គណៈកម្មាធិការត្រួតពិនិត្យផលិតផលហាឡាលកម្ពុជា ផ្សព្វផ្សាយ និងសម្របសម្រួលការចុះបញ្ជីវិញ្ញាបនបត្រ បញ្ជាក់បច្ចេកទេសស្តង់ដាផលិតផលហាឡាល នៅខេត្តសៀមរាប
27-10-2026 16:03
(សៀមរាប)៖ គណៈកម្មាធិការត្រួតពិនិត្យផលិតផលហាឡាលកម្ពុជា នៅថ្ងៃទី២៧ ខែតុលា ឆ្នាំ២០២៦នេះ បានបើកយុទ្ធនាការផ្សព្វផ្សាយ និងសម្របសម្រួលការចុះបញ្ជីវិញ្ញាបនបត្រ បញ្ជាក់បច្ចេកទេសស្តង់ដាផលិតផល ហាឡាលកម្ពុជា ក្រោមវត្តមានរបស់លោក កៅ អ៉ីមរ៉ន រដ្ឋលេខាធិការនៃក្រសួងព័ត៌មាន និងជា សមាជិកគណៈកម្មាធិការត្រួតពិនិត្យផលិតផលហាឡាលកម្ពុជា «គ.ត.ផ.ហ.ក.» និងលោក អ៉ឹង គឹមលាង អភិបាលរងខេត្តសៀមរាប។
ថ្លែងក្នុងឱកាសនោះ លោក កៅ អ៉ីមរ៉ន បានលើកឡើងថា យុទ្ធនាការនេះ គឺជាគំនិតផ្តួចផ្តើមរបស់គណៈកម្មាធិការត្រួតពិនិត្យផលិតផលហាឡាលកម្ពុជា និងក្រសួងពាណិជ្ជកម្ម ក្នុងកិច្ចខិតខំផ្សព្វផ្សាយ និងសម្របសម្រួលការចុះបញ្ជីវិញ្ញាបនបត្របញ្ជាក់ បច្ចេកទេសស្តង់ដាផលិតផលហាឡាលកម្ពុជា ដែលនឹងចូលរួមជាសារវន្ត ក្នុងការលើកកម្ពស់ និងបង្កើនតម្លៃបន្ថែមដល់ផលិតផលក្នុងស្រុក។
លោកបានបន្តថា ការជំរុញការចុះបញ្ជីផលិតផលហាឡាល មិនមែនជាការបង្កើនបន្ទុកដល់ក្រុមហ៊ុន សហគ្រាស សិប្បកម្ម អាជីវកម្មនោះទេ។ ផ្ទុយទៅវិញ ជាការចូលរួមជំរុញការបង្កើនតម្លៃបន្ថែម និងការជឿទុកចិត្តមកលើសេវាកម្ម និងផលិតផលក្នុងស្រុក ដោយមានការបញ្ជាក់បច្ចេកទេសស្ត ង់ដាផលិតផលហាឡាលកម្ពុជា លើអនុលោមភាព អនាម័យ គុណភាព និងស្តង់ដា អនុលោមតាមគោលការណ៍សុវត្ថិភាពម្ហូបអាហារ និងលក្ខណ្ឌម្រូវតាមសាសនាឥស្លាម។
លោកបញ្ជាក់ថា ជាការកត់សម្គាល់ ការចុះបញ្ជីផលិតផលហាឡាលកម្ពុជា មានចំនួនកើនឡើងជាបន្តបន្ទាប់ពោល គឺក្នុងរយៈពេល ៥ឆ្នាំចុងក្រោយនេះ ចំនួនវិញ្ញាបនបត្របញ្ជាក់បច្ចេកទេសស្តង់ដាផលិតផលហាឡាលកម្ពុជា កើនឡើងជាមធ្យមប្រហែល ១៦% ក្នុង១ឆ្នាំ។
លោកបន្តថា ក្នុងរយៈពេល៩ខែ ឆ្នាំ២០២៦ នាយកដ្ឋានកិច្ចការហាឡាល ដែលជាលេខាធិការដ្ឋាននៃ គ.ត.ផ.ហ.ក. បានចេញវិញ្ញាបនបត្របញ្ជាក់ បច្ចេកទេសស្តង់ដាផលិតផលហាឡាលកម្ពុជា ចំនួន ១២១ វិញ្ញាបនបត្រ និងមានផលិតផល ចំនួន ៩១៩ ផលិតផល មានដូចជា៖ ម្ហូបអាហារ ភេសជ្ជៈ ភោជនីយដ្ឋាន អាហារដ្ឋាន គ្រឿងសម្អាង និងសត្តឃាតដ្ឋាន។
លោក កៅ អ៉ីមរ៉ន សង្ឃឹមថា យុទ្ធនាការនាថ្ងៃនេះ គឺជាឱកាសដ៏ល្អមួយ ដើម្បីស្វែងយល់ និងធ្វើការរួមគ្នាជំរុញលើកកម្ពស់កិច្ចការហាឡាលកម្ពុជា និងចូលរួមផ្សព្វផ្សាយបន្តទៅដល់ភាគីពាក់ព័ន្ធ ដែលមានបំណងចង់ដាក់ពាក្យស្នើសុំ វិញ្ញាបនបត្របញ្ជាក់បច្ចេកទេសស្តង់ដាផលិតផលហាឡាលកម្ពុជា ជាពិសេស ការចូលរួមក្នុងវគ្គសំណួរ-ចម្លើយ ឱ្យបានផុលផុស ដើម្បីអាចទទួលបាននូវការយល់ដឹងបន្ថែម និងជម្រះនូវមន្ទិលនានា ក្នុងការអនុវត្តជាក់ស្តែង។
លោក អ៉ឹង គឹមលាង បានលើកឡើងថា ស្លាកសញ្ញា «ហាឡាល» (Halal Logo) គឺជាសញ្ញាសម្គាល់ផ្លូវការដែលបិទ ឬបោះពុម្ពលើផលិតផល ម្ហូបអាហារ ភេសជ្ជៈ វត្ថុធាតុដើម ឬសេវាកម្មផ្សេងៗ ដែលបញ្ជាក់ថាផលិតផលទាំងនោះ «អនុញ្ញាត ឬត្រឹមត្រូវស្របតាមច្បាប់ និងគោលការណ៍នៃសាសនាឥស្លាម» ហើយជនជាតិមូស្លីមអាចបរិភោគ ឬប្រើប្រាស់បានដោយសុវត្ថិភាព និងភាពស្ងប់ចិត្ត។
លោកបានបន្តថា ការប្រើប្រាស់ស្លាកសញ្ញាហាឡាល មានអត្ថប្រយោជន៍ជាច្រើន រួមមាន៖ បង្កើននូវតម្រូវការ និងការប្រើប្រាស់ផលិតផលច្រើនឡើង ព្រមទាំង ការដោះដូរពាណិជ្ជកម្មក៏កាន់តែសកម្ម និងកើនឡើងតាមរយៈទំនុកចិត្តលើផលិតផលចំពោះអ្នកប្រើប្រាស់ ដែលជាសាសនិកឥស្លាមក្នុងប្រទេសក្នុងតំបន់(អាស៊ាន) និងពិភពលោក។
សូមជម្រាបថា គោលបំណងនៃយុទ្ធនាការនេះ គឺដើម្បីឱ្យសាធារណជន ម្ចាស់អាជីវកម្ម និងសហគ្រាសបានយល់ដឹងពីការកែសម្រួលនីតិវិធីថ្មីៗ ដែលផ្ដល់ភាពងាយស្រួលជាងមុន ដូចជាការបង្រួមពេលវេលាចុះបញ្ជីមកត្រឹម ៦០ថ្ងៃ, ការពង្រីកសុពលភាពវិញ្ញាបនបត្រដល់ ២ឆ្នាំ និងការអនុញ្ញាតឱ្យរូបវន្តបុគ្គលអាចស្នើសុំចុះបញ្ជីបាន ព្រមទាំងជួយបង្កើនការបញ្ជ្រាបការយល់ដឹង ដើម្បីផ្សព្វផ្សាយដល់សង្គម និងធុរជនឱ្យយល់ដឹងកាន់តែស៊ីជម្រៅអំពី កិច្ចការហាឡាល និងអត្ថប្រយោជន៍សេដ្ឋកិច្ច នៃការប្រើប្រាស់ស្លាកសញ្ញា «ហាឡាលកម្ពុជា» ក្នុងការជួយពង្រីកទីផ្សារទាំងក្នុង និងក្រៅប្រទេស៕
