(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ បានគូសបញ្ជាក់ថា សង្គមជាតិត្រូវការធនធានមនុស្សពូកែ ដែលមានចំណេះដឹងខ្ពស់ ព្រមទាំងមានសីលធម៌ល្អ សុខភាពល្អ មានវិន័យ សុច្ចរិតភាព និងការទទួលខុសត្រូវខ្ពស់ ដើម្បីក្លាយជាធនធានមនុស្សមានគុណភាព សម្រាប់ចូលរួមអភិវឌ្ឍប្រទេសជាតិ ស្របតាមគោលនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ប្រកបដោយគតិបណ្ឌិតរបស់សម្តេចបវរធិបតី ហ៊ុន ម៉ាណែត។

ការគូសបញ្ជាក់បែបនេះរបស់រដ្ឋមន្ត្រីក្រសួងព័ត៌មាន បានធ្វើឡើងនោក្នុងឱកាសអញ្ជើញជួបសំណេះសំណាលជាមួយសិស្សពូកែដែលទទួលបាននិទ្ទេស A ក្នុងសម័យប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៦ ទាំង៣៦រូប មកពីខេត្តក្រចេះ ដោយមានការអញ្ជើញចូលរួមពីកិត្តិបណ្ឌិត ពេជ្រ ប៊ុនធិន, លោក សរ ចំរុង ប្រធានគណៈកម្មការទី១ នៃរដ្ឋសភា និងជាអនុប្រធានទី១ ក្រុមការងាររាជរដ្ឋាភិបាលចុះមូលដ្ឋានខេត្តក្រចេះ, លោក អ៉ឹម ចាន់ថុល អ្នកតំណាងរាស្ត្រមណ្ឌលក្រចេះ, លោក វ៉ា ថន អភិបាលខេត្តក្រចេះ ព្រមទាំងប្រធានក្រុមការងារទាំង ៧ក្រុង ស្រុក ក្នុងខេត្តក្រចេះ ព្រមទាំង មាតាបិតា អាណាព្យាបាល។

សារអប់រំដែលើកឡើងដោយរដ្ឋមន្ត្រី នេត្រ ភក្ត្រា បានបន្ថែមថា ការកសាងយុវជនឱ្យក្លាយជាធនធានមនុស្សប្រកបដោយគុណភាព មិនអាចផ្អែកតែលើលទ្ធផលសិក្សា ឬសញ្ញាបត្រនោះទេ ប៉ុន្តែត្រូវរួមបញ្ចូលទាំងសមត្ថភាពវិជ្ជាជីវៈ សុខភាពល្អ សីលធម៌ និងការទទួលខុសត្រូវចំពោះខ្លួនឯង គ្រួសារ និងសង្គម។

ជាមួយគ្នានេះដែរ លោករដ្ឋមន្ត្រី នេត្រ ភក្ត្រា បានបញ្ជាក់នៅចំពោះមុខសិស្សានុសិស្សដែលទទួលបាននិទ្ទេស A ទាំង៣៦រូបថា តម្លៃរបស់មនុស្សមាន៣ គឺទី១៖ សុខភាព, ទី២៖ ចំណេះដឹង និងទី៣៖ សីលធម៌។ ទាំងចំណុចនេះ គឺប្រៀបបាននឹងការសាងសង់ផ្ទះដែលមានសសរ ប្រៀបបាននឹងសុខភាព, ដំបូល ប្រៀបបានទៅនឹងចំណេះដឹង ខណៈសីលធម៌ ប្រៀបនឹងជញ្ជាំងដែលបិទបាំងផ្ទះ។ ដូច្នេះ តម្លៃរបស់មនុស្សត្រូវតែមានសុខភាពល្អ មានចំណេះដឹង និងសីលធម៌។

លោករដ្ឋមន្ត្រី នេត្រ ភក្ត្រា បានសម្តែងនូវការកោតសរសើរ និងអបអរសាទរចំពោះសិស្សនិទ្ទេស A ទាំង ៣៦នាក់ ក្នុងខេត្តក្រចេះ ដែលបានខិតខំប្រឹងប្រែងសិក្សា រហូតទទួលបានលទ្ធផលល្អប្រសើរ ជាគំរូដ៏ល្អសម្រាប់យុវជនកម្ពុជា និងលើកទឹកចិត្តឱ្យសិស្សានុសិស្សទាំងអស់បន្តការសិក្សាបានកាន់តែខ្ពស់ បណ្តុះបណ្តាលជំនាញ និងសីលធម៌។

លោករដ្ឋមន្ត្រី នេត្រ ភក្ត្រា ក៏បានផ្តាំផ្ញើដល់សិស្សានុសិស្សជាប់និទ្ទេស A និងអ្នកបានប្រឡងជាប់សញ្ញាបត្រទុតិយភូមិទាំងអស់ ឱ្យខិតខំប្រឹងប្រែងសិក្សារៀនសូត្របន្ថែមទៀតនៅកម្រិតឧត្តមសិក្សា និងជ្រើសរើសយកជំនាញដែលខ្លួនពេញចិត្ត និងតាមឧប្បនិស័យដើម្បីក្លាយខ្លួនជាធនធានមនុស្សប្រកបដោយសមត្ថភាព គុណភាព និងសីលធម៌ចូលរួមក្នុងការបម្រើសង្គមជាតិ។

លោករដ្ឋមន្ត្រី នេត្រ ភក្ត្រា បានថ្លែងថា សិស្សានុសិស្សដែលប្រឡងជាប់ និងជោគជ័យក្នុងការសិក្សាមិនមែនត្រឹមតែបង្ហាញពីភាពជោគជ័យសម្រាប់ជីវិតផ្ទាល់ខ្លួននោះទេ ប៉ុន្តែបាននាំមកនូវមោទកភាព និងកិត្តិយសសម្រាប់ក្រុមគ្រួសារ ឪពុកម្តាយ និងកេរ្តិ៍ឈ្មោះដល់សាលារៀន និងស្រុកកំណើតរបស់ខ្លួនថែមទៀត។ ការកសាងធនធានមនុស្សជាកត្តាសំខាន់នាពេលអនាគត។ លោកក៏បង្ហាញក្ដីសង្ឃឹមថាក្មួយៗនឹងខិតខំជម្នះរាល់ឧបសគ្គ ដើម្បីកសាងខ្លួនឱ្យសាកសមជាប្រជាពលរដ្ឋល្អ ជានិស្សិតល្អ ដោយខិតខំប្រឹងប្រែងរៀនសូត្រ។

រដ្ឋមន្ត្រីបានសង្កត់ធ្ងន់ថា លទ្ធផលប្រឡងជាសញ្ញាបង្ហាញពីសមត្ថភាពនៅដំណាក់កាលមួយ ប៉ុន្តែភាពជោគជ័យក្នុងជីវិតអាស្រ័យលើការខិតខំរៀនសូត្រ ការអភិវឌ្ឍជំនាញ និងការអនុវត្តចំណេះដឹងឱ្យមានប្រយោជន៍ជាក់ស្តែង។ ដូច្នេះ យុវជនត្រូវបន្តរៀនសូត្រពេញមួយជីវិត ពង្រឹងសមត្ថភាពដែលចាំបាច់សម្រាប់ទីផ្សារការងារ និងត្រៀមខ្លួនឱ្យបានល្អសម្រាប់អនាគត៕