(វ៉ាស៊ីនតោន)៖ សេតវិមានបានប្រកាសនៅថ្ងៃសុក្រនេះថា ស្ត្រីទី១អាមេរិក លោកស្រី មេឡានី ត្រាំ (Melania Trump) បានសម្របសម្រួលឱ្យមានបទឈប់បាញ់រវាងរុស្ស៊ី និងអ៊ុយក្រែន នៅក្នុងទីក្រុង Oleshky ភាគខាងត្បូងអ៊ុយក្រែនដែលគ្រប់គ្រងដោយរុស្ស៊ី ហើយបទឈប់បាញ់នេះនឹងចាប់ផ្តើមចូលជាធរមាននៅថ្ងៃទី២៩ ខែតុលាខាងមុខ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៣ ខែតុលា ឆ្នាំ២០២៦។

សេចក្តីថ្លែងការណ៍របស់សេតវិមានបានបញ្ជាក់ថា ប្រទេសទាំងពីរបានព្រមព្រៀងផ្អាករាល់សកម្មភាពយោធាជាបណ្តោះអាសន្ននៅក្នុងទីក្រុង Oleshky ដើម្បីបើកផ្លូវឱ្យជំនួយមនុស្សធម៌ចូលទៅដល់ និងរៀបចំជម្លៀសពលរដ្ឋស៊ីវិលតាមរយៈច្រករបៀងសុវត្ថិភាពដែលបានកំណត់។ លោកស្រី មេឡានី ត្រាំ ដែលកន្លងមកតែងធ្វើសកម្មភាពជួយនាំយកកុមារអ៊ុយក្រែនពីរុស្ស៊ីត្រឡប់ទៅជួបគ្រួសារវិញនោះ បានគូសបញ្ជាក់ថា៖ «ស្ថានការណ៍នៅទីក្រុង Oleshky កំពុងស្ថិតក្នុងភាពធ្ងន់ធ្ងរ និងជិតឈានដល់មហន្តរាយ ព្រោះជាទីក្រុងសមរភូមិជួរមុខ ខណៈពលរដ្ឋដែលនៅសេសសល់ភាគច្រើនជាមនុស្សចាស់ជរា ដែលកំពុងត្រូវការការព្យាបាល ថ្នាំសង្កូវ អាហារ និងទឹកស្អាតជាបន្ទាន់»។

គួរបញ្ជាក់ថា ទីក្រុង Oleshky ស្ថិតក្រោមការកាន់កាប់របស់កងទ័ពរុស្ស៊ីតាំងពីខែកុម្ភៈ ឆ្នាំ២០២២ ហើយប្រមាណ ៩០ភាគរយនៃទីក្រុងនេះធ្លាប់លិចលង់ដោយទឹកជំនន់ក្រោយការបាក់ទំនប់វារីអគ្គិសនី Kakhovka។ បច្ចុប្បន្ន ទីក្រុងនេះកំពុងប្រឈមនឹងវិបត្តិខ្វះខាតស្បៀងអាហារកាន់តែធ្ងន់ធ្ងរ ដោយនៅសល់ពលរដ្ឋរស់នៅប្រមាណតែ ១,៧០០ ទៅ ២,០០០នាក់ប៉ុណ្ណោះ ក្នុងចំណោមប្រជាជនមុនសង្គ្រាមចំនួន ២៤,០០០នាក់ ដែលភាគច្រើនជាមនុស្សចាស់ជរាមិនអាចចាកចេញបាន និងកុមារប្រមាណ ៥០នាក់៕