(ភ្នំពេញ)៖ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) រួមជាមួយលោក Ishizuki Hideo ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំកម្ពុជា នាព្រឹកថ្ងៃ ទី២១ ខែតុលា ឆ្នាំ២០២៦នេះ បានអញ្ជើញជាសហធិបតី ដឹកនាំកិច្ចប្រជុំលើកទី៣២ នៃគណៈកម្មាធិការចម្រុះកម្ពុជា-ជប៉ុន ក្រោមកិច្ចព្រមព្រៀងរវាងកម្ពុជានិងជប៉ុន ស្តីពី សេរីភាវូបនីយកម្ម ការជំរុញ និងការការពារវិនិយោគ។

កិច្ចប្រជុំនេះត្រូវបានរៀបចំឡើងយ៉ាងទៀងទាត់ (២ដងក្នុង១ឆ្នាំ) ក្នុងគោលបំណងពង្រឹង និងពង្រីកកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងការវិនិយោគ ព្រមទាំងបង្កើនជំនឿទុកចិត្តជូនដល់សហគមន៍ធុរកិច្ចជប៉ុន សំដៅទាក់ទាញ និងជំរុញការវិនិយោគបន្ថែមទៀតមកកម្ពុជា។

កិច្ចប្រជុំនាឱកាសនេះមានការអញ្ជើញចូលរួមពី តំណាងក្រសួង-ស្ថាប័នពាក់ព័ន្ធនៃរាជរដ្ឋាភិបាលកម្ពុជា, សមាជិកក្រុមការងារបង្កើតធុរកិច្ចរួមគ្នា (BCT) តាមក្រសួង-ស្ថាប័ន និងតុជំនាញតាមវិស័យ, តំណាងសមាគមពាណិជ្ជកម្ម និងឧស្សាហកម្មជប៉ុននៅកម្ពុជា (JBAC), តំណាងទីភ្នាក់ងារសហប្រតិបត្តិការអន្តរជាតិនៃជប៉ុន (JICA) ប្រចាំកម្ពុជា, តំណាងអង្គការពាណិជ្ជកម្មក្រៅប្រទេសជប៉ុន (JETRO) ប្រចាំរាជធានីភ្នំពេញ, ព្រមទាំងតំណាងគណៈកម្មាធិការសហប្រតិបត្តិការសេដ្ឋកិច្ច និងឧស្សាហកម្មអាស៊ាន-ជប៉ុន (AMEICC)។

កិច្ចប្រជុំបានប្រព្រឹត្តទៅដោយរលូនតាមរបៀបវារៈដែលបានគ្រោងទុក ដែលរួមមាន ការគូសបញ្ជាក់ពីសារៈសំខាន់នៃការបន្តពង្រឹងទំនាក់ទំនងទ្វេភាគី លើកកម្ពស់បរិយាកាសវិនិយោគ និងពង្រីកកិច្ចសហប្រតិបត្តិការសេដ្ឋកិច្ច-ពាណិជ្ជកម្មរវាងប្រទេសទាំងពីរ ឱ្យកាន់តែប្រសើរឡើង, កិច្ចពិភាក្សាស៊ីជម្រៅរវាងភាគីទាំងពីរ កម្ពុជា-ជប៉ុន លើប្រធានបទជាអាទិភាព ដោយបានផ្លាស់ប្តូរយោបល់ដើម្បីស្វែងដំណោះស្រាយជាក់ស្តែង សំដៅសម្រួលដល់ប្រតិបត្តិការធុរកិច្ច និងការវិនិយោគរបស់ក្រុមហ៊ុនជប៉ុន, របាយការណ៍កិច្ចសហប្រតិបត្តិការ AMEICC ដោយបានបញ្ជាក់អំពីលទ្ធផលនៃការងាររួមគ្នារវាង គណៈកម្មាធិការ AMEICC និងក្រុមការងារ BCT និងរបាយការណ៍បច្ចុប្បន្នភាពនៃ សកម្មភាពការងារ សមិទ្ធផលដែលសម្រេចបាន និងទិសដៅការងារបន្តដោយតំណាងការិយាល័យ JICA ប្រចាំកម្ពុជា និងការិយាល័យ JETRO ប្រចាំរាជធានីភ្នំពេញ។

កិច្ចប្រជុំលើកទី៣២នេះ គឺជាយន្តការសន្ទនាផ្លូវការដ៏មានប្រសិទ្ធភាព និងជាវេទិកាយុទ្ធសាស្ត្ររវាងរាជរដ្ឋាភិបាលកម្ពុជា និងវិស័យឯកជនជប៉ុន ក្នុងការឆ្លើយតបទាន់ពេលវេលាចំពោះសំណូមពរ ក៏ដូចជាលុបបំបាត់របាំងធុរកិច្ចផ្សេងៗ។ តាមរយៈកិច្ចប្រជុំនេះ រាជរដ្ឋាភិបាលកម្ពុជាបានសម្តែងនូវការប្តេជ្ញាចិត្តយ៉ាងមុតមាំក្នុងការបន្តកែលម្អបរិយាកាសវិនិយោគ ធានានូវតម្លាភាព និងភាពព្យាករណ៍បាន ដើម្បីទាក់ទាញ និងរក្សាទុកនូវវិនិយោគិនជប៉ុន ព្រមទាំងបង្កើនទំនុកចិត្តលើការធ្វើធុរកិច្ចនៅកម្ពុជាឱ្យកាន់តែមានចីរភាព និងរីកចម្រើនឥតឈប់ឈរ៕