(ភ្នំពេញ)៖ ប្រជាពលរដ្ឋរស់នៅជាប់របងអាកាសយានដ្ឋានអន្ដរជាតិភ្នំពេញ បានសម្ដែងការរំភើបរីករាយយ៉ាងខ្លាំងដោយមិននឹកស្មានដល់ថា ខ្លួនទទួលបានបណ្ណកម្មសិទ្ធិស្របច្បាប់ បានថ្លែងអំណរគុណយ៉ាងជ្រាលជ្រៅបំផុត ជូនចំពោះសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោក ឃួង ស្រេង អភិបាលរាជធានីភ្នំពេញ ដែលបានប្រគល់ដីកម្មសិទ្ធិស្របច្បាប់នេះ ជូនពួកគាត់។

ប្រជាពលរដ្ឋរស់នៅភូមិចំនួន១០ នៅខណ្ឌពោធិសែនជ័យរាជធានីភ្នំពេញ ក្នុងឱកាសពិធីចែកវិញ្ញាបនបត្រសម្គាល់ម្ចាស់អចលនវត្ថុ ដល់ប្រជាពលរដ្ឋក្រោមអធិបតីភាពលោក ឃួង ស្រេង អភិបាលរាជធានីភ្នំពេញ កាលពីថ្ងៃ២៦ ខែតុលា ឆ្នាំ២០២៦ នៅទីតាំងតំបន់ឆ្កៀលជុំវិញ ព្រលានអាកាសយានដ្ឋានភ្នំពេញ ស្ថិតក្នុងភូមិព្រៃទា១ ភូមិព្រៃទា២ និងភូមិព្រៃជីសាក់ សង្កាត់ចោមចៅទី៣ ភូមិជ្រៃកោង ភូមិចោមចៅ២ ភូមិថ្មគោល១ ភូមិថ្មគោល២ ភូមិព្រៃព្រីងខាងត្បូង១ និងភូមិថ្មគោល៣ សង្កាត់ចោមចៅទី២ ភូមិត្រពាំងល្វា២ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។

លោក ភួង សុធា នៅភូមិព្រៃទា២ ទើបទទួលបានបណ្ណកម្មសិទ្ធិស្របច្បាប់ បានបង្ហាញអារម្មណ៍សប្បាយរីករាយ ដោយសារខ្លួនបានទទួលប្លង់កម្មសិទ្ធិ បន្ទាប់ពីទន្ទឹងរងចាំជាយូរឆ្នាំ និងមិននឹកស្មានថា ទទួលបានប្លង់កម្មសិទ្ធិកាន់កាប់ ព្រោះដីរបស់ខ្លួនជាប់អាកាសយានដ្ឋានអន្តរជាតិភ្នំពេញ ដែលជាដីមិនអាចចេញប្លង់បាន។ លោកបានបញ្ជាក់ថា ប្លង់កម្មសិទ្ធិនេះ នឹងជួយលោកនិងក្រុមគ្រួសារបានច្រើន ដោយសារអាចយកទៅធ្វើជាទ្រព្យបញ្ចាំ សម្រាប់ខ្ជីធនាគារ យកប្រាក់ធ្វើដើមទុនរកស៊ី និងជួយលុបបំបាត់ទំនាស់ដីធ្លីផងដែរ។

បន្ថែមលើនេះ ក្នុងនាមលោក ភួង សុធា ជាប្រជាពលរដ្ឋភូមិព្រៃទា២ បានថ្លែងអំណរគុណ សម្តេចតេជោ និងសម្តេចធិបតីនាយករដ្ឋមន្ត្រី ក៏ដូចជាលោក ឃួង ស្រេង អភិបាលរាជធានីភ្នំពេញ ដែលបានជួយសម្របសម្រួល ចេញបណ្ណកម្មសិទ្ធិស្របច្បាប់ជូនដល់ប្រជាជន ដែលបានបង្កភាពងាយស្រួលដល់ប្រជាពលរដ្ឋទាំងអស់គ្នា។

ប្រជាពលរដ្ឋឈ្មោះ លោក លឹម ជាផេង រស់នៅភូមិថ្មគោ១ បានឱ្យដឹងថា ការទទួលបណ្ណប្លងកម្មសិទ្ធិអចលនវត្ថុនាឱកាសនេះ នឹងផ្តល់អត្ថប្រយោជន៍ជាច្រើន ដល់ខ្លួន និងក្រុមគ្រួសារ ដូចជាធ្វើជាទ្រព្យបញ្ចាំ ដើម្បីបានជាដើមទុនរកស៊ី មួយវិញទៀតប្លង់កម្មសិទ្ធិនេះ ធ្វើឱ្យមានភាពកក់ក្តៅខ្ពស់ ព្រោះបញ្ជាក់ថា ជារបស់ខ្លួនពិតប្រាកដ។

លោក លឹម ជាផេង បានថ្លែងអំណរគុណរាជរដ្ឋាភិបាល ដែលមានសម្តេចតេជោ និងសម្តេចធិបតី ហ៊ុន ម៉ាណែត ដែលបានគិតគូរផ្តល់ប្លង់កម្មសិទ្ធិ ជូនពលរដ្ឋរស់នៅក្បែររបងអាកាសយានដ្ឋានអន្តរជាតិភ្នំពេញ និងថ្លែងអំណរគុណលោក ឃួង ស្រេង អភិបាលរាជធានីភ្នំពេញ ព្រមទាំងអាជ្ញាធរគ្រប់លំដាប់ថ្នាក់ ក្នុងការសម្របសម្រួលកិច្ចការនេះ សម្រេចបាននាឱកាសនេះ។

ចំណែកអ៊ុំស្រី អ៊ុង សាម៉េ មកពីភូមិព្រៃទា១ សង្កាត់ចោមចៅទី៣ បានបង្ហាញអារម្មណ៍សប្បាយរីករាយជាខ្លាំង និងបានថ្លែងអំណរគុណសម្តេចទាំងទ្វេ ដែលបានគិតគូរដល់ប្រជាជន ជាពិសេសអ្នករស់នៅក្បែររបងអតីតអាកាសយានដ្ឋានអន្តរជាតិភ្នំពេញ តាមរយៈការផ្តល់បណ្ណកម្មសិទ្ធិសម្គាល់អចលនវត្ថុនាឱកាសនេះ។ អ៊ុំស្រី បានបញ្ជាក់ថា បណ្ណកម្មសិទ្ធិនេះ នឹងជួយដោះស្រាយបញ្ហារបស់ខ្លួន បានក្នុងគ្រាមានអាសន្នណាមួយ ឬពេលទាល់ថវិកាម្តងៗ។

ប្រជាពលរដ្ឋបានបន្តថា ពួកគាត់ពិតជារីករាយណាស់ ដែលទទួលបានបណ្ណកម្មសិទ្ធិស្របច្បាប់នេះ។ ពួកគាត់សូមថ្លែងអំណរអរគុណយ៉ាងជ្រាលជ្រៅបំផុត ចំពោះសម្ដេចអគ្គមហាសេនាបតីតេជោ ហ៊ុន សែន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោក ឃួង ស្រេង អភិបាលរាជធានីភ្នំពេញ ដែលបានសម្រេចប្រគល់ដីកម្មសិទ្ធិស្របច្បាប់នេះ ជូនពួកគាត់៕