ជួបផ្ទាល់ផលបានទៅប្រជាពលរដ្ឋ, ពលរដ្ឋមានជំងឺរ៉ាំរ៉ៃ៣នាក់ ទទួលបានការព្យាបាលក្រោយជួបសម្តេចមហាបវរធិបតី
06-11-2026 15:54
(ភ្នំពេញ)៖ ប្រជាពលរដ្ឋមានជំងឺរ៉ាំរ៉ៃ៣នាក់ ទទួលបានការព្យាបាលជំងឺពីក្រុមគ្រូពេទ្យ បន្ទាប់ពីបានជួបផ្ទាល់ជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងពិធីចែកពូជស្រូវ និងស្បៀងអាហារនៅខេត្តពោធិ៍សាត់ នាថ្ងៃទី៥ ខែវិច្ឆិកា ឆ្នាំ២០២៦។
ក្នុងពិធីម្សិលមិញនេះ សម្តេចមហាបវរធិបតី បានជួបសំណេះសំណាលផ្ទាល់ជាមួយប្រជាពលរដ្ឋលើតម្រាយផ្លូវទៅកាន់វេទិកាកិត្តិយស។ តាមរយៈការសំណេះសំណាលនោះ សម្តេចបានជួបពលរដ្ឋ៣នាក់មានជំងឺប្រចាំកាយ។
ពលរដ្ឋទាំង៣នាក់នោះរួមមាន៖ ១) លោក ប្រាក់ រ៉ន អាយុ ៤៦ឆ្នាំ មកព្យាបាលជំងឺភ្នែកខាងឆ្វេងដែលជាភ្នែកសិប្បនិម្មិត, ២) លោក ណែម ភឿន អាយុ ៥៧ឆ្នាំ មានជំងឺទឹកដក់ក្នុងភ្នែកទាំងសងខាងរ៉ាំរ៉ៃ និងទី៣) លោក យិន ប៊ុនធឿន អាយុ ៥៩ឆ្នាំ មានជំងឺរលាកទងសួតរ៉ាំរ៉ៃ។
ក្រោយទទួលបានព័ត៌មានពីស្ថានភាពជំងឺរបស់ប្រជាពលរដ្ឋខាងលើនេះ សម្តេចមហាបវរធិបតី បានចាត់បានក្រុមគ្រូពេទ្យរបស់សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) រៀបចំការព្យាបាលជូនគាត់។
អ្នកជំងឺទាំង៣ ត្រូវបាននាំមកព្យាបាលអស់ហើយ។ លោក ប្រាក់ រ៉ន ត្រូវបន្តក់ថ្នាំបន្ថយការរលាក និងដាក់គ្រាប់ភ្នែកសិប្បនិម្មិតថ្មី នៅមន្ទីរពេទ្យព្រះអង្គឌួង ស្ថិតក្នុងរាជធានីភ្នំពេញ។ លោក ណែម ភឿន សម្រាកព្យាបាលជំងឺទឹកដក់ក្នុងភ្នែកទាំងសងខាងរ៉ាំរ៉ៃ នៅមន្ទីរពេទ្យព្រះអង្គឌួង។
រីឯលោក យិន ប៊ុនធឿន ទទួលការព្យាបាលជំងឺរលាកទងសួតរ៉ាំរ៉ៃ នៅមន្ទីរពេទ្យមិត្តភាពកម្ពុជា-ចិន ព្រះកុសុមៈ។
រាល់ការចំណាយទាំងអស់ក្នុងការព្យាបាល ថ្លៃអាហារប្រចាំថ្ងៃ និងថ្លៃធ្វើដំណើរត្រូវបានទំនុកបម្រុងទាំងស្រុងដោយសម្តេចមហាបវរធិបតី និងលោកជំទាវបណ្ឌិត។
តាមរយៈកាយវិការទាំងនេះ បានស្តែងឱ្យឃើញពីការយកចិត្តទុកដាក់របស់សម្តេចមហាបវរធិបតី និងលោកជំទាវបណ្ឌិត រាល់ពេលបានជួបពលរដ្ឋមានបញ្ហាសុខភាព តែងចាត់ចែងការព្យាបាល។
បញ្ហាសុខភាព គឺជាទុក្ខកង្វល់នៅក្នុងជីវិតប្រជាពលរដ្ឋ។ អាស្រ័យបែបនេះហើយ ទើបសម្តេចនាយករដ្ឋមន្ត្រី និងលោកជំទាវបណ្ឌិត បានគិតគូរខ្ពស់ដល់យន្តការនៃការផ្តល់សេវាផ្នែកសុខាភិបាល ដូចជាការពង្រីកបណ្ណមូលនិធិសមធម៌ផ្នែកសុខាភិបាល និងការពង្រីកសេវាតាមមណ្ឌលសុខភាព និងមន្ទីរពេទ្យបង្អែកស្រុកជាដើម៕
