(ភ្នំពេញ)៖ នៅថ្ងៃទី២៣ ខែតុលា ឆ្នាំ២០២៦ ក្រោមការសម្របសម្រួលពីតំណាងអយ្យការអមសាលាដំបូងរាជធានីភ្នំពេញ, កម្លាំងជំនាញនាយកដ្ឋានប្រតិបត្តិការ និងនីតិវិធី នៃមជ្ឈមណ្ឌលជាតិបច្ចេកវិទ្យាព័ត៌មាន សហការជាមួយ កម្លាំងគណៈបញ្ជាការឯកភាពខណ្ឌមានជ័យ និងខណ្ឌបឹងកេងកង បា​នបើកប្រតិបត្តិការចុះឆែកឆេរទីតាំងចំនួន២ ដែលសង្ស័យធ្វើសកម្មភាពឆបោកតាមប្រព័ន្ធបច្ចេកវិទ្យា (Online Scmas) ក្នុងភូមិសាស្ត្ររាជធានីភ្នំពេញ ដោយឃាត់ខ្លួនជនសង្ស័យជាខ្មែរ៦នាក់ ព្រមទាំងរឹបអូសវត្ថុតាងបានជាច្រើន។

ប្រតិបត្តិការនេះធ្វើឡើងក្រោយសមត្ថកិច្ចធ្វើការស្រាវជ្រាវ ស៊ើបអង្កេតជាច្រើនសប្តាហ៍ ដែលមានជនអនាមិកមួយក្រុម បានធ្វើសកម្មភាពក្លែងបន្លំជាកាយរិទ្ធិកម្ពុជា រ៉ៃអង្គាសប្រាក់ឧបត្ថម្ភជួយជនរងគ្រោះដោយសារទឹកជំនន់ និងឆបោកក្រោមរូបភាពផ្តល់សេវាភ្នាល់ល្បែងអនឡាញ បានទំហំទឹកប្រាក់ជាង៣០០លានរៀល។

យោងតាមរបាយការណ៍របស់សមត្ថកិច្ច បានឱ្យដឹងថា ក្រោយការស្រាវជ្រាវយ៉ាងហ្មត់ចត់, សមត្ថកិច្ចកំណត់បានទីតាំងដែលក្រុមសង្ស័យធ្វើសកម្មភាពចំនួន២ទីតាំង រួមមាន៖

*ទីតាំងទី១៖ ស្ថិតនៅ ផ្ទះលេខ ៣៨B ផ្លូវ៥១ ភូមិក្បាលទំនប់ សង្កាត់បឹងទំពុនទី២ ខណ្ឌមានជ័យ
*ទីតាំងទី២៖ ស្ថិតនៅតាំងផ្ទះលេខ ១D ផ្លូវ៣៣០ ភូមិ៣ សង្កាត់បឹងកេងកង៣ ខណ្ឌបឹងកេងកង។

តាមកិច្ចប្រតិបត្តិការរកឃើញសកម្មភាពជាក់ស្តែងក្រុមឧក្រិដ្ឋកំពុងធ្វើសកម្មភាពក្លែងជាក្រុមការងារកាយរិទ្ធិកម្ពុជា និងឆបោកក្រោមរូបភាពផ្តល់សេវាល្បែងស៊ីសងអនឡាញខុសច្បាប់។

ជាលទ្ធផលសមត្ថកិច្ចបានឃាត់ខ្លួនមុខសញ្ញាសង្ស័យ៦នាក់ រួមមាន៖

*ទី១៖ ឈ្មោះ ស ចាន់រតនា
*ទី២៖ ឈ្មោះ ផល សុផាន់ណារី ភេទស្រី
*ទី៣៖ ឈ្មោះ នួន គីមសុផល
*ទី៤៖ ឈ្មោះ បៅ ធិន ភេទស្រី
*ទី៥៖ ឈ្មោះ ទិត កក្កដា ភេទស្រី
*ទី៦៖ ឈ្មោះ លី អ៊ីជែរ ភេទស្រី។

កម្លាំងសមត្ថកិច្ច បានដកហូតវត្ថុតាងមួយចំនួន រួមមាន៖ ម៉ាស៊ីនកុំព្យូទ័រ (CPU) ១គ្រឿង, ម៉ូនីទ័រ ១គ្រឿង, កុំព្យូទ័រយួរដៃ (Laptop) ៦គ្រឿង, ទូរសព្ទដៃ ១៣គ្រឿង, iPad ២គ្រឿង, Tablet ១គ្រឿង, iPod ១គ្រឿង, ដុំរ៉ោតទ័រ ១គ្រឿង, អង្គចងចាំ (Memory) ១, ស៊ីមកាតចំនួន ៦៩កាត, លិខិតឆ្លងដែន ២ក្បាល, កាមេរ៉ាសុវត្ថិភាព ២គ្រឿង, ដុំវ៉ាយហ្វាយ (Wi-Fi) ១គ្រឿង, សៀវភៅកត់ត្រាចំណូលចំណាយ ១ក្បាល ឯកសារពាក់ព័ន្ធមួយចំនួន និងម៉ូតូចំនួន ៥គ្រឿង។

បច្ចុប្បន្ន ជនសង្ស័យទាំង ០៦នាក់ រួមទាំងវត្ថុតាងដែលបានដកហូតទាំងអស់ ត្រូវបានកម្លាំងសមត្ថកិច្ចជំនាញយកទៅរក្សាទុក និងកំពុងរៀបចំកសាងសំណុំរឿង ដើម្បីចាត់ការបន្តតាមនីតិវិធីច្បាប់៕