(ភ្នំពេញ)៖​ លោក នេត្រ ភក្ត្រា រដ្ឋមន្ត្រីក្រសួងព័ត៌មាន នៅថ្ងៃទី២៤ ខែតុលា ឆ្នាំ២០២៦ បានអញ្ជើញបើកសិក្ខាសាលាស្តីពី «ការលើកកម្ពស់ការទទួលខុសត្រូវវិជ្ជាជីវៈសារព័ត៌មាន ការគោរពក្រមសីលធម៌ និងការអនុវត្តច្បាប់ក្នុងយុគសម័យឌីជីថល» នៅទីស្តីការក្រសួងព័ត៌មាន។

ពិធីនេះធ្វើឡើងដោយមានការសហការរវាងក្រសួងព័ត៌មាន និងសមគមអេឡេចត្រូនិច ព្រមទាំងមានការចូលរួមតំណាងក្រសួង ស្ថាប័ន តំណាងសមាគមអ្នកសារព័ត៌មាន អ្នកគ្រប់គ្រងស្ថាប័នសារព័ត៌មាន និងនិពន្ធនាយក អ្នកសារព័ត៌មាន អ្នកផលិតមាតិកាឌីជីថល ជាច្រើនរូបទៀត។

នាឱកាសនោះដែរ រដ្ឋមន្ត្រីក្រសួងព័ត៌មាន បានចាត់ទុកសិក្ខាសាលានេះថា «មានសារៈសំខាន់ជាពិសេស ព្រោះវាពាក់ព័ន្ធដោយផ្ទាល់នឹងគុណភាពសារព័ត៌មាន កិត្តិយសរបស់អ្នកសារព័ត៌មាន សិទ្ធិរបស់ប្រជាពលរដ្ឋ និងទំនុកចិត្តសាធារណៈ»។ យើងជួបជុំគ្នានៅថ្ងៃនេះ មិនមែនដើម្បីនិយាយតែអំពីអ្វីដែលអ្នកសារព័ត៌មានអាចធ្វើបាននោះទេ ប៉ុន្តែដើម្បីពិភាក្សាអំពីអ្វីដែលអ្នកសារព័ត៌មានគួរធ្វើ អ្វីដែលត្រូវប្រុងប្រយ័ត្ន និងរបៀបអនុវត្តសិទ្ធិសេរីភាពរបស់ខ្លួនប្រកបដោយវិជ្ជាជីវៈ និងការទទួលខុសត្រូវ។

រដ្ឋមន្ត្រីក្រសួងព័ត៌មាន បានបន្តថា បច្ចេកវិទ្យាអាចជួយឱ្យយើងផ្សព្វផ្សាយព័ត៌មានបានលឿន។ ប៉ុន្តែអ្វីដែលធ្វើឱ្យមនុស្សម្នាក់មានកិត្តិយសជាអ្នកសារព័ត៌មាន គឺការស្វែងរកសេចក្តីពិត ការផ្ទៀងផ្ទាត់អង្គហេតុ ការគោរពក្រមសីលធម៌ និងការទទួលខុសត្រូវចំពោះអ្វីដែលខ្លួនផ្សព្វផ្សាយ។ អ្នកសារព័ត៌មានមិនត្រូវបានវាស់តម្លៃត្រឹមតែតាមអ្វីដែលគាត់អាចផ្សាយបាននោះទេ ប៉ុន្តែត្រូវវាស់តាមអ្វីដែលគាត់បានផ្ទៀងផ្ទាត់ មុននឹងសម្រេចចិត្តផ្សាយ។

លោករដ្ឋមន្ត្រី នេត្រ ភក្ត្រា បានបញ្ជាក់ថា សារព័ត៌មានក្នុងយុគសម័យឌីជីថល៖ អំណាចកាន់តែធំ ការទទួលខុសត្រូវកាន់តែខ្ពស់។ ពិភពព័ត៌មានបានផ្លាស់ប្តូរយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ។ កាលពីមុន ការផ្សព្វផ្សាយព័ត៌មានត្រូវឆ្លងកាត់ដំណាក់កាលជាច្រើន។ អ្នកយកព័ត៌មានត្រូវចុះទៅកន្លែងកើតហេតុ ស្វែងរកប្រភពព័ត៌មាន សរសេរអត្ថបទ បញ្ជូនទៅនិពន្ធនាយក ហើយទើបអាចផ្សព្វផ្សាយតាមកាសែត វិទ្យុ ឬទូរទស្សន៍។ ប៉ុន្តែសព្វថ្ងៃ មនុស្សម្នាក់អាចថតវីដេអូ ហើយផ្សាយផ្ទាល់ទៅកាន់អ្នកទស្សនារាប់ម៉ឺនសែននាក់ ក្នុងរយៈពេលតែប៉ុន្មានវិនាទី។

រដ្ឋមន្ត្រីក្រសួងព័ត៌មាន បានបន្ថែមថា ព័ត៌មានមួយដែលកើតឡើងនៅភូមិមួយ អាចត្រូវបានចែករំលែកទៅទូទាំងប្រទេស ហើយអាចឆ្លងដល់សាធារណជនអន្តរជាតិបានយ៉ាងឆាប់រហ័ស។ នេះជាឱកាសដ៏ធំធេងសម្រាប់ការទទួលបានព័ត៌មាន ការបញ្ចេញមតិ និងការចូលរួមរបស់ប្រជាពលរដ្ឋ។

រដ្ឋមន្ត្រីក្រសួងព័ត៌មាន បានគូសបញ្ជាក់ថា ប៉ុន្តែយើងត្រូវទទួលស្គាល់ថា បច្ចេកវិទ្យាឌីជីថល ក៏បានបង្កើតបញ្ហាប្រឈមថ្មីៗផងដែរ ដែលលោកកត់សម្គាល់នូវបញ្ហាប្រឈមចំនួន៥ ដែលក្នុងនោះរួមមាន៖

*បញ្ហាប្រឈមទី១ គឺល្បឿននៃការផ្សព្វផ្សាយព័ត៌មានលឿនជាងល្បឿននៃការផ្ទៀងផ្ទាត់។
*បញ្ហាប្រឈមទី២ គឺការប្រកួតប្រជែងដើម្បីទាក់ទាញអ្នកមើល និងអ្នកតាមដាន ដែលអាចធ្វើឱ្យអ្នកផលិតព័ត៌មានមួយចំនួនផ្តល់អាទិភាពលើចំណងជើងបំផ្លើស ឬព័ត៌មានរំជើបរំជួល ជាងគុណភាពនៃខ្លឹមសារ។
*បញ្ហាប្រឈមទី៣ គឺការរីកចម្រើននៃបញ្ញាសិប្បនិម្មិត ឬ AI ដែលអាចបង្កើតរូបភាព សំឡេង និងវីដេអូក្លែងក្លាយដែលមើលទៅស្រដៀងនឹងការពិត។
*បញ្ហាប្រឈមទី៤ គឺការលាយឡំគ្នារវាងព័ត៌មាន មតិយោបល់ ការផ្សាយពាណិជ្ជកម្ម និងការផ្សព្វផ្សាយដើម្បីផលប្រយោជន៍ជាក់លាក់។
*បញ្ហាប្រឈមទី៥ គឺការបាត់បង់ការត្រួតពិនិត្យគុណភាពមុនផ្សាយ នៅពេលអ្នកផលិតព័ត៌មានម្នាក់ត្រូវធ្វើតួនាទីជាអ្នកយកព័ត៌មាន អ្នកថត អ្នកកាត់ត និពន្ធនាយក និងអ្នកផ្សព្វផ្សាយក្នុងពេលតែមួយ៕