(កំពង់ធំ)៖ នាព្រឹកថ្ងៃសៅរ៍ ទី២៤ ខែតុលា ឆ្នាំ២០២៦នេះ លោករដ្ឋមន្ត្រី ថោ ជេដ្ឋា សមាជិកគណៈកម្មាធិការកណ្តាលគណបក្សប្រជាជនកម្ពុជា អនុប្រធានក្រុមការងារគណបក្សចុះមូលដ្ឋានខេត្ដកំពង់ធំ និងជាប្រធានក្រុមការងារគណបក្សចុះមូលដ្ឋានស្រុកស្ទោង បានអញ្ជើញជាអធិបតីភាពក្នុងពិធីបោះឆ្នោតស្ទាបស្ទង់ជ្រើសរើសបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំ/សង្កាត់ អាណត្តិទី៦ ឆ្នាំ២០២៧ ក្នុងមូលដ្ឋានឃុំចំណាលើ និងឃុំសំព្រោជ ស្រុកស្ទោង ខេត្តកំពង់ធំ។

ក្រុមការងារគណបក្សចុះមូលដ្ឋានស្រុកស្ទោង និងគណៈកម្មាធិការគណបក្សស្រុក បានរៀបចំកម្មវិធីបោះឆ្នោតស្ទាបស្ទង់ជ្រើសរើសបេក្ខជនក្រុមប្រឹក្សាឃុំអាណតិ្តទី៦ ឆ្នាំ២០២៧ នៅតាមមូលដ្ឋានឃុំទាំង១៣ ចាប់ពីថ្ងៃទី២៤ ដល់ថ្ងៃទី២៨ ខែតុលា ឆ្នាំ២០២៦ ដែលជាផ្នែកមួយនៃការរៀបចំការងារផ្ទៃក្នុងរបស់គណបក្ស ដើម្បីពិនិត្យ និងកំណត់បញ្ជីបេក្ខភាពសម្រាប់ការឈរឈ្មោះបោះឆ្នោត ស្របតាមគោលការណ៍ និងច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ/សង្កាត់។

ក្នុងឱកាសនោះ លោករដ្ឋមន្ត្រី បានថ្លែងនូវការកោតសរសើរ និងវាយតម្លៃខ្ពស់ ចំពោះក្រុមការងារគណបក្ស និងគណៈកម្មាធិការគណបក្សគ្រប់លំដាប់ថ្នាក់ក្នុងមូលដ្ឋានស្រុកស្ទោង ដែលបានខិតខំបំពេញតួនាទី និងភារកិច្ចយ៉ាងល្អនាពេលកន្លងមក រហូតសម្រេចបានសមិទ្ធផលជាច្រើនគួរជាទីមោទនៈ។ ឯកឧត្តមរដ្ឋមន្ត្រី បានជំរុញឱ្យអាជ្ញាធរមូលដ្ឋាន និងមន្ត្រីពាក់ព័ន្ធ បន្តពង្រឹងប្រសិទ្ធភាពនៃការផ្តល់សេវាសាធារណៈ ព្រមទាំងបង្កើនភាពសកម្មក្នុងការដោះស្រាយសំណូមពរ និងតម្រូវការរបស់ប្រជាពលរដ្ឋនៅតាមឃុំសង្កាត់ ឱ្យកាន់តែល្អប្រសើរ និងទាន់ពេលវេលា ដើម្បីឆ្លើយតបនឹងការរំពឹងទុករបស់ប្រជាពលរដ្ឋនៅក្នុងមូលដ្ឋាន។

ជាមួយគ្នានេះ លោករដ្ឋមន្ត្រី ថោ ជេដ្ឋា បានផ្តល់អនុសាសន៍តម្រង់ទិសបន្ថែមដល់ការរៀបចំការបោះឆ្នោតសាកល្បង ដើម្បីស្ទាបស្ទង់មតិនៅតាមឃុំនីមួយៗ ធ្វើយ៉ាងណាឱ្យដំណើរការនៃការរៀបចំការបោះឆ្នោតនោះដំណើរការទៅដោយរលូន និងមានសុក្រឹតភាព និងបានណែនាំដល់ក្រុមការងារដើម្បីជំរុញដល់បងប្អូនពលរដ្ឋនៅក្នុងមូលដ្ឋានឱ្យទៅពិនិត្យបញ្ជីឈ្មោះ ចុះឈ្មោះបោះឆ្នោត និងធ្វើជីវមាត្រឱ្យបានគ្រប់ៗគ្នា ដើម្បីប្រាកដថាខ្លួនមានឈ្មោះក្នុងបញ្ជីឈ្មោះបោះឆ្នោតពិតប្រាកដសម្រាប់បោះឆ្នោតជ្រើសរើសក្រុមប្រឹក្សាឃុំ/សង្កាត់ នាថ្ងៃអាទិត្យ ទី៦ ខែមិថុនា ឆ្នាំ២០២៧ ខាងមុខ៕