(កំពង់ស្ពឺ)៖ សម្តេចមហាបវរធិបតី ហ៊ុន ម៉ាណែត នាយក​រដ្ឋមន្ត្រីកម្ពុជា បានថ្លែងណែនាំដល់កងកម្លាំងរក្សាសន្តិភាពនៅក្រៅប្រទេស ត្រូវបន្ត​ទំនាក់​ទំនងល្អជាមួយសហការីបរទេស ជាមួយប្រជាជន, គោរពទំនៀមទម្លាប់ និងចេះជួយប្រជា​ជននៅកន្លែងដែលខ្លួនបំពេញប្រតិបត្តិការ ដែលទាំងនេះគឺជាកាយវិការប្រកបដោយមនុស្សធម៌ សីលធម៌ សេចក្តីថ្លៃថ្នូរបំផុត, ស័ក្ដិសមជាតំណាងជាតិ និងកងយោធពលខេមរភូមិន្ទ។

សម្តេចមហាបវរធិបតី ហ៊ុន ម៉ាណែត បានថ្លែងដូចនេះនៅថ្ងៃទី២៤ ខែតុលា ឆ្នាំ២០២៦នេះ នាឱកាសដែលសម្តេចអញ្ជើញជាអធិបតីក្នុងរៀបចំពិធីអបអរសាទរខួប ២០ឆ្នាំនៃការបញ្ជូនកងកម្លាំងនៃកង​យោ​ពលខេមរភូមិន្ទចូលរួមចូលរួមបំពេញបេសកកម្មរក្សាសន្តិភាព​ និងសម្ពោធដាក់ឱ្យ​ប្រើប្រាស់សមិទ្ធផលនានា នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ។

នៅក្នុងពិធីរៀបចំអបអរសាទរខួប ២០ឆ្នាំនេះ សម្តេចមហាបវរធិបតី ហ៊ុន ម៉ាណែត បានថ្លែងថា កងកម្លាំងរក្សាសន្តិភាពត្រូវចងចាំថា ក្នុងពេលបំពេញបេសកកម្ម កងកម្លាំងរបស់អង្គការសហប្រជាជាតិ, ប្រតិបត្តិការក្រោមបទប្បញ្ញត្តិរបស់អង្គការសហប្រជាជាតិ, និងស្ថិតក្រោមការបង្គាប់របស់មេបញ្ជាការអង្គការសហប្រជាជាតិ ត្រូវយកឱកាសបំពេញបេសកកម្មនេះដើម្បីរៀនសូត្រដកពិសោធន៍, និងស្វែងយល់ស៊ីជម្រៅអំពីរបៀបធ្វើការរបស់ប្រព័ន្ធអង្គការសហប្រជាជាតិ។

ជុំវិញការបំពេញបេសកកម្មរបស់កម្មកងកម្លាំងនៅក្រៅប្រទេស សម្តេចមហាបវរធិបតី ហ៊ុន ម៉ាណែត បានថ្លែងដូចនេះថា «កងកម្លាំងរក្សាសន្តិភាព ត្រូវបន្ត​ទំនាក់​ទំនងល្អជាមួយសហការីបរទេស ជាមួយប្រជាជន, គោរពទំនៀមទម្លាប់ និងចេះជួយប្រជា​ជននៅកន្លែងដែលកងកម្លាំងយើងបំពេញប្រតិបត្តិការ, កន្លងទៅកងកម្លាំងយើងទៅ​ដល់​ទីណាបានជួយទំនុកបម្រុង ឧបត្ថម្ភ ចែករំលែកស្បៀងអាហារ ជួយពិនិត្យព្យាបាលជំងឺ និងសង្គ្រោះការពារប្រជាជនមូលដ្ឋាននៅទីនោះផងដែរ»។

សម្តេចមហាបវរធិបតី ហ៊ុន ម៉ាណែត បានបន្ថែមទៀតថា ទាំងនេះគឺជាកាយវិការប្រកបដោយមនុស្សធម៌ សីលធម៌ សេចក្តីថ្លៃថ្នូរបំផុត, ស័ក្ដិសមជាតំណាងជាតិ និងកងយោធពលខេមរភូមិន្ទ។

សម្តេចមហាបវរធិបតី ហ៊ុន ម៉ាណែត ផ្តល់ដំបូន្មានដល់កងកម្លាំងរក្សាសន្តិភាព ត្រូវបន្ត​ប្រុង​ប្រយ័ត្នជានិច្ចចំពោះគ្រោះថ្នាក់គ្រប់ប្រភេទ, ទាំងគ្រោះថ្នាក់​ដែលអាច​កើត​ឡើងពីការ​ប្រយុទ្ធ, ពីការប៉ះទង្គិចគ្នារវាងក្រុមប្រដាប់អាវុធនានា, ពីការវាយប្រហារពួនស្ទាក់ និងពីជំងឺឆ្លង និងជំងឺកាចសាហាវនានា។ ត្រូវចេះស្រលាញ់គ្នា, មើលថែគ្នា, យកអាសារគ្នា ដូចពាក្យចាស់លោកពោលថា «នៅផ្ទះម្ដាយទីទៃ, នៅព្រៃម្ដាយតែមួយ»៕