(ភ្នំពេញ)៖ លោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា បានថ្លែងឱ្យដឹងថា តាមរបាយការណ៍ប្រចាំឆ្នាំ២០២៥ របស់ធនាគារជាតិនៃកម្ពុជា ស្ត្រីមានចំណែកប្រមាណ ៦៧% នៃអ្នកប្រើប្រាស់សេវាឥណទាន ក្នុងវិស័យមីក្រូហិរញ្ញវត្ថុនៅកម្ពុជា។ ខណៈស្ត្រីដែលមានប្រាក់បញ្ញើ ក្នុងវិស័យនេះមានចំណែកប្រមាណ ៦៤% ដែលតួលេខទាំងនេះ បង្ហាញពីការចូលរួមយ៉ាងសកម្មរបស់ស្ត្រី ក្នុងប្រព័ន្ធហិរញ្ញវត្ថុផ្លូវការនៅកម្ពុជា។

ចំណែកក្នុងវិស័យធនាគារ ស្ត្រីមានចំណែកប្រមាណ ៥៣% នៃអ្នកប្រើប្រាស់សេវាឥណទាន និងប្រមាណ ៥១% នៃអ្នកមានប្រាក់បញ្ញើ។ តួលេខទាំងនេះបង្ហាញថា ស្ត្រីមានតួនាទីសំខាន់ក្នុងការប្រើប្រាស់សេវាហិរញ្ញវត្ថុ ទាំងការទទួលបានឥណទាន និងការដាក់ប្រាក់បញ្ញើ។

ថ្លែងក្នុងសិក្ខាសាលា និងកិច្ចពិភាក្សាស្តីពី «បរិយាបន្នហិរញ្ញវត្ថុសម្រាប់ស្ត្រីនៅកម្ពុជា» លោកស្រីបណ្ឌិត ជា សិរី បានបន្ថែមថា ទោះជាយ៉ាងណា ការបង្កើនលទ្ធភាពទទួលបានសេវាហិរញ្ញវត្ថុតែមួយមុខ មិនទាន់គ្រប់គ្រាន់នោះទេ ចាំបាច់ត្រូវធានាថា ស្ត្រីអាចទទួលបានផលិតផល និងសេវាហិរញ្ញវត្ថុដែលសមស្របនឹងតម្រូវការ មានសុវត្ថិភាព និងជួយឱ្យពួកគាត់សម្រេចបានលទ្ធផលហិរញ្ញវត្ថុវិជ្ជមាន។

លោកស្រីបណ្ឌិតបានបញ្ជាក់ថា ដើម្បីជំរុញការអភិវឌ្ឍក្នុងវិស័យនេះ ធនាគារជាតិនៃកម្ពុជា និងក្រសួង-ស្ថាប័នពាក់ព័ន្ធ កំពុងរៀបចំ «យុទ្ធសាស្ត្រជាតិស្តីពីបរិយាបន្នហិរញ្ញវត្ថុ ២០២៦-២០៣០» ដោយចាត់ទុកបរិយាបន្នហិរញ្ញវត្ថុសម្រាប់ស្ត្រីជាអាទិភាពសំខាន់មួយ។ យុទ្ធសាស្ត្រនេះមានគោលដៅបន្តពង្រឹងសមិទ្ធផលដែលសម្រេចបានកន្លងមក បំពេញចន្លោះខ្វះខាត និងបង្កើតដំណោះស្រាយ ដើម្បីឆ្លើយតបនឹងតម្រូវការហិរញ្ញវត្ថុចម្រុះរបស់ស្ត្រី។

លោកស្រីបានបញ្ជាក់ថា កិច្ចសហប្រតិបត្តិការរវាងធនាគារជាតិនៃកម្ពុជា និងក្រសួងកិច្ចការនារី ក៏បានដើរតួនាទីសំខាន់ ក្នុងការលើកកម្ពស់បរិយាបន្នហិរញ្ញវត្ថុសម្រាប់ស្ត្រីផងដែរ។ ក្នុងឆ្នាំ២០២៤ ស្ថាប័នទាំងពីរបានចុះអនុស្សរណៈនៃការយោគយល់គ្នាស្តីពី ការលើកកម្ពស់បរិយាបន្នហិរញ្ញវត្ថុសម្រាប់ស្ត្រី ដោយផ្តោតលើការបញ្ចូលចំណេះដឹងផ្នែកហិរញ្ញវត្ថុ និងការពង្រឹងសមត្ថភាពប្រើប្រាស់សេវាហិរញ្ញវត្ថុឌីជីថល ដើម្បីជួយបង្កើនតួនាទីរបស់ស្ត្រីក្នុងសកម្មភាពសេដ្ឋកិច្ច។

លើសពីនេះ ធនាគារជាតិនៃកម្ពុជា ក៏បានសហការជាមួយដៃគូអភិវឌ្ឍន៍ រួមមានអង្គការ Good Return និងអង្គការ CUFA ដើម្បីលើកកម្ពស់ចំណេះដឹងផ្នែកហិរញ្ញវត្ថុសម្រាប់ស្ត្រី និងគាំទ្រឱ្យពួកគាត់អាចចូលរួមក្នុងប្រព័ន្ធហិរញ្ញវត្ថុផ្លូវការ បានកាន់តែទូលំទូលាយ។

ការជំរុញបរិយាបន្នហិរញ្ញវត្ថុសម្រាប់ស្ត្រី ត្រូវបានចាត់ទុកថាជាកត្តាសំខាន់មួយ ក្នុងការពង្រឹងសមត្ថភាពគ្រប់គ្រងហិរញ្ញវត្ថុរបស់ស្ត្រី លើកកម្ពស់ឱកាសសេដ្ឋកិច្ច និងរួមចំណែកដល់ការអភិវឌ្ឍសេដ្ឋកិច្ចកម្ពុជាប្រកបដោយបរិយាបន្ន និងចីរភាព។

លោកស្រីបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានថ្លែងឱ្យដឹងថា កន្លងមកនេះយុទ្ធសាស្ត្រជាតិស្តីពី បរិយាបន្នហិរញ្ញវត្ថុឆ្នាំ២០១៩-២០២៥ មានគោលដៅបង្កើនលទ្ធភាពទទួលបានសេវាហិរញ្ញវត្ថុផ្លូវការ ដែលមានគុណភាព កាត់បន្ថយអត្រាស្ត្រី ដែលមិនទាន់ទទួលបានសេវាហិរញ្ញវត្ថុ ឱ្យបានពាក់កណ្ដាលពី ២៧% មក ១៣% និងពង្រីកការប្រើប្រាស់សេវាហិរញ្ញវត្ថុផ្លូវការពី ៥៩% ទៅ ៧០% ហើយត្រូវសម្រេចបានត្រឹមឆ្នាំ២០២៥ ព្រមទាំងធ្វើឱ្យប្រសើរឡើងនូវសុខុមាលភាពគ្រួសារ និងគាំទ្រកំណើនសេដ្ឋកិច្ច។

លោកស្រីបណ្ឌិតបានបន្តថា ក្នុងបរិបទនេះ ចាប់តាំងពីឆ្នាំ២០១៩មក ក្រសួងកិច្ចការនារី មានកិច្ចសហការ និងភាពជាដៃគូជាមួយធនាគារជាតិនៃកម្ពុជា ដើម្បីលើកកម្ពស់បរិយាបន្នហិរញ្ញវត្ថុសម្រាប់ស្ត្រី និងសហគ្រិនស្ត្រី ដោយបានផ្ដល់ផលប្រយោជន៍ដោយផ្ទាល់ ដល់ក្រុមគោលដៅ (ប្រមាណជាង ១.០០០នាក់) លើការប្រើប្រាស់កម្មវិធីឌីជីថល និងហិរញ្ញវត្ថុសម្រាប់ស្ត្រី និងក្មេងស្រី៕