថា ការមកដាក់ ពាក្យបំពេញកាតព្វកិច្ចយោធានេះ គឺធ្វើឡើងដោយស្ម័ត្រខ្លួនឯង មិនមានការបង្ខិតបង្ខំពីរដ្ឋអំណាច ឬសមត្ថកិច្ច និងបុគ្គល ណាម្នាក់នោះឡើយ គឺកើតឡើងដោយស្មារតីស្នេហាជាតិមាតុភូមិរបស់ខ្លួន៕