(ភ្នំពេញ)៖ វិទ្យាស្ថានស្តង់ដារកម្ពុជា បានគូសបញ្ជាក់ពីសារៈសំខាន់ចាំបាច់នៃការយល់ដឹងឱ្យបានស៊ីជម្រៅអំពីស្តង់ដារផលិតផល ប្រព័ន្ធគ្រប់គ្រងដំណើរការផលិតកម្ម និងលក្ខខណ្ឌតម្រូវនៃទីផ្សារ ដើម្បីជំរុញការនាំចេញផលិតផលកសិកម្មរបស់កម្ពុជា ទៅកាន់ទីផ្សារអន្តរជាតិ ប្រកបដោយប្រសិទ្ធភាព សុវត្ថិភាព និងភាពប្រកួតប្រជែងខ្ពស់។

ការគូសបញ្ជាក់នេះ ត្រូវបានធ្វើឡើងដោយ លោក ចាន់ សុផា អគ្គនាយកវិទ្យាស្ថានស្តង់ដារកម្ពុជា ក្នុងឱកាសចូលរួមវេទិកា និងពិព័រណ៍កសិកម្មកម្ពុជា ឆ្នាំ២០២៦ (CAFE26) នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ ដែលប្រព្រឹត្តទៅចាប់ពីថ្ងៃទី ២៣ ដល់ថ្ងៃទី ២៥ ខែតុលា ឆ្នាំ២០២៦ ដោយមានការចូលរួមពីវាគ្មិនជំនាញកសិកម្ម ដៃគូអភិវឌ្ឍន៍ និងតំណាងវិស័យឯកជនជាច្រើនរូប ក្នុងគោលបំណងចែករំលែកបច្ចេកវិទ្យា និងជំរុញការអភិវឌ្ឍវិស័យកសិកម្មជាតិ។

លោក ចាន់ សុផា បានលើកឡើងថា ការនាំចេញកសិផលនាពេលបច្ចុប្បន្នអាចធ្វើឡើងតាមរយៈក្របខណ្ឌសំខាន់ពីរ គឺការនាំចេញក្នុងក្របខណ្ឌអាជីវកម្មទៅអាជីវកម្ម (B2B) និងការនាំចេញក្នុងក្របខណ្ឌរដ្ឋាភិបាលទៅរដ្ឋាភិបាល (G2G)។ យន្តការទាំងពីរនេះមានលក្ខខណ្ឌបច្ចេកទេស និងបទប្បញ្ញត្តិតម្រូវខុសៗគ្នា ផ្អែកលើតម្រូវការជាក់ស្តែងរបស់អ្នកទិញ និងច្បាប់ទម្លាប់របស់អាជ្ញាធរនៃប្រទេសនាំចូល។ ហេតុនេះ អ្នកផលិត និងអ្នកនាំចេញត្រូវតែសិក្សាឱ្យបានច្បាស់លាស់មុនពេលចាប់ផ្តើមប្រតិបត្តិការ ដើម្បីបញ្ចៀសឧបសគ្គបច្ចេកទេសនៅពេលទំនិញទៅដល់គោលដៅ។

លោកអគ្គនាយកបានពន្យល់លម្អិតថា ចំពោះស្តង់ដារផលិតផល គឺផ្តោតសំខាន់លើគុណលក្ខណៈរូបវន្ត និងបច្ចេកទេសផ្ទាល់ ដូចជា ទំហំ រសជាតិ ការត្រួតពិនិត្យជាតិលោហៈធ្ងន់ កត្តាជីវសាស្ត្រ និងកម្រិតសំណល់ថ្នាំកសិកម្មដែលអាចមាននៅក្នុងផលិតផលសម្រេច។ សូចនាករទាំងអស់នេះ ត្រូវតែស្របតាមកម្រិតកំណត់ និងបទប្បញ្ញត្តិបច្ចេកទេសនៃប្រទេសនាំចូលជាដាច់ខាត ទើបអាចមានសិទ្ធិចូលទៅកាន់ទីផ្សារគោលដៅបាន។

ទន្ទឹមនឹងស្តង់ដារផលិតផល លោកបានសង្កត់ធ្ងន់លើសារៈសំខាន់នៃស្តង់ដារប្រព័ន្ធគ្រប់គ្រងផលិតកម្ម ដោយបានក្រើនរំលឹកថា កំហុសឆ្គងណាមួយដែលកើតឡើងក្នុងដំណើរការផលិត សុទ្ធតែអាចជះឥទ្ធិពលអវិជ្ជមានដល់គុណភាពផលិតផលចុងក្រោយ។ ដូច្នេះ សហគ្រាស និងរោងចក្រកែច្នៃចាំបាច់ត្រូវមានប្រព័ន្ធគ្រប់គ្រងប្រកបដោយស្តង់ដារ និងច្បាស់លាស់ ដើម្បីធានាបាននូវគុណភាពជាប់លាប់ និងស្ថិរភាពផលិតកម្ម។

លើសពីនេះ លោក ចាន់ សុផា បានបន្ថែមលើទិដ្ឋភាពតម្រូវការទីផ្សារ (Market Requirements) ដែលរួមបញ្ចូលទាំងការដាក់ឈ្មោះផលិតផល ការបង្ហាញព័ត៌មានស្លាកសញ្ញា និងលក្ខណៈសម្គាល់ផ្សេងៗ ដែលជះឥទ្ធិពលផ្ទាល់ដល់ទំនុកចិត្ត និងការប្រកួតប្រជែងលើទីផ្សារ។ ការរៀបចំផែនការនាំចេញដោយគិតគូរគ្រប់ជ្រុងជ្រោយលើលក្ខខណ្ឌតម្រូវទាំងនេះ គឺជាកាតាលីករដ៏សំខាន់ក្នុងការកសាងទំនុកចិត្តពីដៃគូពាណិជ្ជកម្មអន្តរជាតិ និងលើកកម្ពស់កិត្យានុភាពកសិផលខ្មែរឱ្យឈរជើងបានយ៉ាងរឹងមាំនៅលើឆាកអន្តរជាតិ៕