(ភ្នំពេញ)៖ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅថ្ងៃ ទី២១ ខែតុលា ឆ្នាំ ២០២៦ បាន ប្រគល់ពានរង្វាន់ជ័យលាភីការប្រកួតតែងកំណាព្យ ស្ដីពីការរក្សាការចងចាំប្រវត្តិសាស្ត្រដ៏ឈឺចាប់របស់មាតុភូមិកម្ពុជាក្នុងរបបកម្ពុជាប្រជាធិបតេយ្យ ដែលរៀបចំឡើងនៅមជ្ឈមណ្ឌលធនធាន អ.វ.ត.ក. ដោយមជ្ឈមណ្ឌលតម្កល់ឯកសារច្បាប់ពាក់ព័ន្ធនឹង អ.វ.ត.ក. (ម.ត.ឯ.ច.)។

កម្មវិធីនេះមានគោលបំណងបំផុស និងលើកទឹកចិត្តដល់សិស្ស-និស្សិត និងគរុសិស្ស ដែលកំពុងសិក្សានៅតាមវិទ្យាល័យ សាកលវិទ្យាល័យ និងគ្រឹះស្ថានអប់រំនានាទូទាំងប្រទេស ឱ្យចូលរួមសិក្សា ស្រាវជ្រាវ និងស្វែងយល់ឱ្យកាន់តែស៊ីជម្រៅអំពីប្រវត្តិសាស្ត្រខ្មែរក្រហម ផលប៉ះពាល់នៃរបបកម្ពុជាប្រជាធិបតេយ្យ ការកាត់ទោសអតីតមេដឹកនាំខ្មែរក្រហម ព្រមទាំងសមិទ្ធផល និងកេរដំណែលនៃ អ.វ.ត.ក.។


មានប្រសាសន៍ក្នុងឱកាសនេះ លោក ហែម ក្រាញ់ តូនី បានសង្កត់ធ្ងន់លើសារៈសំខាន់នៃការថែរក្សាការចងចាំប្រវត្តិសាស្ត្រ និងការចូលរួមរបស់យុវជនជំនាន់ក្រោយក្នុងការសិក្សាស្វែងយល់ពីអតីតកាល។

លោកបានបញ្ជាក់ថា៖ «ការចងចាំប្រវត្តិសាស្ត្រមិនមែនគ្រាន់តែជាការរំលឹកអំពីអតីតកាលដ៏ឈឺចាប់ប៉ុណ្ណោះទេ ប៉ុន្តែជាការរៀនសូត្រពីមេរៀនប្រវត្តិសាស្ត្រ ដើម្បីឱ្យយើងយល់កាន់តែច្បាស់អំពីតម្លៃនៃសន្តិភាព យុត្តិធម៌ និងការគោរពសេចក្ដីថ្លៃថ្នូររបស់មនុស្ស។ យុវជនជំនាន់ក្រោយមានតួនាទីសំខាន់ក្នុងការបន្តថែរក្សាការចងចាំនេះ និងចែករំលែកចំណេះដឹងទៅកាន់មនុស្សជំនាន់បន្ទាប់ ដើម្បីកុំឱ្យសោកនាដកម្មបែបនេះកើតឡើងសារជាថ្មី»។

លោកបន្ថែមថា ការតែងកំណាព្យជាមធ្យោបាយមួយដ៏មានអត្ថន័យក្នុងការបង្ហាញពីការយល់ដឹង អារម្មណ៍ និងការឆ្លុះបញ្ចាំងរបស់យុវជនចំពោះប្រវត្តិសាស្ត្រជាតិ។ តាមរយៈការប្រើប្រាស់សិល្បៈអក្សរសាស្ត្រ សិស្ស-និស្សិតអាចចូលរួមផ្សព្វផ្សាយចំណេះដឹងប្រវត្តិសាស្ត្រ និងបន្តបណ្ដុះស្មារតីទទួលខុសត្រូវចំពោះសង្គម និងប្រទេសជាតិ។

ការប្រកួតតែងកំណាព្យនេះក៏មានគោលបំណងលើកស្ទួយវិស័យអក្សរសាស្ត្រខ្មែរផ្នែកតែងនិពន្ធកំណាព្យ ព្រមទាំងជំរុញឱ្យយុវជនដែលមិនបានឆ្លងកាត់របបកម្ពុជាប្រជាធិបតេយ្យដោយផ្ទាល់ មានឱកាសសិក្សាស្រាវជ្រាវ និងយល់ដឹងកាន់តែច្បាស់អំពីបទពិសោធន៍ប្រវត្តិសាស្ត្ររបស់ប្រទេសកម្ពុជា។

សម្រាប់ការប្រកួតប្រជែងឆ្នាំ២០២៦នេះ បេក្ខជនចំនួន៥រូបនឹងទទួលបានជ័យលាភី និងប្រាក់រង្វាន់តាមលំដាប់ថ្នាក់ រួមមាន៖
ជ័យលាភីលេខ១៖ ទទួលបានប្រាក់រង្វាន់ចំនួន ២.០០០.០០០ រៀល និងពានរង្វាន់មួយ។
ជ័យលាភីលេខ២៖ ទទួលបានប្រាក់រង្វាន់ចំនួន ១.៥០០.០០០ រៀល និងពានរង្វាន់មួយ។
ជ័យលាភីលេខ៣៖ ទទួលបានប្រាក់រង្វាន់ចំនួន ១.០០០.០០០ រៀល និងពានរង្វាន់មួយ។
ជ័យលាភីលេខ៤ និងលេខ៥៖ ទទួលបានប្រាក់លើកទឹកចិត្តចំនួន ៥០០.០០០ រៀលក្នុងម្នាក់ៗ។

កញ្ញា គង់ សម្ភស្ស បេក្ខជនមកពីខេត្តកំពង់ចាម បានទទួលជ័យលាភីលេខ១ ពីការប្រកួតប្រជែងនេះ ជាមួយចំណងជើង «ស្រីកម្ពុជាក្នុងរបបនរក»។ ចំណែក យុវតី សេង លីហ័រ មកពីខេត្តបន្ទាយមានជ័យម្ចាស់ស្នាដៃ«ស្រមោលខ្មៅ» ជាប់ជយលាភី លេខ២។

កញ្ញា គង់ សម្ភស្ស បានលើកឡើងថា របបកម្ពុជាប្រជាធិបតេយ្យ គឺជាប្រវត្តិសាស្ត្រដ៏ជូរចត់ដែលប្រជាជនកម្ពុជាស្ទើរគ្រប់រូបបានជួបប្រទះ ដែលបណ្តាលឲ្យមានការបាត់បង់ជីវិត និងការបែកបាក់គ្រួសារយ៉ាងច្រើន។ កញ្ញាបានបង្ហាញចំណាប់អារម្មណ៍យ៉ាងខ្លាំងក្នុងការសរសេរកំណាព្យនេះ បន្ទាប់ពីបានសិក្សាស្រាវជ្រាវយ៉ាងស៊ីជម្រៅអំពីប្រវត្តិសាស្ត្រខ្មែរក្រហម និងបានសម្ភាសន៍លោកយាយ លោកតាដែលជាជនរងគ្រោះផ្ទាល់។

កញ្ញា គង់ សម្ភស្ស បានបន្តថា ការចូលរួមចំណែកក្នុងការសរសេរកំណាព្យនេះ គឺជាផ្នែកមួយនៃការជំរុញការផ្សព្វផ្សាយឲ្យយុវជនជំនាន់ក្រោយបានស្វែងយល់ពីរបបខ្មែរក្រហម។ តាមរយៈខ្លឹមសារកំណាព្យ កញ្ញាសង្ឃឹមថា អ្នកអាន ជាពិសេសយុវជនដែលមិនបានឆ្លងកាត់របបនេះ នឹងអាចយល់ដឹងពីប្រវត្តិសាស្ត្រដ៏ខ្មៅងងឹត ដើម្បីកុំឲ្យកើតមានឡើងវិញនាពេលអនាគត។


ស្នាដៃកំណាព្យទាំងអស់ដែលបានដាក់ចូលរួមប្រកួត នឹងត្រូវយកទៅបោះពុម្ពផ្សព្វផ្សាយ ដើម្បីចែករំលែកស្នាដៃនិពន្ធរបស់យុវជន និងបង្កើនឱកាសឱ្យសាធារណជនបានសិក្សា ស្វែងយល់ និងពិចារណាអំពីប្រវត្តិសាស្ត្រខ្មែរក្រហមតាមរយៈអក្សរសិល្ប៍ និងជំរុញឱ្យយុវជនជំនាន់ក្រោយបន្តសិក្សាពីអតីតកាល ដើម្បីយកមេរៀនប្រវត្តិសាស្ត្រជាមូលដ្ឋានក្នុងការការពារសន្តិភាព លើកកម្ពស់យុត្តិធម៌ និងកសាងសង្គមមួយដែលមិនអនុញ្ញាតឱ្យសោកនាដកម្មបែបនេះកើតឡើងសារជាថ្មី ៕