ក្រសួងអធិការកិច្ច និងរដ្ឋបាលខេត្តស្ទឹងត្រែង រួមគ្នាផ្សព្វផ្សាយច្បាប់គ្រឿងញៀន និងបារីអេឡិចត្រូនិក ដល់អ្នកចូលរួមជាង ៣០០នាក់
28-10-2026 20:14
(ស្ទឹងត្រែង)៖ ក្រសួងអធិការកិច្ច សហការជាមួយរដ្ឋបាលខេត្តស្ទឹងត្រែង បានរៀបចំពិធីផ្សព្វផ្សាយច្បាប់ស្តីពីការត្រួតពិនិត្យគ្រឿងញៀន និងបារីអេឡិចត្រូនិក នៅវិទ្យាល័យ ហ៊ុន សែន ស្ទឹងត្រែង ដោយមានការចូលរួមយ៉ាងផុសផុលពីសំណាក់កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស យុវជន និងប្រជាពលរដ្ឋជាអាណាព្យាបាលសិស្ស សរុបជាង ៣០០នាក់។
ពិធីនេះបានប្រព្រឹត្តទៅនៅថ្ងៃទី២៨ ខែតុលា ឆ្នាំ២០២៦នេះ ក្រោមអធិបតីភាពដ៏ខ្ពង់ខ្ពស់ លោកស្រី វី ស្រីពៅ រដ្ឋលេខាធិការក្រសួងអធិការកិច្ច និងលោក ស៊ី សួន អភិបាលរងខេត្តស្ទឹងត្រែង។ការផ្សព្វផ្សាយនេះបានបង្ហាញពីការប្តេជ្ញាចិត្តរួមគ្នាក្នុងការចូលរួមការពារសហគមន៍ឱ្យរួចផុតពីគ្រោះមហន្តរាយនៃគ្រឿងញៀន និងផលប៉ះពាល់ពីបារីអេឡិចត្រូនិក។
លោកស្រី វី ស្រីពៅ បានគូសបញ្ជាក់ថា គោលបំណងសំខាន់នៃការផ្សព្វផ្សាយនេះ គឺដើម្បីបណ្តុះបណ្តាល និងពង្រឹងការយល់ដឹងស៊ីជម្រៅដល់អ្នកចូលរួមទាំងអស់ អំពីខ្លឹមសារនៃច្បាប់ស្តីពីការត្រួតពិនិត្យគ្រឿងញៀន និងហានិភ័យនៃបារីអេឡិចត្រូនិក។ តាមរយៈការយល់ដឹងនេះ អ្នកចូលរួមអាចយកស្មារតីទៅផ្សព្វផ្សាយបន្តក្នុងគ្រួសារ សហគមន៍ និងសង្គមជាតិ ដើម្បីរួមចំណែកកសាងសង្គមមួយដែលគ្មានគ្រឿងញៀន និងមានសុខភាពល្អ។
លោកស្រីបានបញ្ជាក់អំពីផលវិបាក និងគ្រោះថ្នាក់ដ៏គួរឱ្យរន្ធត់នៃការប្រើប្រាស់គ្រឿងញៀន ដែលជាក្ដីកង្វល់រួមរបស់សង្គម ព្រមទាំងបានលើកឡើងបន្ថែមពីបញ្ហាមួយទៀតដែលកំពុងជ្រៀតចូលក្នុងស្រទាប់យុវជន គឺ «បារីអេឡិកត្រូនិច (Vape)» ដែលជាគ្រោះថ្នាក់បន្លំខ្លួនថ្មីមួយនាំផ្លូវទៅរកការប្រើប្រាស់គ្រឿងញៀនខុសច្បាប់។
យោងតាមច្បាប់ស្តីពីការត្រួតពិនិត្យគ្រឿងញៀន បានកំណត់យ៉ាងច្បាស់អំពីទម្ងន់ទោសទណ្ឌធ្ងន់ធ្ងរ ទាំងការជួញដូរ ការចាត់ចែង ការរក្សាទុក និងការប្រើប្រាស់ខុសច្បាប់ ដែលជនល្មើសត្រូវប្រឈមមុខនឹងការពិន័យជាប្រាក់ និងការផ្តន្ទាទោសដាក់ពន្ធនាគាររយៈពេលវែង។
ការយល់ដឹងពីច្បាប់ គឺជា «ខែលការពារ» ដ៏មានប្រសិទ្ធភាពបំផុតសម្រាប់យុវជនក្នុងការជៀសឱ្យឆ្ងាយពីសំណាញ់ច្បាប់ និងអបាយមុខទាំងនេះ។
ទន្ទឹមនឹងនោះដែរ លោកស៊ី សួន អភិបាលរងខេត្តស្ទឹងត្រែង បានមានប្រសាសន៍ជំរុញ និងក្រើនរំលឹកដល់គ្រប់តួអង្គពាក់ព័ន្ធទាំងអស់ ត្រូវពង្រឹងកិច្ចសហការគ្នាយ៉ាងជិតស្និទ្ធ ដើម្បីឈានទៅលុបបំបាត់ឱ្យបានដាច់ខាតនូវរាល់បទល្មើសគ្រឿងញៀនក្នុងសហគមន៍មូលដ្ឋាន។
លោកបានអំពាវនាវដល់អ្នកចូលរួមទាំងអស់ ជាពិសេសសិស្សានុសិស្ស ត្រូវយកចំណេះដឹងផ្នែកច្បាប់ដែលទទួលបានពីវេទិកានេះ យកទៅចែករំលែកបន្តដល់មិត្តភក្តិ គ្រួសារ និងសហគមន៍របស់ខ្លួន ដើម្បីឱ្យគ្រប់គ្នាបានដឹងពីវិធានការច្បាប់ ផលវិបាកសុខភាព និងទោសទណ្ឌធ្ងន់ធ្ងរពេលប៉ះពាល់ដល់គ្រឿងញៀន។
ពិធីផ្សព្វផ្សាយនេះមិនត្រឹមតែជាវេទិកាចែករំលែកចំណេះដឹងផ្នែកច្បាប់ប៉ុណ្ណោះទេ ប៉ុន្តែវាក៏ជាស្មារតីរួមគ្នាមួយក្នុងការជំរុញឱ្យយុវជនជំនាន់ក្រោយក្លាយជាទំពាំងស្នងឫស្សីដ៏មានតម្លៃ និងជាភ្នាក់ងារនៃការផ្លាស់ប្តូរវិជ្ជមានក្នុងសង្គមឆ្ពោះទៅរកការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព» ប្រកបដោយជោគជ័យ៕
