លោក ប៉ិច សុខា ជំរុញការកសាងធនធានមនុស្ស លើការងារវាយតម្លៃផលប៉ះពាល់ នៃលិខិតបទដ្ឋានគតិយុត្ត ដើម្បីគុណភាពច្បាប់នៅកម្ពុជា
26-10-2026 21:14
(ភ្នំពេញ)៖ លោក ប៉ិច សុខា អនុរដ្ឋលេខាធិការទីស្តីការគណៈរដ្ឋមន្ត្រី អគ្គលេខាធិការក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ និងជានាយកគម្រោងវាយតម្លៃផលប៉ះពាល់នៃលិខិតបទដ្ឋានគតិយុត្ត (RIA) បានជំរុញការកសាងធនធានមនុស្សលើការងារវាយតម្លៃផលប៉ះពាល់នៃលិខិតបទដ្ឋានគតិយុត្ត ដើម្បីគុណភាពច្បាប់នៅកម្ពុជា។
នៅព្រឹកថ្ងៃចន្ទ ទី២៦ ខែតុលា ឆ្នាំ២០២៦ ទីស្តីការគណៈរដ្ឋមន្ត្រី ក្រោមការឧបត្ថម្ភពីធនាគារអភិវឌ្ឍន៍អាស៊ី (ADB) និងស្ថានទូតព្រីតថេនប្រចាំនៅកម្ពុជា បានបើកវគ្គបណ្តុះបណ្តាលគ្រូបង្គោល ស្តីពីការវាយតម្លៃផលប៉ះពាល់នៃលិខិតបទដ្ឋានគតិយុត្ត។
ថ្លែងនៅក្នុងពិធីនេះ លោក ប៉ិច សុខា បានថ្លែងអំណរគុណធនាគារអភិវឌ្ឍន៍អាស៊ី ព្រមទាំងចក្រភពអង់គ្លេស ដែលបានសហការរៀបចំវគ្គបណ្តុះបណ្តាលគ្រូបង្គោលលើការងារ RIA ដើម្បីកសាងធនធានមនុស្សកម្ពុជាឱ្យមានសមត្ថភាពបន្ថែមទៀត ក្នុងការបង្រៀនការងារ RIA ដល់ក្រសួងស្ថាប័នពាក់ព័ន្ធ។
RIA គឺជាឧបករណ៍សំខាន់សម្រាប់រៀបចំគោលនយោបាយ និងលិខិតបទដ្ឋានគតិយុត្ត ដោយផ្អែកលើភស្តុតាង។ RIA អាចជួយកំណត់បញ្ហា វិភាគជម្រើស វាយតម្លៃផលប៉ះពាល់ និងជ្រើសរើសដំណោះស្រាយដែលផ្តល់ផលប្រយោជន៍ខ្ពស់ដល់សង្គម។
លោក ប៉ិច សុខា បានគូសបញ្ជាក់ថា កម្ពុជា បានដើរដល់បង្គោលចរមួយក្នុងការពង្រឹងការអនុវត្ត RIA ឱ្យមានគុណភាពបន្ថែមទៀត។ ដូច្នេះវគ្គបណ្តុះបណ្តាលនេះ មិនត្រឹមតែផ្តល់ចំណេះដឹងបច្ចេកទេសបន្ថែមប៉ុណ្ណោះទេ ប៉ុន្តែផ្តោតសំខាន់លើការអភិវឌ្ឍសមត្ថភាពដើម្បីក្លាយជាគ្រូបង្គោល អាចបង្រៀន និងការផ្ទេរចំណេះដឹងទៅដល់អ្នកដទៃប្រកបដោយប្រសិទ្ធភាព។
លោក ប៉ិច សុខា បានសង្កត់ធ្ងន់ថា «គោលបំណងរបស់យើង មិនមែនដើម្បីបង្កើតលិខិតបទដ្ឋានគតិយុត្ត ឱ្យបានកាន់តែច្រើននោះទេ ប៉ុន្តែដើម្បីរៀបចំលិខិតបទដ្ឋានគតិយុត្តឱ្យកាន់តែមានគុណភាពខ្ពស់»។
ក្នុងឱកាសនោះ លោក ប៉ិច សុខា បានសំណូមពរដល់សិក្ខាកាមទាំងអស់ ចូលរួមសិក្សាឱ្យបានទៀងទាត់ និងចូលរួមអនុវត្តលំហាត់ឱ្យបានពេញលេញ ព្រោះថាភាពជោគជ័យនៃវគ្គបណ្តុះបណ្តាលនេះ មិនត្រូវវាស់វែងត្រឹមចំនួនសិក្ខាកាម ឬវិញ្ញាបនបត្រនោះទេ ប៉ុន្តែត្រូវវាស់វែងអំពីសមត្ថភាពជាក់ស្តែងរបស់បុគ្គលម្នាក់ៗ បន្ទាប់ពីវគ្គបណ្តុះបណ្តាលនេះ
តើមានសមត្ថភាពប៉ុណ្ណាក្នុងការទៅបណ្តុះបណ្តាលអ្នកដទៃដែរទេ?
ក្នុងឱកាសនោះ លោក ប៉ិច សុខា បានបង្ហាញមានសុទិដ្ឋិនិយមថា កម្ពុជា នឹងមានសមត្ថភាពគ្រប់គ្រាន់ក្នុងការលើកកម្ពស់ការងារ RIA និង GRP ឱ្យបានមានល្បឿនបន្ថែមទៀត ដើម្បីធានាឱ្យគោលនយោបាយ ច្បាប់ និងលិខិតបទដ្ឋានគតិយុត្តផ្សេងទៀតក្នុងប្រទេស មានសង្គតិភាព កាត់បន្ថយការជាន់សមត្ថកិច្ចគ្នា កាត់បន្ថយបន្ទុកចំណាយមិនចាំបាច់ លើកកម្ពស់ការប្រកួតប្រជែង បង្កើនប្រសិទ្ធភាព អាចជឿជាក់បាន និងសមធម៌ ស្របតាមបរិបទប្រទេសកម្ពុជា និងឧត្តមានុវត្តន៍អន្តរជាតិ ដើម្បីចូលរួមសម្រេចចក្ខុវិស័យកម្ពុជាឆ្នាំ២០៥០៕
