(ភ្នំពេញ)៖ ពិធីចុះហត្ថលេខាលើអនុស្សរណៈនៃការយោគយល់គ្នា ស្តីពី «ភាពជាដៃគូក្នុងការពង្រឹងកិច្ចសហប្រតិបត្តិការរវាងមជ្ឈមណ្ឌលកម្ពុជា ៤.០ និងសាកលវិទ្យាល័យភ្នំពេញអន្តរជាតិ» បានប្រព្រឹត្តទៅក្រោមអធិបតីភាពលោក ហ៊ុន ម៉ានី ប្រធានក្រុមប្រឹក្សាភិបាលនៃមជ្ឈមណ្ឌលកម្ពុជា ៤.០ និងជាប្រធានសហភាពសហព័ន្ធយុវជនកម្ពុជា និងលោកស្រីបណ្ឌិត ទេព កូលាប សាកលវិទ្យាធិការ នៃសាកលវិទ្យាល័យភ្នំពេញអន្តរជាតិ នារសៀលថ្ងៃទី២៧ ខែតុលា ឆ្នាំ២០២៦ នៅឯសាកលវិទ្យាល័យភ្នំពេញអន្តរជាតិ។

ពិធីនេះមានការចូលរួមពីសំណាក់ សមាជិក សមាជិកានៃក្រុមប្រឹក្សាភិបាល និងទីប្រឹក្សានៃមជ្ឈមណ្ឌលកម្ពុជា ៤.០ ថ្នាក់ដឹកនាំ និងគណៈគ្រប់គ្រងសាកលវិទ្យាល័យ សាស្ត្រាចារ្យ លោកគ្រូ អ្នកគ្រូ តំណាងវិស័យឯកជន, គ្រឹះស្ថានអប់រំ, អង្គការមិនមែនរដ្ឋាភិបាល, សមាគម ព្រមទាំងនិស្សិតចូលរួមជាច្រើនរូបផងដែរ។

អនុស្សរណៈ នៃការយោគយល់គ្នា ធ្វើឡើងក្នុងគោលបំណងពង្រឹងកិច្ចសហប្រតិបត្តិការ និងភាពជាដៃគូរវាងស្ថាប័នទាំងពីរ តាមរយៈការរៀបចំ និងអនុវត្តសកម្មភាពរួមគ្នា ការបញ្ជ្រាប់ការយល់ដឹងអំពីបច្ចេកវិទ្យា ព្រមទាំងការបណ្តុះបណ្តាល និងកសាងសមត្ថភាពផ្នែកបច្ចេកវិទ្យាឌីជីថល ដើម្បីលើកកម្ពស់ចំណេះដឹង និងអក្ខរកម្មឌីជីថលដល់សិស្ស និស្សិត និងសាធារណជន ព្រមទាំងអភិវឌ្ឍមូលធនមនុស្សឱ្យមានសមត្ថភាពស្របតាមតម្រូវការនៃសង្គមឌីជីថល។

តាមរយៈកិច្ចសហប្រតិបត្តិការរវាងមជ្ឈមណ្ឌលកម្ពុជា ៤.០ និងសាកលវិទ្យាល័យភ្នំពេញអន្តរជាតិនាពេលនេះ គឺជាការបោះជំហានមួយក្នុងការភ្ជាប់កិច្ចសហការរវាងស្ថាប័នជំនាញផ្នែកបច្ចេកវិទ្យា និងវិស័យអប់រំ ដើម្បីរួមគ្នាជំរុញបរិវត្តកម្មឌីជីថល លើកកម្ពស់ការយល់ដឹងអំពីបច្ចេកវិទ្យា និងពង្រឹងសមត្ថភាពធនធានមនុស្សនៅកម្ពុជា។

នៅក្នុងកិច្ចសហការប្រតិបត្តិការនេះ ស្ថាប័នទាំងពីរនឹងធ្វើការរួមគ្នាក្នុងការអនុវត្ត សកម្មភាពសំខាន់ៗ រួមមាន៖ ទី១៖ ការអនុវត្តសកម្មភាពរួមគ្នា សហការ និងបង្កើតគម្រោង, ទី២៖ ការផលិត និងចែករំលែកនូវមាតិកាខ្លឹមសារឌីជីថល, និងទី៣៖ ការអភិវឌ្ឍ និងការកសាងសមត្ថភាព៕