(ពោធិ៍សាត់)៖ ឃុំកញ្ជរ ដែលជាឃុំមួយក្នុងចំណោមឃុំទាំង ៨ នៃស្រុកកណ្ដៀង ខេត្តពោធិ៍សាត់ ទទួលបានប័ណ្ណសរសើរប្រភេទមួយ (ប្រភេទ១) រយៈពេល ២ឆ្នាំជាប់គ្នា គឺកាលពីឆ្នាំ២០២៥ និងបន្តមកដល់ឆ្នាំ២០២៦ នេះ ក្នុងការអនុវត្តយ៉ាងខ្ជាប់ខ្ជួននូវគោលនយោបាយ «ភូមិ ឃុំមានសុវត្ថិភាព» របស់រាជរដ្ឋាភិបាល។ នេះបើតាមការបញ្ជាក់ឱ្យដឹងពីសំណាក់លោក ឈូ នូន មេឃុំកញ្ជរ។

សមិទ្ធផលដ៏លេចធ្លោនេះ គឺកើតចេញពីការចង្អុលបង្ហាញ និងការដឹកនាំយ៉ាងយកចិត្តទុកដាក់ពីសំណាក់លោក កែវ រតនៈ ប្រធានក្រុមការងាររាជរដ្ឋាភិបាលចុះមូលដ្ឋានខេត្តពោធិ៍សាត់ និងលោក ខូយ រីដា អភិបាល នៃគណៈអភិបាលខេត្តពោធិ៍សាត់ ដែលបានជំរុញឱ្យបណ្ដាស្រុកទាំង ៦ ក្នុងខេត្ត ខិតខំប្រកួតប្រជែងគ្នារៀបចំហេដ្ឋារចនាសម្ព័ន្ធ បរិស្ថាន អនាម័យ និងការធានាសន្តិសុខសុវត្ថិភាពនៅតាមមូលដ្ឋានរបស់ខ្លួនឱ្យបានយ៉ាងគត់មត់។

ជាក់ស្ដែង នៅក្នុងស្រុកកណ្ដៀង រដ្ឋបាលមូលដ្ឋានបានរៀបចំការគ្រប់គ្រងយ៉ាងមានរបៀបរៀបរយ ចាប់តាំងពីការទុកដាក់ និងគ្រប់គ្រងសំរាម ការលើកកម្ពស់បរិស្ថានស្អាត ការបំពាក់អំពូលភ្លើងសូឡាតាមដងផ្លូវសាធារណៈ រហូតដល់ការរៀបចំប្រព័ន្ធធារាសាស្ត្រសម្រាប់ស្តុកទឹកប្រើប្រាស់ ដោយសារពលរដ្ឋភាគច្រើនក្នុងតំបន់ប្រកបរបរកសិកម្មជាចម្បង។ ក្នុងនោះ ឃុំកញ្ជរ បានបង្ហាញនូវភាពគំរូខ្ពស់លើការធានាសន្តិសុខ សណ្ដាប់ធ្នាប់សាធារណៈ និងសុវត្ថិភាពជូនប្រជាពលរដ្ឋ រហូតត្រូវបានវាយតម្លៃ និងទទួលបានប័ណ្ណសរសើរប្រភេទ១ ពីរឆ្នាំជាប់ៗគ្នាតែម្តង។

ក្រៅពីភាពជោគជ័យរបស់ឃុំកញ្ជរ ស្រុកកណ្ដៀងទាំងមូលក៏កំពុងប្រែប្រួលមុខមាត់ថ្មីគួរឱ្យកត់សម្គាល់ តាមរយៈការកែលម្អហេដ្ឋារចនាសម្ព័ន្ធផ្លូវថ្នល់ និងភ្លើងបំភ្លឺសាធារណៈ។ លោក គិន កឹមតូ អភិបាលរង នៃគណៈអភិបាលស្រុកកណ្ដៀង បានមានប្រសាសន៍ឱ្យដឹងថា ស្រុកកណ្ដៀងទើបទទួលបានការស្ថាបនាផ្លូវថ្នល់ ផ្លូវកៅស៊ូ និងផ្លូវបេតុងថ្មីៗជាបន្តបន្ទាប់កាលពីឆ្នាំ២០២៥ និងឆ្នាំ២០២៦ ហើយសម្រាប់ឆ្នាំ២០២៧ ខាងមុខ រដ្ឋបាលស្រុកនឹងបន្តពង្រីកការកសាងបន្ថែមទៀត។

លោកអភិបាលរងស្រុក បានគូសបញ្ជាក់បន្ថែមថា ជាទិសដៅបន្ត រដ្ឋបាលស្រុកនឹងបន្តផ្ដោតការយកចិត្តទុកដាក់ខ្ពស់លើការរៀបចំប្រព័ន្ធធារាសាស្ត្រឱ្យកាន់តែល្អប្រសើរ ដ្បិតស្រុកកណ្ដៀងជាតំបន់ដែលមានសក្ដានុពលខ្លាំងក្លាលើវិស័យកសិកម្ម ដើម្បីធានាការផ្គត់ផ្គង់ទឹកដល់ការបង្កបង្កើនផល និងលើកកម្ពស់ជីវភាពរស់នៅរបស់បងប្អូនប្រជាពលរដ្ឋឱ្យកាន់តែប្រសើរឡើងជាលំដាប់៕