(ភ្នំពេញ)៖ ក្រសួងសាធារណការ និងដឹកជញ្ជូន (MPWT) សហការជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) និងដោយមានការសម្របសម្រួលពីក្រុមហ៊ុន Fukudome Corporation ដែលជាក្រុមហ៊ុនវិស្វកម្ម និងសំណង់ស៊ីវិលឈានមុខគេមួយមកពីប្រទេសជប៉ុន បានរៀបចំសិក្ខាសាលាបច្ចេកវិទ្យាដ៏សំខាន់មួយ ស្តីពីការធ្វើបរិវត្តកម្មឌីជីថល (digital transformation- DX) ក្នុងវិស័យសំណង់ សំដៅជំរុញការប្រើប្រាស់បច្ចេកវិទ្យាទំនើបក្នុងវិស័យសំណង់ និងការគ្រប់គ្រងការដ្ឋានសំណង់តាមបច្ចេកវិទ្យាឌីជីថលដែលអាចជួយលើកកម្ពស់វិស័យសំណង់នៅកម្ពុជា។

ពិធីនេះបានធ្វើឡើងក្រោមវត្តមានលោក ហ៊ុន ស៊ាងហុង តំណាងលោកបណ្ឌិត ធន់ វឌ្ឍនា អនុប្រធានទី២ ព្រឹទ្ធសភានៃកម្ពុជា និងមានការចូលរួមពីតំណាងស្ថានទូតជប៉ុនប្រចាំកម្ពុជា, លោក យូរ តារា អនុប្រធានយកដ្ឋានហេដ្ឋានរចនាសម្ព័ន្ធផ្លូវថ្នល់នៃក្រសួងសាធារណការ និងដឹកជញ្ជូន, លោកស្រី Kikuchi Sakurako តំណាងទីភ្នាក់ងារសហប្រតិបត្តិការអន្តរជាតិជប៉ុន (JICA) លោក Masashi OBA ជាប្រធាន និងជានាយកប្រតិបត្តិក្រុមហ៊ុន Fukudome Corporation រួមទាំងមានបណ្តាក្រុមហ៊ុន សាងសង់នៅកម្ពុជា ជាច្រើនទៀត។

លោក យូរ តារា បានបញ្ជាក់ឱ្យដឹងថា កម្ពុជា និងជប៉ុន មានចំណងមិត្តភាពដ៏យូរអង្វែងដែលត្រូវបានកសាងឡើងដោយផ្អែកលើទំនុកចិត្ត និងកិច្ចសហប្រតិបត្តិការ។ ការគាំទ្ររបស់ប្រទេសជប៉ុន ក្នុងការអភិវឌ្ឍហេដ្ឋារចនាសម្ព័ន្ធ ដូចជា៖ ផ្លូវថ្នល់ ស្ពានកំពង់ផែ និងហេដ្ឋារចនាសម្ព័ន្ធផ្សេងៗទៀត បានរួមចំណែកយ៉ាងសំខាន់ដល់ការអភិវឌ្ឍប្រទេសកម្ពុជា។ នៅពេលដែលប្រទេសកម្ពុជា បន្តអភិវឌ្ឍរីកចម្រើន យើងចាំបាច់ត្រូវពង្រឹង និងកែលម្អបណ្តាញដឹកជញ្ជូន ព្រមទាំងលើកកម្ពស់គុណភាពសំណង់ សុវត្ថិភាព និងផលិតភាពការងារ។ បច្ចេកវិទ្យាឌីជីថលផ្តល់នូវឱ កាសជាក់ស្តែង និងមានសក្តានុពលក្នុងការគាំទ្រដល់ការសម្រេចបាននូវគោលដៅទាំងនេះ។

លោក យូរ តារា បានបន្ថែមថា ក្រុមហ៊ុន Fukudome Corporation បានបង្ហាញពីការប្តេជ្ញាចិត្តយ៉ាងមោះមុតក្នុងការជំរុញការប្រើប្រាស់បច្ចេកវិទ្យាទំនើបក្នុងវិស័យសំណង់ រួមមាន ការងារវាស់វែង និងការរចនាដោយប្រើបច្ចេកវិទ្យា 3D គ្រឿងចក្រ សំណង់ដែលប្រើប្រាស់បច្ចេកវិទ្យាព័ត៌មាន និងទំនាក់ទំនង (ICT) ការគ្រប់គ្រងការដ្ឋានសំណង់តាមប្រព័ន្ធ ឌីជីថល និងបច្ចេកវិទ្យាបោះពុម្ពបេតុង 3D។

ជាក់ស្តែងនៅក្នុងសិក្ខាសាលានាថ្ងៃនេះ ក្រុមហ៊ុន Fukudome Corporation បានធ្វើបទបង្ហាញអំពីវិធីសាស្ត្រនៃការធ្វើសមាហរណកម្មបច្ចេកវិទ្យាទាំងនេះឱ្យដំណើរការរួមគ្នា ចាប់ពីការងារវាស់វែង ការរចនាការសាងសង់ រហូតដល់ការត្រួតពិនិត្យគុណភាព។ ការធ្វើសមាហរណកម្មបច្ចេកវិទ្យាទាំងនេះផ្តល់នូវចំណេះដឹង និងបទពិសោធន៍ដ៏មានតម្លៃ ដែលអាចជាមេរៀនសំខាន់សម្រាប់ការអភិវឌ្ឍវិស័យសំណង់នៅកម្ពុជា។

លោក Masashi OBA បានបញ្ជាក់ឱ្យដឹងដែរថា តាមរយៈការធ្វើបរិវត្តកម្មឌីជីថល (digital transformation- DX) ក្នុងវិស័យសំណង់ ជួយឱ្យក្រុមការងារសាងសង់បានកាន់តែត្រឹមត្រូវ មានប្រសិទ្ធភាព និងមានសុវត្ថិភាព។ ដ្រូន និងឧបករណ៍ស្កេនបង្កើតផែនទី ៣វិមាត្រ(3D) លម្អិតនៃកន្លែងសាងសង់ ដែលជួយវិស្វករក្នុងការរៀបចំផែនការការងារ ប៉ាន់ប្រមាណបរិមាណសម្ភារៈ និងកំណត់បញ្ហាមុនពេលចាប់ផ្តើមសាងសង់។ គំរូឌីជីថលជួយឱ្យគ្រប់គ្នាយល់ពីការរចនា ខណៈដែលឧបករណ៍ចាប់សញ្ញា និងអេក្រង់នៅលើម៉ាស៊ីនបង្ហាញផ្លូវដល់អ្នកបើកម៉ាស៊ីនជីក ឱ្យជីកបានត្រឹមជម្រៅ និងជម្រាលត្រឹមត្រូវ ដោយកាត់បន្ថយកំហុស និងការធ្វើឡើងវិញ។

វិស្វករអាចតាមដានវឌ្ឍនភាពពីចម្ងាយ និងប្រៀបធៀបការងារដែលបានបញ្ចប់ជាមួយនឹងការរចនា ដើម្បីកំណត់ចំណុចដែលត្រូវកែតម្រូវ។ បច្ចេកវិទ្យាទាំងនេះក៏កាត់បន្ថយតម្រូវការឱ្យកម្មករធ្វើការវាស់វែងនៅជិតម៉ាស៊ីនដែលកំពុងធ្វើចលនាផងដែរ។ បន្ទាប់ពីការសាងសង់រួចរាល់ កំណត់ត្រាឌីជីថលនឹងជួយដល់ការត្រួតពិនិត្យ ការថែទាំ និងការកែលម្អនាពេលអនាគត។

ក្រុមហ៊ុន Fukudome Corporation នាំមកនូវបទពិសោធន៍វិស្វកម្មសំណង់ស៊ីវិល ៧៥ ឆ្នាំ ក្នុងការផ្លាស់ប្តូរនេះ។ ក្រុមហ៊ុនត្រូវបានបង្កើតឡើងក្នុងឆ្នាំ ១៩៥១ មានការិយាល័យកណ្តាលនៅទីក្រុង Kochi ប្រទេសជប៉ុន ហើយអនុវត្តការងារផ្លូវ ទន្លេ ស្ពាន ផ្លូវរូងក្រោមដី ការងារឆ្នេរសមុទ្រ និងកំពង់ផែ ការការពារគ្រោះរាំងស្ងួត/ការហូរច្រោះដី ប្រព័ន្ធទឹក ការស្ដារឡើងវិញក្រោយគ្រោះមហន្តរាយ និងការថែទាំហេដ្ឋារចនាសម្ព័ន្ធ៕