(ភ្នំពេញ)៖ លោកស្រីបណ្ឌិត អ៊ុក ម៉ាលី តំណាងដ៏ខ្ពង់ខ្ពស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន និងពុទ្ធបរិស័ទយ៉ាងច្រើនកុះករ បានអញ្ជើញដង្ហែកឋិនទានសាមគ្គី ចូលវត្ដមុន្នីសុវណ្ណ ហៅវត្ដចំពុះក្អែក ស្ថិតនៅភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។

កឋិនទានមហាសាមគ្គីនេះផងដែរ ក៏មានការអញ្ជើញចូលរួមពី លោកស្រី សូ ភត្ដ្រា ចាយ បូរិន និងថ្នាក់ថ្នាក់ដឹកនាំ រួមទាំងភរិយាថ្នាក់ដឹកនាំជាច្រើនរូបទៀត។ កឋិនទាន គឺជាពិធីបុណ្យក្នុងសាសនាព្រះពុទ្ធសាសនា ដែលមានចែងព្រះវិន័យ។ រយៈកាលនៃការធ្វើបុណ្យកឋិនទាន មានតែ ២៩ថ្ងៃ គឺ ចាប់ពីថ្ងៃ ១រោចខែអស្សុជ ដល់ ថ្ងៃ ១៥កើតខែកត្តិក។ ការធ្វើបុណ្យកឋិនទាននេះ ត្រូវបានគេចាត់ទុកថាជាការធ្វើទានដ៏ពិសេសមួយ ដែលមានការកំណត់ពេលវេលាដ៏ច្បាស់លាស់។

ដូច្នេះក្នុងឱកាសបុណ្យកឋិនទានមហាសាមគ្គីនាថ្ងៃនេះ គឺជាថ្ងៃមួយប្រកបដោយមហានក្ខត្ដឬក្សមណ្ឌលដ៏ឧត្ដម ឋិតនៅក្នុងអភិលក្ខិតសម័យ ជាសិរីសួស្ដីជោគជ័យដ៏ឧត្ដុងឧត្ដមបរមសុខាមហាប្រសើរ។ សទ្ធាជ្រះថ្លាដ៏ជ្រាលជ្រៅនៅក្នុងព្រះពុទ្ធសាសនា បានមូលមតិគ្នាជាឯកច្ឆ័ន្ធផ្ដួចផ្ដើមប្រារព្ធពិធីបុណ្យកឋិកទានមហាសាមគ្គី ដើម្បីវេរប្រគេនចំពោះព្រះសង្ឃដែលគង់ចាំព្រះវស្សាអស់កាលត្រីមាសក្នុងព័ទ្ធសីមា ទីអារាមជាញជ័យនៃវត្ដមុន្នីសុវណ្ណ ហៅវត្ដចំពុះក្អែក ដែលមានសម្ដេចព្រះមហាសុមេធាធិបតីកិត្ដិបណ្ឌិត អំ លឹមហេង សម្តេចព្រះសង្ឃនាយក គណៈមហានិកាយ នៃព្រះរាជាណាចក្រកម្ពុជា ជាអម្ចាស់ជាព្រះអធិបតីដ៏ខ្ពង់ខ្ពស់ជាទីបំផុត។

បុណ្យកឋិនទាន ប្រារព្ធឡើងក្នុងគោលបំណងសំខាន់ៗមួយចំនួនដូចខាងក្រោម ដើម្បីបង្កើនសាមគ្គីភាពរវាងបុគ្គល គ្រួសារ និងសង្គម, ទ្រទ្រង់ព្រះពុទ្ធសាសនាឱ្យបានចំរើនរុងរឿងគង់វង្សស្ថិតស្ថេរនៅយូរអង្វែង,ផ្តល់កម្លាំងកាយ ចិត្តដល់ព្រះភិក្ខុសង្ឃ បុគ្គលជាសាសនទាយាទបន្តអាយុព្រះពុទ្ធសាសនាតទៅ,ដើម្បីបានថ្វាយឧបការៈ ទំនុកបម្រុងឧបត្ថម្ភព្រះភិក្ខុសាមណេរ ដែលជាមហាកុសលដ៏ប្រសើរ និងដើម្បីកុំឱ្យកើតសេចក្តីប្រមាថចំពោះមហាកុសលរបស់ខ្លួន។

លើសពីនោះដើម្បីចម្រើនក្នុងហេតុសំខាន់ៗបីយ៉ាងគឺ៖

១៖ ជីវិតមហកម្ម៖ គឺដើម្បីជប់លាងនូវអាយុជីវិតឱ្យរឹងរិតតែមានរស្មី កាន់តែភ្លឺស្វាងឡើងផង។
២៖ អាយុវឌ្ឍវនកម្ម៖ គឺដើម្បីចម្រើននូវអាយុឱ្យកាន់តែវែងទៅផង
៣៖ទក្ខិណានុប្បទានកម្ម៖ ដើម្បីឧទ្ទិសនូវមហាកុសលផលបុណ្យ ជូនចំពោះដួងវិញ្ញាណក្ខន្ធ នៃបុព្វការីជណទាំងឡាយ មានជីដូនជីតា កុម៉ា ញាតិការទាំង៧សណ្ដាន ដែលបានលះលោកនេះ ទៅកាន់លោក។

សូមជម្រាបថាបុណ្យកឋិននានខាងលើនេះ គឺបានប្រព្រឹត្ដទៅចំនួន២ថ្ងៃ ដោយនៅរសៀលថ្ងៃទី៧ ខែវិច្ឆិកា ឆ្នំាំ២០២៦ គឺប្រារព្ធនូវពិធីសូត្រមន្តអង្គកឋិនទានមហាសាមគ្គី ដែលមានការអញ្ជើញចូលរួមផងដែរពី សម្តេចរាជបុត្រី ព្រះអនុជ នរោត្តម អរុណរស្មី, លោក ចាយ បូរិន រដ្ឋមន្រ្តីក្រសួងធម្មការនិងសាសនា និងលោកស្រី សូ ភត្រា, លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងពុទ្ធបរិស័ទឆ្ងាយជិត។ លុះព្រឹកឡើងថ្ងៃទី៨ ខែវិច្ឆិកា បានដង្ហែ និងវេរអង្គកឋិនទានសាមគ្គី ថ្វាយព្រះសង្ឃក្រាលគ្រង វត្តមុនីសុវណ្ណ ហៅចំពុះក្អែក៕