រដ្ឋមន្ត្រី ឆាយ ឫទ្ធិសែន ដឹកនាំមន្ដ្រីបច្ចេកទេស ចុះពិនិត្យជាក់ស្ដែងហេដ្ឋារចនាសម្ព័ន្ធផ្លូវជនបទចំនួន ៣ខ្សែ ដែលស្ថិតនៅក្នុងខេត្តបាត់ដំបង
30-10-2026 16:49
(បាត់ដំបង)៖ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមជាមួយថ្នាក់ដឹកនាំ នាថ្ងៃទី៣០ ខែតុលា ឆ្នាំ២០២៦ បានដឹកនាំមន្ដ្រីបច្ចេកទេសក្រសួង និងមន្ទីរអភិវឌ្ឍន៍ជនបទខេត្តបាត់ដំបង អញ្ជើញចុះពិនិត្យជាក់ស្ដែងហេដ្ឋារចនាសម្ព័ន្ធផ្លូវជនបទចំនួន ៣ខ្សែ ដែលស្ថិតនៅក្នុងបាត់ដំបង។
សូមជម្រាបដែរថា ការចុះពិនិត្យផ្លូវចំនួន៣ខ្សែនេះ មានដូចខាងក្រោម៖
ខ្សែទី១៖ ជាផ្លូវក្រាលកៅស៊ូពីរជាន់ (DBST) ល្បាយក្រួស មានប្រវែងសរុប ២២,២១គ.ម. និងមានសំណង់សិល្បការ្យមួយចំនួន ចាប់ផ្ដើមពីសាលាបឋមសិក្សារហាលសួង ក្នុងភូមិរហាលសួង ឃុំព្រែកនរិន្ទ ទៅដល់មាត់ស្ទឹងមង្គលបុរី ក្នុងភូមិបាក់ព្រា ឃុំព្រៃចាស់ ស្រុកឯកភ្នំ ខេត្តបាត់ដំបង។ ខ្សែផ្លូវនេះ តភ្ជាប់រវាងឃុំព្រែកនរិន្ទ និងឃុំព្រៃចាស់ ក្នុងស្រុកឯកភ្នំ ដោយមានប្រជាពលរដ្ឋទទួលដោយផ្ទាល់ និងដោយប្រយោលសរុបចំនួន ៥ ១០៧គ្រួសារ ស្មើនឹង ៤៥ ៩៦៦នាក់។
ខ្សែទី២៖ ជាផ្លូវក្រាលល្បាយក្រួសក្រហម ទទឹង ៥ម៉ែត្រ មានប្រវែងសរុប ១៧,៨៦គ.ម. ចាប់ផ្ដើមពីផ្លូវជាតិលេខ៥ ត្រង់ចំណុចភូមិអូរគ្រាត ឃុំព្រែកជីក ស្រុកមោងឫស្សី ទៅដល់ភូមិបាសាក់ ឃុំបាសាក់ ស្រុករុក្ខគីរី ខេត្តបាត់ដំបង។ ខ្សែផ្លូវនេះ មានប្រជាពលរដ្ឋទទួលដោយផ្ទាល់ និងដោយប្រយោលសរុបចំនួន ៥ ០៤៥គ្រួសារ ស្មើនឹង ២៦ ៧២២នាក់។ ផ្លូវនេះ ត្រូវបានក្រសួងអភិវឌ្ឍន៍ជនបទ ដាក់បញ្ចូលទៅក្នុងក្របខ័ណ្ឌគម្រោងដៃគូអភិវឌ្ឍន៍ ដើម្បីលើកកម្រិតគុណភាពទៅជាផ្លូវដែលធន់នឹងការប្រែប្រួលអាកាសធាតុ នាពេលខាងមុខនេះ។
ខ្សែទី៣៖ ជាផ្លូវគម្រោងថែទាំផ្លូវឆ្អឹងខ្នងជនបទ ដែលជាផ្លូវក្រាលកៅស៊ូពីរជាន់ (DBST) មានប្រវែងសរុប ៣៩,២២គ.ម.ទទឹង ៥,៥ម៉ែត្រ អនុវត្តដោយនាយកដ្ឋានអភិវឌ្ឍន៍ហេដ្ឋារចនាសម្ព័ន្ធផ្លូវជនបទ នៃក្រសួងអភិវឌ្ឍន៍ជនបទ។ ផ្លូវនេះ ចែកជាពីរកំណាត់ រួមមាន កំណាត់ទី១៖ មានប្រវែង ២៤,៧២គ.ម. ចាប់ផ្ដើមពីផ្លូវជាតិលេខ៥ ត្រង់ចំណុចភូមិព្រៃស្វាយ ឃុំព្រៃស្វាយ ស្រុកមោងឫស្សី ទៅដល់ភូមិស្ដុកប្រវឹក ឃុំស្ដុកប្រវឹក ស្រុករុក្ខគីរី ស្ថិតក្នុងក្របខ័ណ្ឌគម្រោងកែលម្អផ្លូវជនបទជំហានទី១ និងកំណាត់ទី២ មានប្រវែង ១៤,៥០គ.ម. ចាប់ផ្ដើមពីភូមិស្ដុកប្រវឹក ឃុំស្ដុកប្រវឹក ទៅដល់ភូមិស្វាយយ៉ ឃុំមុខរា ស្រុករុក្ខគីរី ស្ថិតក្នុងក្របខ័ណ្ឌគម្រោងកែលម្អផ្លូវជនបទជំហានទី២។
គួរជម្រាបជូនដែរថា ការអញ្ជើញចុះពិនិត្យស្ថានភាពផ្លូវខាងលើនេះ ក្នុងគោលបំណងដើម្បីពិនិត្យស្ថានភាពជាក់ស្តែង និងធ្វើសិក្សាលទ្ធភាពក្នុងការស្ថាបនា និងជួសជុលផ្លូវនេះឱ្យក្លាយជាផ្លូវដែលធន់នឹងការប្រែប្រួលអាកាសធាតុ ជូនប្រជាពលរដ្ឋក្នុងតំបន់នោះប្រើប្រាស់ ព្រមទាំងជួយក្នុងការលើកកម្ពស់សក្ដានុពលទេសចរណ៍ ក្នុងតំបន់នោះផងដែរ៕
