(កំពង់ស្ពឺ)៖ ថ្លែងចេញពីទឹកដី នៃខេត្ដកំពង់ស្ពឺ នៅថ្ងៃទី២៤ ខែតុលា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានបញ្ជាក់ឲ្យដឹងថា កម្ពុជាបាន​បញ្ជូនកងកម្លាំង​ សរុបជាង១ម៉ឺននាក់ ទៅចូលរួមបំពេញបេសកកម្មរក្សា​សន្តិភាព ​របស់​អង្គការសហប្រជាជាតិ។

ការបញ្ជាក់ឲ្យដឹងបែបនេះ របស់សម្តេចធិបតី ហ៊ុន ម៉ាណែត ធ្វើឡើងក្នុងឱកាសដែល កម្ពុជារៀបចំពិធីអបអរសាទរខួប២០ឆ្នាំ នៃការបញ្ជូនកងកម្លាំងនៃកង​យោពលខេមរភូមិន្ទ ចូលរួមបំពេញបេសកកម្មរក្សាសន្តិភាព​ និងសម្ពោធដាក់ឱ្យ​ប្រើប្រាស់សមិទ្ធផលនានា នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ នាព្រឹកថ្ងៃទី២៤ ខែតុលា ឆ្នាំ២០២៦។

សម្តេចបវរធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «មកដល់ពេលនេះ កម្ពុជាបាន​បញ្ជូនកងកម្លាំង​ សរុបចំនួន១០ ៩១៤នាក់ ទៅចូលរួមបំពេញបេសកកម្មរក្សា​សន្តិភាព ​របស់​អង្គការសហប្រជាជាតិ នៅតំបន់អាហ្រ្វិក មជ្ឈឹមបូព៌ា និង អ៊ឺរ៉ុប»។

បន្ថែមពីនោះទៀត សម្តេចបវរធិបតី ហ៊ុន ម៉ាណែត បានឲ្យដឹងថា តំបន់ដែលកម្ពុជា បាន​បញ្ជូនកងកម្លាំងទៅ រួមមាន៖ ស៊ូដង់ ស៊ូដង់​ខាង​ត្បូង ឆាដ សាធារណរដ្ឋអាហ្រ្វិកកណ្ដាល លីបង់ ស៊ីរី ម៉ាលី សាយប្រឺស យេម៉ែន និងសាធារណរដ្ឋប្រជាធិបតេយ្យកុងហ្គោ។

សម្តេចបវរធិបតី ហ៊ុន ម៉ាណែត បានគូសបញ្ជាក់ថា កងកម្លាំងរបស់កម្ពុជា បានពង្រីកតួនាទីជាបន្តបន្ទាប់ ពោលគឺពីការងារបោសសំអាតមីន ទៅ​បំពេញភារកិច្ចជាតម្រួតយោធា, វិស្វកម្ម, ពេទ្យកម្រិត២, អ្នកបោសសំអាតគ្រឿងផ្ទុះ​ភេរវកម្ម រហូតដល់មុខងារជានាយទាហានសង្កេតការណ៍ និងជានាយទាហានសេនាធិការទៀតផង។

បើតាមសម្តេចបវរធិបតី, សម្តេចតេជោ ហ៊ុន សែន អតីត​នាយក​រដ្ឋមន្ត្រី បានសម្រេចបញ្ជូនកងកម្លាំង នៃកងយោធពលខេមរភូមិន្ទកម្ពុជា ឱ្យចូលរួម​បំពេញ បេសកកម្មរក្សាសន្តិភាព របស់អង្គការសហប្រជាជាតិ ក្នុងឆ្នាំ២០០៦ តាមការអំពា​វ​នាវ​របស់​អតីតអគ្គលេខាធិការអង្គការសហប្រជាជាតិ ដោយចាប់ផ្តើមពីកងបោស​សម្អាតមីនចំនួន ១៣៥នាក់នៅប្រទេសស៊ូដង់។

សូមបញ្ជាក់ថា កម្ពុជាបន្តឈរនៅលំដាប់ថ្នាក់លេខ២៤ ក្នុងចំណោមប្រទេសចំនួន១២០ ដែលរួម​ចំណែក​បញ្ជូនកងកម្លាំងចូលរួមក្នុងប្រតិបត្តិការរក្សាសន្តិភាពរបស់អង្គការសហប្រជាជាតិ និងជាប់​ចំណាត់​ថ្នាក់លេខ៣ ក្នុងចំណោមបណ្តាប្រទេសអាស៊ាន បន្ទាប់ពីប្រទេសឥណ្ឌូនេស៊ី និង​ម៉ាឡេស៊ី។

ដោយឡែក សម្រាប់ការរួមចំណែកបញ្ជូនកងកម្លាំងស្ត្រី កម្ពុជាជាប់ចំណាត់​ថ្នាក់​លេខ១៣ ក្នុងចំណោមប្រទេសចំនួន១២០ និងជាប់ចំណាត់ថ្នាក់លេខ២ ក្នុងចំណោម​បណ្តាប្រទេសអាស៊ាន បន្ទាប់ពីប្រទេសឥណ្ឌូនេស៊ី៕