(ភ្នំពេញ)៖ លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក CMAC នៅថ្ងៃទី២៨ ខែតុលា ឆ្នាំ២០២៦នេះ បានទទួលជួបស្វាគមន៍ និងពិភាក្សាការងារជាមួយលោកស្រី Rachel Schiller ឧបការីរងទទួលបន្ទុកកម្មវិធី និងប្រតិបត្តិការ នៃការិយាល័យកិច្ចនយោបាយនិងយោធា នៃក្រសួងការបរទេសសហរដ្ឋអាមេរិក និងលោក Ethan Rinks អ្នកគ្រប់គ្រងកម្មវិធី នៃការិយាល័យទទួលបន្ទុកការបោសសម្អាតមីន និងការកាត់បន្ថយអាវុធ ព្រមទាំងសហការី។

លោក ហេង រតនា បានជម្រាបជូនលោកស្រី Rachel Schiller និងគណៈប្រតិភូអំពីវឌ្ឍនភាពនៃសកម្មភាពបោសសម្អាតផ្ទៃដី ដែលរងផលប៉ះពាល់ដោយមីន និងសំណល់ជាតិផ្ទុះពីសង្គ្រាម ព្រមទាំងការស្រាវជ្រាវ និងវាយតម្លៃស្ថានភាពគ្រោះថ្នាក់ ដើម្បីកំណត់តំបន់អាទិភាព និងធានាថាផ្ទៃដីដែលបានបោសសម្អាតរួច អាចប្រើប្រាស់ដោយសុវត្ថិភាពសម្រាប់ប្រជាពលរដ្ឋ និងការអភិវឌ្ឍសហគមន៍។

លោកអគ្គនាយកក៏បានថ្លែងអំណរគុណយ៉ាងជ្រាលជ្រៅ ចំពោះរដ្ឋាភិបាលសហរដ្ឋអាមេរិក ដែលបានផ្តល់ការគាំទ្រដល់វិស័យសកម្មភាពមីននៅកម្ពុជា ជាពិសេសបានធ្វើអន្តរាគមន៍យ៉ាងសំខាន់ ក្នុងការស្វែងរកដំណោះស្រាយសន្តិភាព និងការសម្របសម្រួលឱ្យមានបទឈប់បាញ់រវាងកម្ពុជានិងថៃ។ ជាមួយគ្នានេះ លោកក៏បានជម្រាបជូនបន្ថែម អំពីផលប៉ះពាល់ដែលបង្កឡើងដោយគ្រាប់បែកចង្កោម និងសំណល់ជាតិផ្ទុះដែលយោធាថៃបានបាញ់លើបូរណភាពទឹកដីកម្ពុជា ក្នុងសង្គ្រាមឈ្លានពានឆ្នាំ២០២៥កន្លងទៅ។

ជាការឆ្លើយតប លោកស្រី Rachel Schiller បានសម្តែងនូវការវាយតម្លៃខ្ពស់ និងកោតសរសើរចំពោះការខិតខំប្រឹងប្រែងរបស់សម្ដេចធិបតី ក្នុងការប្រកាន់ជំហរសន្តិភាពដោយអនុវត្តម៉ឺងម៉ាត់ នូវបទឈប់បាញ់ និងបានពង្រឹងទំនាក់ទំនងល្អជាមួយថ្នាក់ដឹកនាំសហរដ្ឋអាមេរិក។

លោកស្រីក៏បានសម្តែងនូវការវាយតម្លៃខ្ពស់ដល់កម្លាំងជំនាញ ដែលកំពុងបំពេញប្រតិបត្តិការបោសសម្អាតមីន និងសំណល់ជាតិផ្ទុះពីសង្គ្រាម ដោយយកចិត្តទុកដាក់ខ្ពស់ចំពោះសុវត្ថិភាព និងអាយុជីវិតរបស់ប្រជាពលរដ្ឋ។

លោកស្រីក៏បានបញ្ជាក់ជំហរបន្តគាំទ្រដល់សកម្មភាពបោសសម្អាតគ្រាប់មីន និងសំណល់យុទ្ធសង្គ្រាមនៅកម្ពុជា សម្រាប់បណ្ដាឆ្នាំខាងមុខទៀត។ សូមរំលឹកថា បច្ចុប្បន្ននេះសហរដ្ឋអាមេរិក បានផ្តល់ជំនួយដល់អង្គភាព CMAC តាមរយៈអង្គការ NPA មានហិរញ្ញប្បទានឥតសំណងសរុបចំនួន ៥លានដុល្លារសម្រាប់គម្រោងរយៈពេល១៨ខែ (មករា ឆ្នាំ២០២៦-មិថុនា ២០២៧)។

ទន្ទឹមនឹងនេះ លោកស្រី Rachel Schiller ក៏បានបង្ហាញចំណាប់អារម្មណ៍ជាខ្លាំងចំពោះការរៀបចំសារមន្ទីរតេជោសន្តិភាព ក្នុងខេត្តសៀមរាប ដែលបានបង្ហាញអំពីប្រវត្តិសាស្ត្រកម្ពុជា ផលវិបាកបង្កឡើងដោយសង្គ្រាម និងការខិតខំប្រឹងប្រែងបញ្ចប់សង្គ្រាម ព្រមទាំងកសាងសន្តិភាពមួយពេញលេញនៅកម្ពុជា។

សូមបញ្ជាក់ថា កិច្ចសហប្រតិបត្តិការរវាងកម្ពុជា-សហរដ្ឋអាមេរិកក្នុងវិស័យបោសសម្អាតសំណល់យុទ្ធភណ្ឌសង្គ្រាម មិនត្រឹមតែចូលរួមពង្រឹងសុខសុវត្ថិភាព ការអភិវឌ្ឍសេដ្ឋកិច្ចសង្គម និងលើកកម្ពស់សេដ្ឋកិច្ចជាតិប៉ុណ្ណោះទេ ប៉ុន្តែជាការរួមចំណែកក្នុងការពង្រឹងលទ្ធិប្រជាធិបតេយ្យ សិទ្ធិមនុស្ស និងវិបុលភាពកម្ពុជាសម្រាប់អនាគតយូរអង្វែងផងដែរ។

គួររំលឹកថា លោក ហេង រតនា ធ្លាប់បញ្ជាក់ឱ្យដឹងថា ការប្រើប្រាស់គ្រាប់បែកចង្កោមប្រភេទ M42, M46 និង M85 ប្រមាណ ៦-៧ លានគ្រាប់បែកចង្កោមរបស់ទាហានថៃមកលើបូរណភាពទឹកដីកម្ពុជា បានវាយប្រហារកងទ័ព/នគរបាលកម្ពុជា ជាពិសេសប៉ះពាល់គោលដៅស៊ីវិលដោយផ្ទាល់។

ភូមិចំនួន ៣៤៩ភូមិ ផ្ទៃដីជិត ៣០ម៉ឺនហិកតា ប្រជាជនជាង ៩ម៉ឺនគ្រួសារ ស្មើនឹងប្រជាពលរដ្ឋប្រមាណជាង ៣៥ម៉ឺននាក់ បានរងផលប៉ះពាល់៕