លោកកិត្តិសេដ្ឋាបណ្ឌិត ឆាយ ថន និងលោក ហ៊ុន ម៉ានី ដឹកនាំកិច្ចប្រជុំលទ្ធផលការងារប្រចាំខែតុលា និងលើកទិសដៅភារកិច្ចខែវិច្ឆកា ឆ្នាំ២០២៦ នៅមន្ទីរគណបក្សខេត្តកំពង់ស្ពឺ
31-10-2026 15:27
(កំពង់ស្ពឺ)៖ នាព្រឹកថ្ងៃទី៣១ ខែតុលា ឆ្នាំ២០២៦នេះ លោកកិត្តិសេដ្ឋាបណ្ឌិត ឆាយ ថន និងលោក ហ៊ុន ម៉ានី សមាជិកគណៈអចិន្ត្រៃយ៍គណៈកម្មាធិការកណ្តាល ប្រធានក្រុមការងារគណបក្សចុះមូលដ្ឋានខេត្ត បានដឹកនាំកិច្ចប្រជុំលទ្ធផលការងារប្រចាំខែតុលា និងលើកទិសដៅកាងារខែវិច្ឆិកា ឆ្នាំ២០២៦ នៅមន្ទីរគណបក្សខេត្តកំពង់ស្ពឺ។
កិច្ចប្រជុំនេះមានការចូលរួមពីលោក លោកស្រី សមាជិកគណៈកម្មាធិការកណ្តាល សមាជិកគណៈកម្មាធិការគណបក្សខេត្ត ប្រធានក្រុមការងារគណបក្សចុះមូលដ្ឋានក្រុង ស្រុក សរុបប្រមាណ៤៥០នាក់ នៅសាលប្រជុំធំ នៃមន្ទីរគណបក្សខេត្តកំពង់ស្ពឺ។
បន្ទាប់ពីបានស្តាប់របាយការណ៍ និងការពិភាក្សា ផ្តល់មតិយោបល់ពីក្រុមការងារគណបក្សគ្រប់ថ្នាក់នៅមូលដ្ឋានពីលទ្ធផលការងារ បញ្ហាប្រឈមនានា ពេលអនុវត្តការងារនាកន្លងមក លោក ហ៊ុន ម៉ានី បានដាក់ចេញនូវទិសដៅការងារសំខាន់ៗ សម្រាប់ក្រុមការងារគ្រប់ថ្នាក់ដើម្បីអនុវត្តរួមមាន៖
*១៖ ជំរុញការពិនិត្យបញ្ជីឈ្មោះ និងចុះឈ្មោះបោះឆ្នោត សូមលោក លោកស្រីប្រធានក្រុមការងារគណបក្សចុះមូលដ្ឋានឃុំ សង្កាត់ ជាពិសេសគណៈកម្មាធិការបក្សឃុំ សង្កាត់ និងគណៈកម្មាធិការសាខាបក្សភូមិ បន្តជំរុញដល់បងប្អូន កូនក្មួយ សមាជិកបក្ស ដែលមិនទាន់បានចុះឈ្មោះបោះឆ្នោត អ្នកដែលទើបគ្រប់អាយុចុះឈ្មោះបោះឆ្នោត និងអ្នកមិនទាន់ធ្វើជីវមាត្រ ឬត្រូវប្តូរសុពលភាពអត្តសញ្ញាណប័ណ្ណឱ្យរួសរាន់ទៅចុះឈ្មោះបោះឆ្នោត ធ្វើជីវមាត្រ និងផ្លាស់ប្តូរទិន្នន័យឱ្យបានគ្រប់ៗគ្នា
*២៖ ជំរុញការអនុវត្ត គោលនយោបាយ ភូមិ ឃុំ សង្កាត់ មានសុវត្ថិភាព ដោយពង្រឹងវិធានការទប់ស្កាត់ និងប្រយុទ្ធប្រឆាំងនឹងការជួញដូរ និងការប្រើប្រាស់គ្រឿងញៀនខុសច្បាប់ ក្រុមក្មេងទំនើង និងបន្តអនុវត្តវិធានការបង្ការ បង្ក្រាប និងលុបបំបាត់រាល់បទល្មើសពាក់ព័ន្ធនឹងការឆបោកតាមប្រព័ន្ធអនឡាញ (Online Scam) ឱ្យមានប្រសិទ្ធភាពដោយអនុវត្តឱ្យបានម៉ឺងម៉ាត់
*៣៖ ចូលរួម និងរៀបចំកម្មវិធីបុណ្យនានា នៅតាមមូលដ្ឋានរៀងៗខ្លួនព្រមទាំងរួមគ្នាថែរក្សាសន្តិសុខ សុវត្ថិភាព សណ្ដាប់ធ្នាប់សាធារណៈ ជូនប្រជាពលរដ្ឋ និងថែរក្សាអនាម័យបរិស្ថានឱ្យបានល្អ
*៤៖ ពង្រឹងរចនាសម្ព័ន្ធបក្សមូលដ្ឋាន និងការគ្រប់គ្រងសមាជិកបក្ស ត្រូវមានទំនាក់ទំនងល្អ សាមគ្គីភាពផ្ទៃក្នុង រួមគ្នាដោះស្រាយរាល់បញ្ហាដែលកើតមានឡើងនៅមូលដ្ឋាន របស់ប្រជាពលរដ្ឋឱ្យទាន់ពេលវាលា និងមានប្រសិទ្ធភាព៕
