(ភ្នំពេញ)៖ នារសៀលថ្ងៃពុធ ទី៤ ខែវិច្ឆិកា ឆ្នាំ២០២៦ លោក Randy Cassingham ដែលជាអ្នកដំណើរម្នាក់ មកពីកប៉ាល់ទេសចរណ៍ Villa Vie Odyssey បានចេញមុខបកស្រាយការយល់ច្រឡំ ដែលថារូបលោកបានហៅក្រុងព្រះសីហនុរបស់ប្រទេសកម្ពុជា ថាជាទីក្រុងឆបោក ឬ ទីក្រុង Scam។

កាលពីថ្ងៃទី១ ខែវិច្ឆិកា ឆ្នាំ២០២៦ សារព័ត៌មានថៃ Khaosod បានចុះផ្សាយអត្ថបទមួយ ពាក់ព័ន្ធនឹងកប៉ាល់ទេសចរណ៍ឈ្មោះ Villa Vie Odyssey ដែលក្រុមហ៊ុនរបស់ខ្លួនជួបវិបត្តិក្ស័យធន ជាហេតុនាំឱ្យកប៉ាល់នោះ រួមទាំងអ្នកដំណើរជាច្រើននាក់ ត្រូវជាប់គាំងនៅក្រុងព្រះសីហនុ។ ក្នុងអត្ថបទនោះ មានសម្រង់សម្តីត្រូវបានអះអាងជាសម្តីរបស់លោក Randy Cassingham ដែលនិយាយដូច្នេះថា «យើងបានចុះឈ្មោះសម្រាប់​ការធ្វើដំណើរជុំវិញពិភពលោក ប៉ុន្តែនៅពេលនេះ យើងបែរជាត្រូវជាប់ខ្លួននៅទីក្រុង Scam»។ អត្ថបទរបស់សារព័ត៌មាន Khaosod ហាក់ជាអត្ថបទចុះផ្សាយបន្តពីអត្ថបទដើមរបស់កាសែតអង់គ្លេស Financial Times។

យ៉ាងណាមិញ លោក Randy Cassingham បានបង្ហោះសារបកស្រាយលើបណ្តាញ Facebook ថា ការចុះផ្សាយរបស់ Khaosod គឺជាអត្ថបទឃោសនាបង្កការយល់ច្រឡំមួយប៉ុណ្ណោះ។ លោកបានគូសរំលេចថា កម្ពុជានិងថៃកន្លងមកបានផ្ទុះសង្រ្គាមនឹងគ្នា ហើយ Khaosod គឺជាប្រព័ន្ធផ្សព្វផ្សាយមួយរបស់ប្រទេសថៃ។ លោក Cassingham បានបន្តថា កាសែត Financial Times ខ្លួនឯងឯណោះទេ ដែលជាអ្នកលើកឡើងអំពីពាក្យ «ទីក្រុងស្កេម» ដ្បិតរូបលោកមិនដែលទាំងលឺពាក្យនេះឡើយពីមុនមក។

លោក Randy Cassingham បានសង្កត់ធ្ងន់ថា ប្រជាជនខ្មែរគ្រប់រូប ដែលរូបលោកបានជួប អំឡុងពេលស្ថិតក្នុងប្រទេសកម្ពុជា សុទ្ធតែមានភាពថ្លៃថ្នូរ រួសរាយរាក់ទាក់ ទឹកចិត្តល្អ និងជួយយកអាសាជាខ្លាំង ហើយរូបលោកទទួលបានការស្វាគមន៍យ៉ាងកក់ក្តៅ ទាំងពីសំណាក់ប្រជាពលរដ្ឋទូទៅ ក៏ដូចជាពីអាជ្ញាធរនិងមន្រ្តីរដ្ឋាភិបាលកម្ពុជា ដូច្នេះហើយទើបរូបលោក និងភរិយាមិនប្រញាប់ប្រញាល់ចង់​ចាកចេញពីកម្ពុជា ក្នុងពេលឆាប់ៗឡើយ។

ជាចុងក្រោយ លោក Cassingham និយាយថា រូបលោកមិនពេញចិត្តជាខ្លាំង ដែលឈ្មោះនិងមុខរបស់​លោក ត្រូវបានគេប្រើប្រាស់ ក្នុងគោលបំណងឃោសនាបង្កការយល់ច្រឡំ ដែលខុសស្រឡះពីការពិត៕