(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងារគ្រប់គ្រងការផ្សព្វផ្សាយពាណិជ្ជកម្មផលិតផលគ្រឿងស្រវឹង (ក.គ.ផ.ស.) បានអំពាវនាវដោយផ្ទាល់ទៅកាន់គ្រប់ភាគីពាក់ព័ន្ធទាំងអស់ ឱ្យចូលរួមអនុវត្តយុទ្ធនាការ «ឆន្ទៈល្អលើកទី២» ដើម្បីផ្សព្វផ្សាយគ្រឿងស្រវឹងប្រកបដោយការទទួលខុសត្រូវ។

ការអំពាវនាវនេះធ្វើឡើងក្នុងឱកាសអញ្ជើញបើកយុទ្ធនាការ «ឆន្ទៈល្អ លើកទី២» នៅថ្ងៃទី២៨ ខែតុលា ឆ្នាំ២០២៦ ក្រោមប្រធានបទ «បន្តពង្រឹងការអនុវត្តវិធានការចាំបាច់នានាក្នុងការគ្រប់គ្រងការផ្សព្វផ្សាយពាណិជ្ជកម្មផលិតផលគ្រឿងស្រវឹង និងភេសជ្ជៈដែលមានជាតិស្ករ ដើម្បីលើកកម្ពស់សុខុមាលភាពប្រជាពលរដ្ឋ»។ ខ្លឹមសារទាំងនោះរួមមាន៖

*ចំពោះក្រុមហ៊ុនផលិត អ្នកនាំចូល និងអ្នកចែកចាយ៖ សូមកុំរង់ចាំឱ្យមានការណែនាំ ឬការព្រមានទើបធ្វើការកែសម្រួល។ សូមបង្កើតប្រព័ន្ធ compliance នៅក្នុងក្រុមហ៊ុន។ រាល់យុទ្ធនាការទីផ្សារ រាល់សារផ្សាយ រាល់ការឧបត្ថម្ភ និងរាល់សកម្មភាព Promotion គួរត្រូវបានពិនិត្យមុនចេញផ្សាយ។

*ចំពោះទីភ្នាក់ងារផ្សព្វផ្សាយពាណិជ្ជកម្ម៖ អ្នកមិនមែនគ្រាន់តែជាអ្នកបញ្ជូនសាររបស់អតិថិជនទេ។ អ្នកក៏មានទំនួលខុសត្រូវផ្នែកវិជ្ជាជីវៈ។ ភាពច្នៃប្រឌិត Creativity មិនគួរត្រូវបានប្រើដើម្បីស្វែងរកចន្លោះច្បាប់ទេ។ Creativity ត្រូវប្រើដើម្បីរកវិធីផ្សាយដែលទាក់ទាញ ប៉ុន្តែសមស្រប និងមានទំនួលខុសត្រូវ។

*ចំពោះសិល្បករ សិល្បការិនី អ្នកផលិតមាតិកា និង Influencers៖ ចំនួនអ្នកតាមដាន គឺជាឥទ្ធិពល។ ហើយឥទ្ធិពលតែងតែភ្ជាប់ជាមួយការទទួលខុសត្រូវ។
មុនទទួលការងារផ្សព្វផ្សាយ សូមសួរខ្លួនឯងថា តើខ្លឹមសារនេះអាចទៅដល់អនីតិជនដែរ ឬទេ?​ តើវាអាចជំរុញការប្រើប្រាស់ខុសគោលដៅដែរ​ ឬទេ? តើវាបំផ្លើសការពិតដែរ ឬទេ? តើវាស្របនឹងច្បាប់ និងក្រមសីលធម៌ដែរ ឬទេ? Influencer ដែលមានទំនួលខុសត្រូវ មិនគ្រាន់តែការពារអ្នកតាមដានទេ គេក៏ការពារកិត្តិយស និងអាជីពរបស់ខ្លួនផងដែរ។

*ចំពោះអង្គភាពសារព័ត៌មាន និងប្រព័ន្ធផ្សព្វផ្សាយ៖ យើងយល់ច្បាស់ថា ចំណូលពីការផ្សាយពាណិជ្ជកម្មមានសារៈសំខាន់ចំពោះនិរន្តរភាពរបស់ប្រព័ន្ធផ្សព្វផ្សាយ។ ប៉ុន្តែការទទួលចំណូល មិនអាចជំនួសការទទួលខុសត្រូវវិជ្ជាជីវៈបានទេ។ ប្រព័ន្ធផ្សព្វផ្សាយដែលមានតម្លៃ គឺប្រព័ន្ធផ្សព្វផ្សាយដែលអាចធ្វើអាជីវកម្មបាន និងរក្សាទំនុកចិត្តសាធារណៈបានក្នុងពេលតែមួយ។

*ចំពោះក្រសួង ស្ថាប័ន និងរដ្ឋបាលថ្នាក់ក្រោមជាតិ៖ ត្រូវបន្តសហការជិតស្និទ្ធជាមួយក្រុមការងារគ្រប់គ្រងការផ្សព្វផ្សាយពាណិជ្ជកម្មផលិតផលគ្រឿងស្រវឹង ក្នុងការផ្សព្វផ្សាយ ណែនាំ ត្រួតពិនិត្យ និងចាត់វិធានការតាមសមត្ថកិច្ច និងបទប្បញ្ញត្តិជាធរមាន។

*ការអនុវត្តត្រូវមានមាត្រដ្ឋានតែមួយ។ ក្រុមហ៊ុនធំ ឬតូច ត្រូវគោរពច្បាប់ដូចគ្នា។ នៅភ្នំពេញ ឬនៅខេត្ត ត្រូវមានស្តង់ដារដូចគ្នា។ Offline ឬ Online ត្រូវមានទំនួលខុសត្រូវដូចគ្នា។

*ចំពោះបងប្អូនប្រជាពលរដ្ឋ និងអ្នកប្រើប្រាស់៖ សូមបន្តបង្កើនការយល់ដឹងអំពីសុខភាព សុវត្ថិភាព និងការប្រើប្រាស់ព័ត៌មានដោយការពិចារណា។

អ្នកប្រើប្រាស់មានអំណាចក្នុងការបង្កើតទីផ្សារ។ នៅពេលអ្នកប្រើប្រាស់ជ្រើសរើសផលិតផលដោយគុណភាព មិនតាមរង្វាន់ មិនតាមការអូសទាញហួសហេតុ នោះទីផ្សារក៏នឹងផ្លាស់ប្តូរទៅតាមនោះដែរ។

រដ្ឋមន្ត្រី នេត្រ ភក្ត្រា សូមបញ្ជាក់ជាថ្មីឱ្យបានច្បាស់ថា គោលដៅរបស់រាជរដ្ឋាភិបាលមិនមែនជាការបញ្ឈប់ការធ្វើធុរកិច្ច មិនមែនជាការបិទការផ្សាយពាណិជ្ជកម្ម និងមិនមែនជាការប្រឆាំងនឹងវិស័យឯកជនឡើយ។ គោលដៅរបស់យើងគឺរៀបចំសណ្តាប់ធ្នាប់ទីផ្សារ, ធានាការគោរពច្បាប់, លើកកម្ពស់ការប្រកួតប្រជែងដោយសុចរិត, ការពារសុខុមាលភាពសាធារណៈ និងជំរុញឱ្យអាជីវកម្មកម្ពុជារីកចម្រើនដោយទទួលខុសត្រូវ។ យើងចង់ឃើញក្រុមហ៊ុនរីកចម្រើន៕