(ភ្នំពេញ)៖ មន្ទីរពេទ្យជ័យវរ្ម័នទី៧ (គន្ធបុប្ផាសៀមរាប) បានចេញសេចក្តីប្រកាស ពីការមិនអាចទទួលយកបាននូវពាក្យសំដី របស់ លោកស្រីម្ចាស់ TikTok ឈ្មោះ Mommynest ដែលបានជេរប្រមាថ ចោទប្រកាន់ និងបរិហារកេរ្តិ៍ មកលើក្រុមគ្រូពេទ្យប្រចាំការវេនយប់ កាលពីថ្ងៃអាទិត្យ ទី១៨ ខែតុលា ឆ្នាំ២០២៦ វេលាម៉ោង ១១៖៤០យប់ ថាជា៖ «ឃាតករលាក់មុខ» និង «បានបង្ហោះវីដេអូ បង្ហូចកេរ្តិ៍ឈ្មោះមន្ទីរពេទ្យគន្ធបុប្ផា ជាសាធារណៈ»។

តាមសេចក្តីប្រកាសរបស់មន្ទីរពេទ្យបានបញ្ជាក់ទៀតថា «ដោយលោកស្រីមានចេតនាចាប់កំហុសគ្រូពេទ្យយើងខ្ញុំដែលកំពុងពិនិត្យព្យាបាលជាមួយក្រុមគ្រួសារអ្នកជំងឺផ្សេងៗទៀត ដោយគ្មានការពាក់ព័ន្ធនឹងករណីកូនរបស់លោកស្រីឡើយ។ មិនត្រឹមតែប៉ុណ្ណោះក្រុមគ្រូពេទ្យ បានទទួលពិនិត្យព្យាបាលកូនរបស់លោកស្រី តាមបច្ចេកទេសត្រឹមត្រូវ ដោយបានបើកថ្នាំ និងពន្យល់ពីការប្រើប្រាស់ ហើយបានត្រឡប់ទៅផ្ទះវិញនៅយប់នោះ។ ដោយឡែកគ្រួសារអ្នកជំងឺផ្សេងៗទៀតដែលបានពិនិត្យជំងឺមកក្នុងពេលតែមួយ ពួកគាត់មិនមានអ្វីដែលមិនពេញចិត្តចំពោះពួកយើងខ្ញុំឡើយ ផ្ទុយទៅវិញ គេមានតែការសប្បាយចិត្តដែលបានទទួលការពិនិត្យ
ព្យាបាលប្រកបដោយវិជ្ជាជីវៈត្រឹមត្រូវដល់កូនរបស់ពួកគាត់។

អាស្រ័យហេតុដូចនេះ មន្ទីរពេទ្យជ័យវរ្ម័នទី៧(គន្ធបុប្ផាសៀមរាប) តម្រូវឲ្យលោកស្រីម្ចាស់ TikTok Mommynest រូបនេះ សុំទោសដល់មន្ទីរពេទ្យ ដែលប្រជាពលរដ្ឋទូទាំងប្រទេសឲ្យតម្លៃខ្ពស់បំផុត នៅចំពោះមុខសាធារណៈ និងលុបវីដេអូដែលបានបរិហារកេរ្តិ៍គ្រូពេទ្យម្នាក់របស់មន្ទីរពេទ្យដែលនាំឲ្យប៉ះពាល់ដល់កេរ្តិ៍ឈ្មោះមន្ទីរពេទ្យទាំងមូល»។

មន្ទីរពេទ្យបានបញ្ជាក់ប្រាប់បណ្តាញព័ត៌មាន Fresh News នៅព្រឹកថ្ងៃ២៦ ខែតុលា ឆ្នាំ២០២៦បន្ថែមទៀតថា «ក្រោយមន្ទីរពេទ្យជ័យវរ្ម័នទី៧ ចេញសេចក្តីប្រកាស លោកស្រីម្ចាស់ TikTok ឈ្មោះ Mommynest ក៏បានសុំទោសជាដល់មន្ទីរពេទ្យរួចរាល់»។

សូមជម្រាបថានៅមន្ទីរពេទ្យសាធារណៈទូទាំងប្រទេស រួមទាំងមន្ទីរពេទ្យជ័យវរ្ម័នទី៧ គឺមានប្រអប់ស្ទង់មតិ និង QR Code សម្រាប់ ស្កែន ស្តីពីការពេញចិត្តរបស់អ្នកជំងឺ/ក្រុមគ្រួសារអ្នកជំងឺ និងអតិថិជន ដើម្បីទទួលយកនូវមតិរិះគន់ដើម្បីស្ថាបនាពីសាធារណៈជន នូវចំនុចខ្វះខាត របស់មន្ទីរពេទ្យ៕