អ្នកតាមដាននយោបាយ៖ វត្តមានមេដឹកនាំជាង ៩០ប្រទេស ក្នុងកិច្ចប្រជុំកំពូលហ្វ្រង់កូហ្វូនី បង្ហាញពីការទូតពហុប៉ូល និងតុល្យភាពអំណាចដ៏វៃឆ្លាតរបស់កម្ពុជា
26-10-2026 19:00
(ភ្នំពេញ)៖ វត្តមាននៃបណ្ដាថ្នាក់ដឹកនាំកំពូលមកពីជាង ៩០ ប្រទេសជុំវិញពិភពលោក ដែលនឹងមកជួបជុំគ្នានៅរាជធានីភ្នំពេញ នាពាក់កណ្ដាលខែវិច្ឆិកា ឆ្នាំ២០២៦ ខាងមុខ ត្រូវបានអ្នកតាមដានស្ថានភាពនយោបាយកម្ពុជា លោក យឿន យឿត មើលឃើញថា គឺជាការបង្ហាញឱ្យឃើញយ៉ាងច្បាស់នូវគោលនយោបាយការទូតពហុប៉ូល និងតុល្យភាពអំណាចដ៏វៃឆ្លាតរបស់ថ្នាក់ដឹកនាំកំពូលកម្ពុជា ព្រមទាំងឆ្លុះបញ្ចាំងពីការប្រែក្លាយរបស់កម្ពុជាពីអតីតប្រទេសរងគ្រោះដោយសារសង្គ្រាម មកជាប្រទេសនាំសារសន្តិភាពទៅកាន់ពិភពលោក។
លោក យឿន យឿត បានគូសបញ្ជាក់ថា ការធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ (20th Francophonie Summit) មិនត្រឹមតែជាមោទនភាពដ៏ធំធេងសម្រាប់ជាតិប៉ុណ្ណោះទេ ប៉ុន្តែថែមទាំងមានឥទ្ធិពលយុទ្ធសាស្ត្រយ៉ាងជ្រាលជ្រៅចំពោះតំបន់អាស៊ាន និងកម្រិតពិភពលោក តាមរយៈការបង្ហាញឱ្យឃើញពីសមត្ថភាព និងការដឹកនាំប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
អ្នកតាមដានស្ថានភាពនយោបាយរូបនេះ បានលើកឡើងបន្ថែមថា កិច្ចប្រជុំកំពូលជាប្រវត្តិសាស្ត្រនេះ មានគោលដៅយុទ្ធសាស្ត្រធំៗចំនួនពីរ រួមមាន៖
ទី១. ចំពោះតំបន់អាស៊ាន (កម្ពុជាជាច្រកទ្វារមាសសេដ្ឋកិច្ច)៖ កម្ពុជាកំពុងដើរតួជាច្រកទ្វារមាសប្រកបដោយយុទ្ធសាស្ត្រ ក្នុងការតភ្ជាប់កម្លាំងសេដ្ឋកិច្ចពីប្លុកប្រទេសនិយាយភាសាបារាំង ដែលមានសមាជិកជាង ៩០ ប្រទេស មកកាន់ទីផ្សារអាស៊ានទាំងមូល តាមរយៈវេទិកាធុរកិច្ចធំៗ។ ព្រឹត្តិការណ៍នេះ នឹងបង្ហាញឱ្យពិភពលោកមើលឃើញថា អាស៊ានជាតំបន់ដែលមានសក្ដានុពលសេដ្ឋកិច្ចខ្ពស់បំផុត ខណៈកម្ពុជាក៏ជាចំណុចកណ្តាលក្នុងការទាក់ទាញទុនវិនិយោគពីអឺរ៉ុប លើវិស័យបច្ចេកវិទ្យា ហេដ្ឋារចនាសម្ព័ន្ធ និងថាមពលបៃតងជាដើម។
ទី២. ចំពោះឆាកអន្តរជាតិ (ជ័យជម្នះនៃពហុភាគីនិយម និងឥទ្ធិពលទន់)៖ ក្នុងបរិបទដែលពិភពលោកកំពុងមានការប្រកួតប្រជែងភូមិសាស្ត្រនយោបាយយ៉ាងស្រួចស្រាវ ការជួបជុំគ្នានៃមេដឹកនាំពិភពលោកនៅរាជធានីភ្នំពេញ គឺជាជ័យជម្នះនៃពហុភាគីនិយម និងការកសាងសន្តិភាព។ នេះជាការបង្ហាញពីនយោបាយការទូតពហុប៉ូល និងតុល្យភាពអំណាចដ៏ឈ្លាសវៃរបស់ថ្នាក់ដឹកនាំកម្ពុជា ដោយបានផ្លាស់ប្តូរមុខមាត់ពីប្រទេសធ្លាប់រងទុក្ខដោយសារសង្គ្រាម មកជាអ្នកនាំសារសន្តិភាព និងស្ថិរភាពនយោបាយស្របតាមប្រធានបទស្នូលនៃកិច្ចប្រជុំ ព្រមទាំងបង្កើនឥទ្ធិពលទន់ (Soft Power) របស់កម្ពុជា និងការចូលរួមចំណែកដោះស្រាយវិបត្តិសកល។
សរុបមក លោក យឿន យឿត បានសង្កត់ធ្ងន់ថា កិច្ចប្រជុំកំពូលនេះ នឹងរុញច្រានឱ្យកម្ពុជាក្លាយជាតួអង្គការទូត និងសេដ្ឋកិច្ចដ៏រឹងមាំមិនអាចខ្វះបាន ទាំងក្នុងតំបន់អាស៊ាន និងលើឆាកអន្តរជាតិ។ ការធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកនេះ មិនមែនគ្រាន់តែជាព្រឹត្តិការណ៍ការទូតធម្មតានោះឡើយ គឺជារបត់យុទ្ធសាស្ត្រថ្មីមួយរបស់កម្ពុជា ក្នុងការបង្ហាញនូវមោទនភាពជាតិ ស្ថិរភាពនយោបាយ និងសក្ដានុពលសេដ្ឋកិច្ចដ៏រឹងមាំទៅកាន់ពិភពលោក៕
