លោក រ័ត្ន ស្រ៊ាង ព្រមជាមួយក្រុមអតីតមិត្តភក្តិរួមជំនាន់សាលាបាក់ទូកនាទសវត្សឆ្នាំ១៩៨០ រួមគ្នាជួយរៀបចំពិធីជួបជុំសម្តែងកតញ្ញូតាធម៌ចំពោះអតីតលោកគ្រូ-អ្នកគ្រូ យ៉ាងកក់ក្តៅ!
27-10-2026 09:17
(ភ្នំពេញ)៖ ស្មារតីដឹងគុណ និងកតញ្ញូតាធម៌ ដែលជាតម្លៃវប្បធម៌ដ៏ប្រពៃថ្លៃថ្លារបស់ជនជាតិខ្មែរ ត្រូវបានស្តែងចេញយ៉ាងច្បាស់នៅក្នុងពិធីជួបជុំដ៏មានអត្ថន័យមួយ រវាងអតីតសិស្សានុសិស្ស និងលោកគ្រូ អ្នកគ្រូ នៃវិទ្យាល័យបាក់ទូក (ជំនាន់ឆ្នាំ ១៩៨០-១៩៨៨)។ ពិធីជួបជុំពិសាអាហារដ៏កក់ក្តៅនេះ បានប្រព្រឹត្តទៅនាពេលព្រឹក ថ្ងៃអាទិត្យ ទី២៥ ខែតុលា ឆ្នាំ២០២៦ នេះ នៅសណ្ឋាគារ Shangri-La រាជធានីភ្នំពេញ ក្រោមការរៀបចំរបស់ ឯកឧត្តម រ័ត្ន ស្រ៊ាង ព្រមជាមួយក្រុមអតីតមិត្តភក្តិរួមជំនាន់សាលាបាក់ទូកនាទសវត្សឆ្នាំ១៩៨០ បានគោរពអញ្ជើញអតីតលោកគ្រូ អ្នកគ្រូ ដ៏មានព្រហ្មវិហារធម៌ចំនួន ៣០នាក់ និងមានការចូលរួមពី ឯកឧត្តម គី តិច, ឯកឧត្តម ដួង អេលីត, ឯកឧត្តម ទូច ស៊ុនណារី, ឯកឧត្តម ឃាង សេង ព្រមទាំងមិត្តភក្តិអតីតសិស្សរួមជំនាន់យ៉ាងច្រើនកុះករមកចូលរួមប្រកបដោយភាពស្និទ្ធស្នាល និងរីករាយ។
ការជួបជុំគ្នានៅថ្ងៃនេះ មិនត្រឹមតែជាការរំលឹកឡើងវិញនូវអនុស្សាវរីយ៍ និងចំណងមិត្តភាពដ៏ល្អបរិសុទ្ធកាលពីវ័យកុមារនៅក្នុងបរិវេណវិទ្យាល័យបាក់ទូកប៉ុណ្ណោះទេ ប៉ុន្តែថែមទាំងជាឱកាសដ៏មានតម្លៃក្នុងការបង្ហាញពីទឹកចិត្តគោរព ដឹងគុណ និងកតញ្ញូតាធម៌យ៉ាងជ្រាលជ្រៅបំផុត ចំពោះគុណូបការៈដ៏ធំធេងរបស់លោកគ្រូ អ្នកគ្រូ ដែលធ្លាប់បានខិតខំប្រឹងប្រែងលះបង់ អប់រំទូន្មាន និងបង្ហាត់បង្ហាញចំណេះវិជ្ជាដល់សិស្សានុសិស្ស រហូតទទួលបានជោគជ័យក្នុងជីវិត និងការងាររៀងៗខ្លួននាពេលបច្ចុប្បន្ន។
ក្នុងរយៈកាលកន្លងមក គេតែងសង្កេតឃើញអតីតមិត្តរួមជំនាន់នៃសាលាបាក់ទូកមួយក្រុម ដែលផ្តួចផ្តើមចងក្រងឡើងដោយ ឯកឧត្តម រ័ត្ន ស្រ៊ាង តែងបង្ហាញនូវសកម្មភាពទំនាក់ទំនងគ្នាយ៉ាងជិតស្និទ្ធ និងចែករំលែកធនធានជួយទុក្ខធុរៈ អតីតលោកគ្រូអ្នកគ្រូ មិនដែលមានខាន ព្រមទាំងជួយដល់មិត្តដែលជួបការលំបាកនិងខ្វះលទ្ធភាពគ្រប់ៗគ្នា។ សកម្មភាពយកចិត្តទុកដាក់ និងចែករំលែកធនធានជួយដល់អតីតលោកគ្រូអ្នកគ្រូ និងមិត្តដែលមានអាសន្នទាំងនេះ គឺជាមនោសញ្ចេតនា និងជាគោលការណ៍ក្នុងក្រុម ស្របតាមពាក្យស្លោកដែលពួកគាត់បានរួមគ្នាបង្កើតឡើងថា «សាមគ្គីមិត្តភាព បង្កើតចិត្តរមនា ចែករំលែកជួយគ្នា គ្រប់គ្រាលំបាក»៕
