(ភ្នំពេញ)៖ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានថ្លែងអំពាវនាវដល់ថ្នាក់ដឹកនាំ តាមក្រសួងស្ថាប័នពាក់ព័ន្ធទាំងអស់ រួមកម្លាំងគ្នាជំរុញការងារត្រួតពិនិត្យផលិត ផល ថ្នាំ ជក់ឱ្យ បាន កាន់ តែ ប្រសើរឡើង ដើម្បីការពារមនុស្សជំនាន់នេះ និងជំនាន់ក្រោយពីហានិភ័យនៃការប្រើប្រាស់ផលិតផលថ្នាំជក់ និងការស្រូបផ្សែងផលិតផលថ្នាំជក់។

កាថ្លែងយ៉ាដូច្នេះរបស់លោកសាស្ត្រាចារ្យរដ្ឋមន្ត្រី ក្នុងឳកាសដឹកនាំកិច្ចប្រជុំលើកទី៤ នៃគណៈកម្មាធិការត្រួតពិនិត្យផលិតផលថ្នាំជក់ ក្នុងនាមលោកសាស្ត្រាចារ្យជាប្រធានគណៈកម្មាធិការត្រួតពិនិត្យផលិតផលថ្នាំជក់ ដើម្បីពិនិត្យវឌ្ឍនភាពការងារត្រួតពិនិត្យផលិតផលថ្នាំជក់ និងពិនិត្យសម្រេចលើសេចក្តីព្រាងផែនការយុទ្ធសាស្ត្រ ស្តីពីការត្រួតពិនិត្យផលិតផលថ្នាំជក់២០២៧–២០៣១។

កិច្ចប្រជុំនេះបានប្រព្រឹត្តទៅនៅថ្ងៃទី២៨ ខែតុលា ឆ្នាំ២០២៦ ដែលមានការអញ្ជើញចូលរួមពី អនុប្រធាន និងសមាជិក សមាជិកា នៃគណៈកម្មាធិកាត្រួតពិនិត្យផលិតផលថ្នាំជក់ ដែលអញ្ជើញមកពីក្រសួង ស្ថាប័នពាក់ព័ន្ធ និងរដ្ឋបាលរាជធានី ខេត្តទាំង២៥ ព្រមទាំងតំណាងអង្គភាពពាក់ព័ន្ធ សរុបចំនួន ៨៧រូប។

នាឳកាសនោះលោក សាស្ត្រាចារ្យ រដ្ឋមន្ត្រី បានអំពាវនាវដល់ក្រសួង ស្ថាប័នពាក់ព័ន្ធ រដ្ឋបាល រាជធានី ខេត្ត មន្ទីរសុខាភិបាលរាជធានី ខេត្ត ព្រម ទាំង ភាគី ពាក់ ព័ន្ធ រួមគ្នាបន្តអនុវត្តការងារត្រួតពិនិត្យផលិតផលថ្នាំជក់បន្ថែមទៀត ពិនិត្យ លើបញ្ហាប្រឈមនៃការអនវុត្តអន្តរាគមន៍កន្លងមក កំណត់នូវអាទិភាព យន្តការ និងកិច្ចសហការឱ្យកាន់តែមានប្រសិទ្ធភាពជាងមុន ដើម្បីការពារមនុស្សជំនាន់នេះ និងជំនាន់ថ្មីពីហានិភ័យ នៃការប្រើប្រាស់ផលិតផលថ្នាំជក់ និងការស្រូបផ្សែងផលិតផលថ្នាំជក់។

ក្នុងនោះលោកសាស្ត្រាចារ្យរដ្ឋមន្ត្រីជំរុញដល់រដ្ឋបាលរាជធានី ខេត្ត និងមន្ទីរសុខាភិបាលរាជធានី ខេត្ត ប្រើ ប្រាស់ផែនការយុទ្ធសាស្ត្រ ស្តីពីការត្រួតពិនិត្យផលិតផលថ្នាំជក់ ២០២៧–២០៣១ ដើម្បីធ្វើផែនការប្រចាំឆ្នាំដោយ ដាក់ បញ្ចូលសកម្មភាពការងារត្រួតពិនិត្យផលិតផលថ្នាំជក់ឱ្យមានប្រសិទ្ធភាព។

ពិសេសជំរុញការតាមដាន និងអនុវត្តជាប្រចាំ នូវការបង្ក្រាបផលិតផលថ្នាំជក់ខុសច្បាប់ និងក្លែងក្លាយ និងបារី អេឡិចត្រូនិក ដោយពង្រឹងកិច្ចសហការរវាងស្ថាប័នមានសមត្ថកិច្ច និងអាជ្ញាធររាជធានី-ខេត្ត ក្នុងការតាមដាន និងចាត់វិធានការបង្ក្រាប ទីតាំងផលិតស្តុកទុក និងចែកចាយផលិតផលថ្នាំជក់ខុសច្បាប់ និងក្លែងក្លាយ និងបារីអេឡិចត្រូនិក។

សម្រាប់ក្រសួង ស្ថាប័នពាក់ព័ន្ធ បន្តពង្រឹងការតាមដានការអនុវត្តច្បាប់ និងលិខិតបទដ្ឋានគតិយុត្តស្តីពីការត្រួតពិនិត្យផលិតផលថ្នាំជក់ ជាពិសេសវិធានការហាមឃាត់ការផ្សាយពាណិជ្ជកម្ម ការផ្សព្វផ្សាយលក់ និងការឧបត្ថម្ភកម្មវិធីដោយឧស្សាហកម្មថ្នាំជក់ ការបោះពុម្ពសារព្រមានសុខភាពជារូបភាព និងភាសាខ្មែរលើកញ្ចប់ផលិតផលថ្នាំជក់ និងវិធានការហាមជក់ ឬបង្ហុយផ្សែងថ្នាំជក់នៅកន្លែងធ្វើការ និងកន្លែងសាធារណៈ។

ក្នុងនោះបន្តជំរុញការអប់រំផ្សព្វផ្សាយអំពីផលប៉ះពាល់នៃផលិតផលថ្នាំជក់ និងបារីអេឡិចត្រូនិកឱ្យបានទូលំទូលាយ ជាពិសេសដល់សិស្ស និស្សិត យុវជន មន្ត្រីរាជការ និងប្រជាពលរដ្ឋ បង្កើនការយល់ដឹង និងលើកទឹកចិត្តឱ្យជៀសវាងការចាប់ផ្តើមប្រើប្រាស់ ឬលះបង់ការប្រើប្រាស់។

ជាមួយគ្នាត្រូវពង្រឹងការអនុវត្តបទបញ្ជាលេខ ០២ បប របស់រាជរដ្ឋាភិបាល ស្តីពីការហាមឃាត់ការនាំចូល ការចែកចាយ ការលក់ ការផ្សាយពាណិជ្ជកម្ម ការប្រើប្រាស់ ការកាន់កាប់ ការផលិត និងការស្តុកទុកឧបករណ៍អេឡិចត្រូនិក សារធាតុគីមីសម្រាប់ជក់ និងស៊ីស្សា តាមសមត្ថកិច្ចរបស់ក្រសួង ស្ថាប័ននីមួយៗ ដើម្បីការពារកុមារ និងយុវជនពីផលិតផលដែលបង្កហានិភ័យដល់សុខភាព។

សូមជម្រាបថាកិច្ចប្រជុំនេះបង្ហាញ ពី វឌ្ឍនភាព នៃ ការងារត្រួតពិនិត្យផលិតផលថ្នាំជក់នៅកម្ពុជា តាមរយៈកិច្ចខិតខំប្រឹងប្រែង របស់ ក្រសួងសុខាភិបាល និងក្រសួង ស្ថាប័នពាក់ព័ន្ធ ក្នុងការចូលរួមពង្រឹងការអនុវត្តច្បាប់ អនុក្រឹត្យ និងប្រកាសនានា ស្តីពីការត្រួតពិនិត្យផលិតផលថ្នាំជក់ ការអប់រំផ្លាស់ប្តូរឥរិយាបថ ការជំរុញសេវាផ្តល់ប្រឹក្សា លះបង់ទម្លាប់ ប្រើប្រាស់ផលិតផលថ្នាំជក់ រួម ទាំង ការ បង្ក្រាប ផលិតផល ថ្នាំ ខុស ច្បាប់និង ក្លែងក្លាយ និង បារី អេឡិច ត្រូ និក។

លើស ពី នេះ អង្គ ប្រជុំក៏បាន ពិភាក្សា យ៉ាងផុលផុស ដើម្បី រក ដំណោះ ស្រាយនូវ បញ្ហា ប្រឈមនានា ក្នុង អំឡុងពេល អនុវត្ត ការ ងារត្រួត ពិនិត្យ ផលិត ផល ថ្នាំ ជក់កន្លង មក ព្រមទាំង បានបញ្ចប់ការ ពិនិត្យ និង សម្រេច លើ ផែន ការ យុទ្ធ សាស្ត្រ ស្តី ពីការ ត្រួត ពិនិត្យ ផលិត ផល ថ្នាំ ជក់ ២០២៧-២០៣១ ដោយជោគជ័យផងដែរ៕