រដ្ឋមន្ត្រីក្រសួងកសិកម្មហ្វីលីពីន ប្ដេជ្ញាពង្រឹង និងពង្រីកកិច្ចសហប្រតិបត្តិការលើវិស័យកសិកម្មជាមួយកម្ពុជា
23-10-2026 21:20
(ភ្នំពេញ)៖ នារសៀលថ្ងៃទី២៣ ខែតុលា ឆ្នាំ២០២៦នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអនុញ្ញាតឱ្យលោក Francisco P. Tiu Laurel, Jr. រដ្ឋមន្ត្រីក្រសួងកសិកម្មហ្វីលីពីន និងគណៈប្រតិភូ ចូលជួបសម្តែងការគួរសម និងពិភាក្សាការងារ។
ក្នុងជំនួបនេះ លោករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះការទទួលស្វាគមន៍ និងបដិសណ្ឋារកិច្ចយ៉ាងកក់ក្ដៅជូនចំពោះរូបលោក និងគណៈប្រតិភូ ក្នុងឱកាសនៃការបំពេញទស្សនកិច្ចនៅកម្ពុជា និងការចូលរួមវេទិកា និងពិព័រណ៍កសិកម្មកម្ពុជា២០២៦ (CAFE26)។ លោករដ្ឋមន្ត្រីបានចាត់ទុកកម្ពុជា គឺជាមិត្តយូរអង្វែង និងជាដៃគូដ៏សំខាន់របស់ហ្វីលីពីន។
លោករដ្ឋមន្ត្រី ក៏បានសម្តែងនូវសេចក្តីសោមនស្សរីករាយ និងវាយតម្លៃខ្ពស់ចំពោះការរីកចម្រើននៃទំនាក់ទំនងរវាងប្រទេសទាំងពីរ ព្រមទាំងប្ដេជ្ញាចិត្តរួមចំណែកបន្តពង្រឹង និងពង្រីកទំនាក់ទំនង និងកិច្ចសហប្រតិបត្តិការនេះឱ្យកាន់តែរីកចម្រើនបន្ថែមទៀត ជាពិសេសក្នុងវិស័យកសិកម្ម និងពាណិជ្ជកម្ម។
បន្ថែមលើនេះ លោករដ្ឋមន្ត្រី ក៏បានលើកឡើងពីសក្ដានុពលនៃវិស័យកសិកម្មរបស់ហ្វីលីពីន ព្រមទាំងបានបង្ហាញចំណាប់អារម្មណ៍ក្នុងការពង្រីកការនាំចេញផលិតផលកសិកម្ម ដូចជា៖ ត្រីសមុទ្រ និងផ្លែឈើ មកកាន់ទីផ្សារប្រទេសកម្ពុជាបន្ថែមទៀត ជាមួយការលើកទឹកចិត្តឱ្យមានការភ្ជាប់ទំនាក់ទំនងរវាងវិស័យឯកជននៃប្រទេសទាំងពីរ ដើម្បីស្វែងយល់ និងចាប់យកកាលានុវត្តភាពថ្មីៗក្នុងការធ្វើពាណិជ្ជកម្មបំពេញឱ្យគ្នាទៅវិញទៅមក ក្នុងគោលបំណងឧត្តមប្រយោជន៍នៃប្រទេស និងប្រជាជនទាំងពីរ។
សម្ដេចមហាបវរធិបតី បានស្វាគមន៍ចំពោះដំណើរទស្សនកិច្ចរបស់លោករដ្ឋមន្ត្រីកសិកម្មហ្វីលីពីនមកកាន់កម្ពុជា។ សម្ដេចមហាបវរធិបតី បានគូសបញ្ជាក់ថា ការផ្លាស់ប្ដូរដំណើរទស្សនកិច្ចញឹកញាប់រវាងថ្នាក់ដឹកនាំនៃប្រទេសទាំងពីរ ឆ្លុះបញ្ចាំងពីវឌ្ឍនភាពនៃចំណងមិត្តភាព ព្រមទាំងជាកាលានុវត្តភាពថ្មីៗបន្ថែមទៀតក្នុងការពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែជិតស្និទ្ធ។
ជាមួយគ្នានេះ សម្ដេចមហាបវរធិបតី បានសម្តែងការពេញចិត្តចំពោះទំនាក់ទំនង និងកិច្ចសហប្រតិបត្តិការទ្វេភាគីកន្លងមក ជាពិសេសកំណើនជាលំដាប់នៃទំហំពាណិជ្ជកម្មទ្វេភាគី ព្រមទាំងបានគូសបញ្ជាក់អំពីសារៈសំខាន់ក្នុងការពង្រឹងពាណិជ្ជកម្មផ្ទៃក្នុងអាស៊ាន ដើម្បីធានាបាននូវភាពធន់ក្នុងតំបន់, ស្ថិរភាពខ្សែច្រវាក់ផ្គត់ផ្គង់ និងសន្តិសុខស្បៀង។
សម្ដេចមហាបវរធិបតី បានយល់ស្របចំពោះសារៈសំខាន់នៃការតភ្ជាប់រវាងវិស័យឯកជន និងវិស័យឯកជននៃប្រទេសទាំងពីរ តាមរយៈការបង្កើតវេទិកាផ្គូរផ្គងធុរកិច្ចឱ្យបានទៀងទាត់ ក៏ដូចជាសារៈសំខាន់នៃផ្លាស់ប្ដូរទស្សនកិច្ចសិក្សារបស់សិស្ស-និស្សិត សំដៅកសាងធនធានមនុស្ស និងផ្លាស់ប្ដូរជំនាញព្រមទាំងបទពិសោធក្នុងវិស័យកសិកម្ម។
សូមបញ្ជាក់ថា កម្ពុជា បានពង្រីកកាលានុវត្តភាពថ្មីមួយទៀត ក្នុងការធ្វើពាណិជ្ជកម្មជាមួយហ្វីលីពីន ជាពិសេសការនាំចេញអង្ករទៅកាន់ប្រទេសដែនកោះនៅអាស៊ានមួយនេះ។ ហ្វីលីពីនត្រូវបានគេរំពឹងថា នឹងទិញអង្ករពីកម្ពុជាប្រមាណ ២០ម៉ឺនតោន នៅក្នុងឆ្នាំ២០២៦នេះ ដែលជាការកើនឡើងយ៉ាងគំហុកពីត្រឹម ៣,៥១០តោនកាលពីឆ្នាំ២០២៥។ ការកើនឡើងនេះ ធ្វើឱ្យហ្វីលីពីនក្លាយជាទីផ្សារនាំចេញអង្ករដ៏ធំមួយរបស់កម្ពុជា ប្រហាក់ប្រហែលនឹងប្រទេសចិន។
គិតត្រឹមរយៈពេល ៨ខែដំបូងនៃឆ្នាំ២០២៦ កម្ពុជាបាននាំចេញអង្ករទៅហ្វីលីពីនចំនួន ១២២,១០២តោនរួចមកហើយ។ បន្ថែមពីនេះ មានកិច្ចសន្យាទិញអង្ករចំនួន ៨៧,៣៤៤ តោនទៀតសម្រាប់ខែកញ្ញា ដល់ខែធ្នូឆ្នាំ២០២៦ ដែលនឹងធ្វើឱ្យបរិមាណនាំចេញសរុបឈានដល់ប្រមាណ ២០៩,៤៤៦ តោន។ ការកើនឡើងនេះគឺដោយសារកិច្ចខិតខំប្រឹងប្រែងរបស់ក្រសួងពាណិជ្ជកម្ម និងវិស័យឯកជន ក្នុងការផ្សព្វផ្សាយគុណភាពអង្ករកម្ពុជា និងការផ្គូរផ្គងពាណិជ្ជកម្ម។ ហ្វីលីពីនមានតម្រូវការអង្កររហូតដល់ ៣លានតោនក្នុងមួយឆ្នាំ ដែលធ្វើឱ្យទីផ្សារនេះមានសក្តានុពលខ្ពស់សម្រាប់កម្ពុជា៕
