(ភ្នំពេញ)៖ នៅព្រឹកថ្ងៃព្រហស្បតិ៍ ១១កើត ខែអស្សុជ ឆ្នាំមមី អដ្ឋស័ក ព.ស.២៥៧០ ត្រូវ​នឹង​ថ្ងៃទី២២ ខែតុលា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​កម្ពុជា អញ្ជើញប្រកាសដាក់ឱ្យ​អនុវត្តជា​ផ្លូវការ «យុទ្ធសាស្ត្រជាតិស្តីពីការ​អភិវឌ្ឍ​សហគ្រាស​ធុនមីក្រូ តូច និងមធ្យម ឆ្នាំ២០២៦-២០៣០»។

ក្នុងបរិបទដែលកម្ពុជាកំពុងបន្តធ្វើពិពិធកម្មសេដ្ឋកិច្ច បង្កើនផលិតភាព និងត្រៀមខ្លួន​សម្រាប់​ការ​ចាកចេញពីឋានៈប្រទេសអភិវឌ្ឍន៍តិចតួចនៅចុងឆ្នាំ២០២៩ ការពង្រឹងសមត្ថ​ភាព និងភាពប្រកួតប្រជែងរបស់កម្ពុជា ជាការងារចាំបាច់។ ជាក់ស្តែងសហគ្រាសធុនមីក្រូ តូច និងមធ្យម (MSMEs) គឺជាមូលដ្ឋានដ៏សំខាន់នៃសេដ្ឋកិច្ចកម្ពុជា ក្នុងការបង្កើតការងារ បង្កើនប្រាក់ចំណូល ជំរុញសហគ្រិនភាព និងពង្រឹងភាពធន់នៃសេដ្ឋកិច្ចជាតិ ដែលត្រូវបាន​រាជរដ្ឋាភិបាល កំណត់ជាអាទិភាពមួយក្រោមយុទ្ធសាស្ត្របញ្ចកោណ-ដំណាក់កាលទី១ ដោយ​ផ្តោតលើការកែលម្អបរិយាកាសធុរកិច្ច ការធ្វើនិយ័តកម្មសហគ្រាស ការបង្កើន​ផលិត​ភា​ព ការចាប់យកបច្ចេកវិទ្យា និងនវានុវត្តន៍ ការពង្រឹងគុណភាព និងស្តង់ដារ ការទទួលបាន​ហិរញ្ញប្បទាន និងការពង្រីកទីផ្សារ។

ក្នុងន័យនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តាមរយៈគណៈ​កម្មាធិការគោលនយោបាយសេដ្ឋកិច្ចនិងហិរញ្ញវត្ថុ បានរៀបចំសេចក្តីព្រាងយុទ្ធសាស្ត្រ​ជាតិ​ស្តីពីការអភិវឌ្ឍសហគ្រាសធុនមីក្រូ តូច និងមធ្យម ឆ្នាំ២០២៦-២០៣០ ដើម្បីជំរុញការ​អភិ​វឌ្ឍ MSMEs ឱ្យក្លាយជាមូលដ្ឋានគ្រឹះ និងជាកម្លាំងចលករដ៏រឹងមាំនៃកំណើនសេដ្ឋ​កិច្ច​ជាតិ ដែលនឹងនាំមកនូវវឌ្ឍនភាពសង្គម និងវិបុលភាពសម្រាប់ប្រជាជាតិកម្ពុជា។

យុទ្ធសាស្ត្រជាតិនេះ ត្រូវបានសម្តេចមហាបវរធិបតី ហ៊ុន ម៉ាណែត ផ្តល់ការ ឯកភាពដ៏ខ្ពង់​ខ្ពស់​នៅថ្ងៃទី១០ ខែកក្កដា ឆ្នាំ២០២៦ និងបានអនុញ្ញាតឱ្យរៀបចំពិធីប្រកាសដាក់ឱ្យអនុវត្ត​ជា​ផ្លូវការនៅថ្ងៃទី២២ ខែតុលា ឆ្នាំ២០២៦។

យុទ្ធសាស្ត្រថ្មីនេះ គឺជាការបន្ត និងលើកកម្ពស់កិច្ចខិតខំប្រឹងប្រែងកន្លងមក ទៅកាន់​ដំណាក់​កាល​ថ្មីមួយ ដោយមានចក្ខុវិស័យច្បាស់លាស់ គឺជំរុញការអភិវឌ្ឍសហគ្រាសធុនមីក្រូ តូច និង​​មធ្យមកម្ពុជា ឱ្យក្លាយជាមូលដ្ឋានគ្រឹះ និងជាកម្លាំងចលករដ៏រឹងមាំ​នៃកំណើន​សេដ្ឋកិច្ច​ជាតិ ដែលនាំមកនូវវឌ្ឍនភាពសង្គម និងវិបុលភាពសម្រាប់ប្រជាជាតិកម្ពុជា។

ដើម្បីសម្រេចចក្ខុវិស័យនេះ យុទ្ធសាស្រ្តត្រូវបានរៀបចំឡើងដោយ​ឈរលើសសរស្តម្ភ​យុទ្ធ​សាស្ត្រចំនួន៤សំខាន់ៗ រួមមាន៖
ទី១៖ ការកែលម្អបរិស្ថានធុរកិច្ច និងនិយ័តកម្មផ្នែកច្បាប់
ទី២៖ ការលើកកម្ពស់សមត្ថភាពផលិតកម្ម សេវាកម្ម និងការចាប់យកបច្ចេកវិទ្យា និងនវានុ​វត្ត​ន៍
ទី៣៖ ការបង្កើនសមត្ថភាពប្រកួតប្រជែងក្នុងទីផ្សារជាតិ និងអន្តរជាតិ
ទី៤៖ ការអភិវឌ្ឍហេដ្ឋារចនាសម្ព័ន្ធគាំទ្រទាំងផ្នែករឹង និងផ្នែកទន់។

យុទ្ធសាស្ត្រនេះ នឹងក្លាយជាផែនទីបង្ហាញផ្លូវដ៏មុតស្រួច ក្នុងការកសាងមូលដ្ឋានរឹងមាំជូន​សហ​គ្រាស ដើម្បីអភិវឌ្ឍខ្លួនប្រកបដោយភាពធន់ និងចីរភាព ការពង្រឹង សមត្ថភាពផលិត​កម្ម​បំពេញតម្រូវការក្នុងស្រុកជំនួសការនាំចូល ព្រមទាំងការពង្រឹងការផ្សារភ្ជាប់រវាង MSMEs កម្ពុជាទៅនឹងខ្សែច្រវាក់តម្លៃក្នុងតំបន់ និងសកលលោក។

យុទ្ធសាស្រ្តនេះបានកំណត់យក «អភិក្រមស្រាល» ដោយមិនព្យាយាមរៀបចំយុទ្ធសាស្ត្រ​ដែល​ធំសម្បើម ទូលំទូលាយគ្រប់ជ្រុងគ្រប់ជ្រោយ ដូចមានជាបទពិសោធន៍កន្លងមកទេ ប៉ុន្តែ​បានសម្រួច ផ្តោតលើអាទិភាពគន្លឹះដែលជាបញ្ហារួមរបស់អន្តរក្រសួង ស្ថាប័ន និងប្រទាក់​ក្រឡា​គ្នា។

យុទ្ធសាស្ត្រនេះ មានគោលបំណងសំខាន់ចំនួន៣រួមមាន៖
១៖ ផ្សព្វផ្សាយចក្ខុវិស័យ គោលដៅ ទិសដៅយុទ្ធសាស្ត្រ និងអាទិភាពសំខាន់ៗ សម្រាប់​តម្រង់​ទិសការអភិវឌ្ឍ MSMEs ក្នុងរយៈពេល៥ឆ្នាំខាងមុខ។
២៖ ផ្សព្វផ្សាយក្របខណ្ឌគតិយុត្ត និងវិធានការគាំទ្រការអនុវត្តយុទ្ធសាស្ត្រ រួមទាំងអនុក្រឹត្យ និងយន្តការសំខាន់ៗដែលរាជរដ្ឋាភិបាលបានរៀបចំ ដើម្បីគាំទ្រការចូលក្នុងប្រព័ន្ធ ការរីក​លូត​លាស់របស់សហគ្រាស ការបង្កើនផលិតភាព និងភាពប្រកួតប្រជែង ព្រមទាំងការតភ្ជាប់​ទៅ​កាន់ទីផ្សារ និងខ្សែច្រវាក់តម្លៃ។
៣៖ ជំរុញការប្តេជ្ញាចិត្ត និងការទទួលខុសត្រូវរួមពីគ្រប់ភាគីពាក់ព័ន្ធក្នុងការ​អនុវត្តយុទ្ធ​សាស្ត្រ ដោយតម្រង់គោលនយោបាយ ផែនការសកម្មភាព ធនធាន និងកិច្ចគាំទ្ររបស់​ក្រសួង-ស្ថាប័ន វិស័យឯកជន សមាគមធុរកិច្ច និងដៃគូអភិវឌ្ឍន៍ ឱ្យស្របតាមអាទិភាពជាតិ និងមានការសម្របសម្រួលគ្នា សំដៅបំប្លែងយុទ្ធសាស្ត្រទៅជា សកម្មភាពជាក់ស្តែង មានការទទួលខុសត្រូវច្បាស់លាស់ និងលទ្ធផលដែលអាចវាស់វែងបាន។

សហគ្រាសធុនមីក្រូ តូច និងមធ្យម គឺជាឆ្អឹងខ្នងនៃសេដ្ឋកិច្ចកម្ពុជា និងជាមូលដ្ឋានគ្រឹះ​នៃ​ការ​អភិវឌ្ឍវិស័យឯកជន។ យោងតាមជំរឿនសេដ្ឋកិច្ចកម្ពុជា ឆ្នាំ២០២២ កម្ពុជាមាន​មូលដ្ឋាន​អាជីវកម្ម និងសហគ្រាសសរុបប្រមាណ ៧៥៣ ៦៧០មូលដ្ឋាន។ ក្នុងនោះ ៦០ ៥០៣ ជា​សហ​គ្រាសធុនតូច និងមធ្យម។ សហគ្រាសធុនមីក្រូ តូច និងមធ្យម ផ្តល់ការងារដល់ប្រជា​ពលរដ្ឋប្រមាណ ២,៩៨លាននាក់ ក្នុងនោះស្ត្រីមានជាង ១,៨៤ លាននាក់ ស្មើនឹងជាង ៦០% នៃកម្លាំងពលកម្មសរុប។

សហគ្រាសធុនមីក្រូ តូច និងមធ្យម ត្រូវបានប៉ាន់ប្រមាណថា រួមចំណែកប្រមាណ ៦៣% នៃផលិតផលក្នុងស្រុកសរុប (GDP) និងផ្តល់ការងារលើសពី ៧០% នៃការងារក្រៅ​វិស័យ​កសិកម្ម៕