(ពោធិ៍សាត់)៖ ក្នុងបរិយាកាសនៃកិច្ចសហប្រតិបត្តិការដ៏ជិតស្និទ្ធ និងស្មារតីមនោសញ្ចេតនាដ៏ជ្រាលជ្រៅ រវាងខេត្តទាំងពីរ, គណៈប្រតិភូសមាគមអតីតយុទ្ធជន និងនិវត្តជនកម្ពុជាខេត្តពោធិ៍សាត់ ដឹកនាំដោយ លោក ហៀម ឃួន អភិបាលរងនៃគណៈអភិបាលខេត្ត និងជាអនុប្រធានសមាគម តំណាងលោក ខូយ រីដា អភិបាលនៃគណៈអភិបាលខេត្ត និងជាប្រធានសមាគមអតីតយុទ្ធជន និងនិវត្តជនកម្ពុជាខេត្ត បានអញ្ជើញបំពេញទស្សនកិច្ចសិក្សា ស្វែងយល់ពីសក្តានុពលសេដ្ឋកិច្ច-សង្គម និងផ្លាស់ប្តូរបទពិសោធន៍ មានរយៈពេល៤ថ្ងៃ គិតចាប់ពីថ្ងៃទី០១-០៤ ខែវិច្ឆិកា ឆ្នាំ២០២៦ តាមការអញ្ជើញ និងរៀបចំយ៉ាងយកចិត្តទុកដាក់ ពីសំណាក់គណៈកម្មាធិការសមាគមអតីតយុទ្ធជនខេត្តដុងថាប់ នៃសាធារណរដ្ឋសង្គមនិយមវៀតណាម។

ដំណើរទស្សនកិច្ចនេះ មិនត្រឹមតែជួយពង្រឹងទំនាក់ទំនងមិត្តភាពរវាងខេត្តពោធិ៍សាត់ និងខេត្តដុងថាប់ប៉ុណ្ណោះទេ ប៉ុន្តែថែមទាំងជាឱកាសក្នុងការសិក្សារៀនសូត្រពីគំរូអភិវឌ្ឍន៍លើវិស័យកសិកម្មបច្ចេកវិទ្យា ឧស្សាហកម្មកែច្នៃ ការបង្កើតការងារធ្វើជូនគ្រួសារអតីតយុទ្ធជន ថាមពលកកើតឡើងវិញ និងការបន្តរក្សាប្រពៃណីប្រវត្តិសាស្ត្រដ៏ផូរផង់ផងដែរ។

ជាកិច្ចចាប់ផ្តើមនៃដំណើរការបេសកកម្ម លោក ហៀម យួន ព្រមទាំងសមាជិកគណៈប្រតិភូ បានអញ្ជើញចូលរួម ពិធីគោរពវិញ្ញាណក្ខន្ធយ៉ាងឱឡារិក នៅទីបញ្ចុះសពយុទ្ធជនពលី ក្រុងមីថ ខេត្តដុងថាប់ ដើម្បីសម្តែងនូវការដឹងគុណយ៉ាងជ្រាលជ្រៅចំពោះវីរភាព និងការលះបង់ដ៏ធំធេងរបស់យុទ្ធជនពលីក្នុងបុព្វហេតុជាតិ និងប្រជាជន។

*គណៈប្រតិភូបានអញ្ជើញទៅទស្សនា កសិដ្ឋានចិញ្ចឹមពស់ ដុង តាំ (Dong Tam) ដែលជាមជ្ឈមណ្ឌលស្រាវជ្រាវ និងថែទាំសត្វពស់ដ៏ល្បីល្បាញ ដែលផ្តល់នូវចំណេះដឹងថ្មីៗ ស្តីពីការផលិតថ្នាំពេទ្យ និងការអភិរក្សជីវចម្រុះក្នុងតំបន់។

*គណៈប្រតិភូបានអញ្ជើញចុះពិនិត្យ និងពិភាក្សាការងារផ្ទាល់លើវឌ្ឍនភាព រោងចក្រកាត់ដេរ និងកែច្នៃសម្លៀកបំពាក់ CTY TNHH SXTMDV HOAN VINH ដែលជារោងចក្ររបស់ លោក BANG KHEN អនុប្រធានសមាគមអតីតយុទ្ធជនខេត្តដុងថាប់។ ដំណើរទស្សនកិច្ចនេះបានផ្តោតជាសំខាន់លើកិច្ចខិតខំប្រឹងប្រែង ក្នុងការបង្កើតការងារធ្វើ និងផ្តល់ឱកាសរកចំណូលជូនដល់កូនៗរបស់អតីតយុទ្ធជន។

*គណៈប្រតិភូក៏បានអញ្ជើញទៅទស្សនា ឆ្នេរសមុទ្រ និងទំនប់ការពារឆ្នេរសមុទ្រ ហឿង ប៊ៀន (Huong Bien) ស្ថិតនៅតំបន់មាត់ទឹក/ឆ្នេរ ក្នុងតំបន់វាលទំនាបទន្លេមេគង្គ ភាគខាងត្បូងប្រទេសវៀតណាម។ បន្ថែមពីនោះ ទីតាំងនេះក៏ជាតំបន់កង្ហារដើរដោយខ្យល់ ផលិតអគ្គិសនី ដ៏មានសក្តានុពលក្នុងការអភិវឌ្ឍថាមពលបៃតង និងស្អាតសម្រាប់តំបន់ផង។

*ជាមួយគ្នានោះ ក្នុងស្មារតីរំឭកដឹងគុណប្រវត្តិសាស្ត្រ គណៈប្រតិភូបានអញ្ជើញគោរពវិញ្ញាណក្ខន្ធវីរបុរសជាតិ ទឿង ដិញ (Truong Dinh) ដែលជាវីរបុរសជាតិដ៏ល្បីល្បាញ ក្នុងកិច្ចតស៊ូប្រដាប់អាវុធប្រឆាំងនឹងការឈ្លានពានរបស់អាណានិគមបារាំង ក្នុងទសវត្សរ៍ឆ្នាំ១៨៦០។

*ទីតាំងចុងក្រោយនៃដំណើរទស្សនកិច្ច គណៈប្រតិភូបានអញ្ជើញទស្សនា សហករណ៍កសិកម្ម ហុង ធីញ ផាត់ (HƯNG THỊNH PHÁT) ដែលជាមជ្ឈមណ្ឌលទទួលទិញ ការវេចខ្ចប់ និងការនាំចេញកសិផលសំខាន់ៗ រួមមាន ផ្លែដូង និងស្រកានាគសាច់ក្រហម និងស ឆ្ពោះទៅកាន់ទីផ្សារអន្តរជាតិ ដែលជាបទពិសោធន៍ដ៏មានតម្លៃ ក្នុងការអភិវឌ្ឍវិស័យកសិកម្មទំនើប។

តាមរយៈដំណើរទស្សនកិច្ចសិក្សាផ្លាស់ប្តូរបទពិសោធន៍នេះ បានឆ្លុះបញ្ចាំងពីកិច្ចសហប្រតិបត្តិការដ៏រស់រវើក ការយល់ដឹងពីសក្តានុពលសេដ្ឋកិច្ច-សង្គមទៅវិញទៅមក និងការពង្រឹងចំណងមិត្តភាពដ៏ល្អប្រសើរ រវាងខេត្តពោធិ៍សាត់ និងខេត្តដុងថាប់ ឱ្យកាន់តែរឹងមាំថែមទៀតក្នុងនាមជាអ្នកជិតខាងល្អ និងដៃគូអភិវឌ្ឍន៍រួមគ្នា៕