(ពោធិ៍សាត់)៖ មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តពោធិ៍សាត់ នាថ្ងៃទី២៣ ខែតុលា ឆ្នាំ២០២៦នេះ នៅសាលប្រជុំទេពឧកញ៉ា ឃ្លាំង មឿង សាលាខេត្ត បានរៀបចំ «សន្និបាតបូកសរុបលទ្ធផលការងារ ឆ្នាំ២០២៦ និងលើកទិសដៅការងារបន្ត ឆ្នាំ២០២៧» ក្រោមអធិបតីភាព លោកស្រី ទេព បូរ៉ាមីន រដ្ឋលេខាធិការ តំណាងដ៏ខ្ពង់ខ្ពស់ លោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងលោក ខូយ រីដា អភិបាលខេត្តពោធិ៍សាត់ ព្រមទាំងមានការអញ្ជើញចូលរួមពីថ្នាក់ដឹកនាំមន្ទីរ-អង្គភាពជុំវិញខេត្ត កងកម្លាំងប្រដាប់អាវុធទាំងបីប្រភេទ អភិបាលក្រុង-ស្រុក និងមន្ត្រីរាជការយ៉ាងច្រើនកុះករ។

នៅក្នុងមតិបើកសន្និបាត លោក ខូយ រីដា អភិបាលខេត្តពោធិ៍សាត់ បានថ្លែងស្វាគមន៍យ៉ាងកក់ក្តៅ និងសម្តែងនូវការដឹងគុណយ៉ាងជ្រាលជ្រៅចំពោះរាជរដ្ឋាភិបាលនីតិកាលទី៧ ក្រោមការដឹកនាំដ៏ឈ្លាសវៃរបស់ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានដាក់ចេញនូវ «យុទ្ធសាស្ត្របញ្ចកោណ-ដំណាក់កាលទី១»។

លោកអភិបាលខេត្ត បានគូសបញ្ជាក់ថា ខេត្តពោធិ៍សាត់មានផ្ទៃដីសរុប ១,២៦៩,២០០ហិកតា (ចែកចេញជា ១ក្រុង, ៦ស្រុក, ៧សង្កាត់, ៤២ឃុំ និង ៥២៧ភូមិ)។ លោកបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ទីរជំនាញ ដែលក្នុងឆ្នាំ២០២៦នេះ កម្មវិធីអនុវិស័យរដ្ឋបាលដីធ្លី (LASSP) បានសម្រេចបញ្ចប់ការវាស់វែងទាំងស្រុង ក្នុងភូមិសាស្ត្រខេត្ត ព្រមទាំងបានជំរុញការផ្តល់បណ្ណកម្មសិទ្ធិ ការចុះបញ្ជីដីរដ្ឋ និងការផ្តល់ដីសម្បទានសង្គមកិច្ចជូនអតីតកងកម្លាំងប្រដាប់អាវុធ និងគ្រួសារក្រីក្រប្រកបដោយប្រសិទ្ធភាពខ្ពស់។

លោក ឱន សទ្ធា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តពោធិ៍សាត់ បានរាយការណ៍សង្ខេបអំពីសមិទ្ធផលសំខាន់ៗក្នុងឆ្នាំ២០២៦ រួមមាន៖

*ការចុះបញ្ជីដីធ្លីមានលក្ខណៈជាប្រព័ន្ធ៖ វាស់វែងសរុបបាន ៤៦១,៦៩១ក្បាលដី។ ក្នុងនោះ ការវាស់វែងក្បាលដីក្នុងតំបន់១ និងតំបន់២ នៃតំបន់បឹងទន្លេសាប សម្រេចបាន ១៨៥,០៥៨ក្បាលដី (ស្មើនឹង១០០%)។
*ការផ្តល់សេវា និងការប្រមូលចំណូល៖ តាមរយៈអង្គភាពច្រកចេញចូលតែមួយ មន្ទីរបានផ្តល់សេវាសុរិយោដីសរុប ៥,៣០៦សំណើ និងសេវាសំណង់ ២៦គម្រោង ដោយប្រមូលចំណូលសេវាសាធារណៈបាន ៩៣១,៧៦៨,៥០០រៀល និងចំណូលពន្ធប្រថាប់ត្រាសរុប ២,០៨៥,១៧២,០៥៦រៀល។
*ការដោះស្រាយវិវាទ និងការងារសំណង់៖ បានដោះស្រាយបញ្ចប់វិវាទដីធ្លីចំនួន ០១ករណី (កំពុងបន្តដោះស្រាយ ០៧ករណី) និងបានចេញលិខិតអនុញ្ញាតសាងសង់សរុប ៩០គម្រោង។
*ការងារសង្គមកិច្ច និងលំនៅឋាន៖ បានរៀបចំដីសម្បទានសង្គមកិច្ចចំនួន ២ទីតាំង (ភូមិប៊ុនរ៉ានីសែនជ័យដំណាក់ទ្រយឹង ស្រុកភ្នំក្រវាញ និងភូមិសំសាន្ត ស្រុកតាលោសែនជ័យ) ព្រមទាំងបានដោះស្រាយដោះដូរដីឡូតិ៍ជូនប្រជាពលរដ្ឋរស់នៅតាមមាត់ស្ទឹងពោធិ៍សាត់ចំនួន ២០៨គ្រួសារ ឱ្យទៅរស់នៅទីតាំងថ្មីប្រកបដោយសុវត្ថិភាព និងស្ថិរភាព។

ថ្លែងក្នុងពិធីបិទសន្និបាត លោកស្រី ទេព បូរ៉ាមីន រដ្ឋលេខាធិការ បានពាំនាំនូវការសួរសុខទុក្ខពី លោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី ជូនចំពោះអង្គសន្និបាតទាំងមូល។ លោកស្រីបានកោតសរសើរ និងវាយតម្លៃខ្ពស់ចំពោះស្មារតីសាមគ្គីភាព និងកិច្ចសហការយ៉ាងជិតស្និទ្ធរវាងមន្ទីរជំនាញ ជាមួយរដ្ឋបាលខេត្ត និងអាជ្ញាធរដែនដីគ្រប់លំដាប់ថ្នាក់។

ដើម្បីជំរុញការអនុវត្តការងារឱ្យកាន់តែមានប្រសិទ្ធភាព ស្របតាមបាវចនា និងគោលនយោបាយរបស់ក្រសួង គឺ «ការចុះបញ្ជីដីបង្ហើយ បរិយាកាសគ្មានវិវាទ និងការផ្តល់សេវាគាប់ចិត្ត» លោកស្រីរដ្ឋលេខាធិការ បានជំរុញការធ្វើនិយ័តកម្ម ការឡើងថ្នាក់ ឋានន្តរស័ក្តិ និងប្រាក់កម្រិតមុខងារជូនមន្ត្រីរាជការដែលខិតខំបំពេញការងារឱ្យបានទាន់ពេលវេលា។ បន្តបង្កើនល្បឿន និងប្រសិទ្ធភាពនៃការផ្តល់សេវាជូនប្រជាពលរដ្ឋឱ្យកាន់តែឆាប់រហ័ស និងតម្លាភាព។ ជំរុញការចុះបញ្ជីដីធ្លីជូនប្រជាពលរដ្ឋ និងដីរដ្ឋឱ្យបានចប់សព្វគ្រប់ ព្រមទាំងខិតខំចែកបណ្ណកម្មសិទ្ធិដែលនៅសេសសល់ជូនដល់ដៃប្រជាពលរដ្ឋឱ្យបានឆាប់រហ័ស។

លោកស្រីបានបន្តជំរុញមន្ត្រីឱ្យខិតខំដោះស្រាយវិវាទដីធ្លីនៅក្រៅប្រព័ន្ធតុលាការឱ្យមានប្រសិទ្ធភាពខ្ពស់។ ជំរុញការរៀបចំប្លង់គោលប្រើប្រាស់ដី និងផែនការប្រើប្រាស់ដីធ្លីទូទាំងខេត្ត ព្រមទាំងទប់ស្កាត់ឱ្យបានម៉ឺងម៉ាត់នូវសំណង់គ្មានលិខិតអនុញ្ញាត សំណង់រំលោភលើដីសាធារណៈរបស់រដ្ឋ និងសំណង់ខុសលិខិតអនុញ្ញាត។

ជាមួយគ្នានោះ ត្រូវបន្តធ្វើបច្ចុប្បន្នភាពទីតាំងលំនៅឋានបណ្តោះអាសន្ននៅលើដីសាធារណៈរបស់រដ្ឋ និងដីឯកជន ឱ្យបានច្បាស់លាស់ និងត្រឹមត្រូវ៕