(ភ្នំពេញ)៖ បើទោះបីដំណើរការប្រឡងជ្រើសរើសមន្ដ្រីរាជការ ដែលជាការរៀបចំឡើងដោយក្រសួងមុខងារសាធារណៈ បានប្រព្រឹត្តទៅចំនួន៦៤លើកយ៉ាងណាក្ដី ប៉ុន្ដែលោក ហ៊ុន ម៉ានី ឧបនាយករដ្ឋមន្ដ្រី រដ្ឋមន្ដ្រីក្រសួងមុខសាធារណៈ និងជាប្រធានគណៈកម្មការរៀបចំការប្រឡងប្រជែង បានអះអាងថា ការប្រឡងជ្រើសរើសមន្ដ្រីរាជការ នៅតែបន្ដប្រព្រឹត្តទៅតាមនិយាមប្រតិបត្តិ ធានាយុត្តិធម៌ ឈរលើមូលដ្ឋាន «អ្នកជាប់ដោយមោទន អ្នកធ្លាក់ដោយអស់ចិត្ត»។

ការលើកឡើងរបស់ឧបនាយករដ្ឋមន្ដ្រី ហ៊ុន ម៉ានី បានធ្វើឡើងក្នុងឱកាសអញ្ជើញជាអធិបតីកាត់វិញ្ញាសាជានិមិត្តរូប នាវេលាថ្ងៃត្រង់ ថ្ងៃទី២៨ ខែតុលា ឆ្នាំ២០២៦នេះ ក្នុងដំណើរការប្រឡងប្រជែងជ្រើសរើសគ្រូបង្រៀនកម្រិតបឋមសិក្សា។ ក្នុងក៏មានការអញ្ជើញចូលរួមពិនិត្យ និងធ្វើជាសាក្សីផ្ទាល់ពីសំណាក់តំណាងក្រសួងអប់រំ យុវជន និងកីឡា, ក្រសួងសេដ្ឋកិច្ចនិងហិរញ្ញវត្ថុ, អង្គភាពប្រឆាំងអំពើពុករលួយ (ACU), តំណាងសាកលវិទ្យាល័យ, សហភាពសហព័ន្ធយុវជនកម្ពុជា (ស.ស.យ.ក.), សាធារណជន ព្រមទាំងអ្នកសារព័ត៌មាន។

ឧបនាយករដ្ឋមន្ដ្រី ហ៊ុន ម៉ានី បានគូសបញ្ជាក់ថា គ្រប់ដំណើរការប្រឡងប្រជែងជ្រើសរើសមន្ដ្រីរាជការ គឺមិនខុសគ្នានោះទេ ពោលការតាក់តែងវិញ្ញាសាត្រូវបានធ្វើឡើងភ្លាមៗមុនដំណើរការប្រឡងចាប់ផ្ដើម ដើម្បីធានាថា គ្មានបេក្ខជនរូបណាម្នាក់អាចទទួល និងដឹងវិញ្ញសាមុនជាដាច់ខាត។ លោកបានសង្កត់ធ្ងន់ថា គណៈកម្មការរៀបចំការប្រឡងប្រជែង ទទួលបេសកកម្មពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា គឺធ្វើយ៉ាងណាឲ្យដំណើរការប្រឡងធានាបានយុត្តិធម៌។

បើតាមការលើកឡើងរបស់ឧបនាយករដ្ឋមន្ដ្រី ហ៊ុន ម៉ានី, ក្នុងដំណើរការប្រឡង៦៤លើកមកនេះ បានជ្រើសរើសមន្ដ្រីចំនួន១៣,២២១នាក់ ក្នុងនោះ ចំនួន៥,៨០៧នាក់ ជាគ្រូក្របខ័ណ្ឌ និងមន្ដ្រីកិច្ចព្រមព្រៀងការងារ ចំនួន៧,៤១៤នាក់។ សរុបជារួមមន្ដ្រីរាជការដែលបានជ្រើសរើស ស្មើប្រមាណលើស៧៥ភាគរយ ត្រូវបានផ្ដល់ជូនទៅកាន់វិស័យអប់រំ និងសុខាភិបាល។

ខាងក្រោមនេះ ជាវីដេអូនៃកិច្ចសម្ភាសជាមួយឧបនាយករដ្ឋមន្ដ្រី ហ៊ុន ម៉ានី៖