អភិបាលខេត្តពោធិ៍សាត់ ចុះចែកអំណោយ ជាស្បៀងរបស់រាជរដ្ឋាភិបាល ជូនពលរដ្ឋរងផលប៉ះពាល់ពីជំនន់ទឹកភ្លៀង និងគ្រោះរាំងស្ងួត នៅស្រុកក្រគរ និងស្រុកតាលោសែនជ័យ
10-11-2026 20:42
(ពោធិ៍សាត់)៖ នាថ្ងៃទី១០ ខែវិច្ឆិកា ឆ្នាំ២០២៦ លោក ខូយ រីដា អភិបាលខេត្តពោធិ៍សាត់ និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត បានអញ្ជើញដឹកនាំមន្ត្រីរាជការ និងកងកម្លាំងប្រដាប់អាវុធ ចុះជួបសំណេះសំណាលសួរសុខទុក្ខ និងនាំយកអំណោយស្បៀងរបស់រាជរដ្ឋាភិបាល ជូនដល់ប្រជាពលរដ្ឋរងគ្រោះ ចំនួនពីរស្រុកផ្សេងគ្នា រួមមាន៖ នៅវត្តទួលត្បែង ឃុំឈើតុំ ស្រុកក្រគរ និងវត្តសំសាន្ត ឃុំតាលោ ស្រុកតាលោសែនជ័យ។
បើតាមលោក អ៊ន សុផល្លា អភិបាលស្រុកក្រគរ បានឱ្យដឹងថា ស្រុកក្រគរ មាន១១ឃុំ និង១០៧ភូមិ មានប្រជាពលរដ្ឋសរុប១២១,២៣២នាក់។ ក្នុងរយៈពេលកន្លងទៅ ស្រុកបានរងផលប៉ះពាល់ដោយជំនន់ទឹកភ្លៀងធំៗ ចំនួន២លើក ដែលបណ្តាលឱ្យខូចខាតហេដ្ឋារចនាសម្ព័ន្ធ ផលដំណាំ និងលំនៅឋានប្រជាពលរដ្ឋ។ លោកអភិបាលស្រុកបន្តថា ប្រជាពលរដ្ឋរងផលប៉ះពាល់ធ្ងន់ធ្ងរក្នុងស្រុក សរុបមានចំនួន២,៥០៦គ្រួសារ ក្នុងនោះ៩ឃុំ ស្មើនឹង១,៥០១គ្រួសារ បានទទួលស្បៀងពី សម្តេចបវរធិបតី កាលពីថ្ងៃទី៥ ខែវិច្ឆិកា រួចហើយ។ ដោយឡែកនៅថ្ងៃទី១០ ខែវិច្ឆិកា ឆ្នាំ២០២៦នេះ លោកអភិបាលខេត្ត បានអញ្ជើញចែកជូនបន្ថែម ដល់២ឃុំទៀត សរុបចំនួន១,០០៥គ្រួសារ ក្នុងងនោះមានឃុំស្វាយស ៤៩គ្រួសារ និងឃុំឈើតុំ ៩៥៦គ្រួសារ។
បើតាម លោក ចាន់ វិចិត្រ អភិបាលស្រុកតាលោសែនជ័យ បានបង្ហាញថា ស្រុកនេះមាន២ឃុំ និង៣៥ភូមិ មានប្រជាជនសរុប៤៧,៤៨៥នាក់ ដែលភាគច្រើនប្រកបរបរជាកសិករ (៧៩%)។ ក្នុងរដូវវស្សាឆ្នាំ២០២៦ ស្រុកមានផែនការដាំដុះស្រូវ ២៥,៦៤០ហិកតា ប៉ុន្តែដោយសារកូនរដូវប្រាំងអូសបន្លាយ បានធ្វើឱ្យស្រូវខូចខាត ចំនួន៦,៧៦៣ហិកតា ត្រូវនឹង ១.៩២៩គ្រួសារ។ ប្រជាកសិករទាំងនោះបានទទួលជំនួយសរុបចំនួន៣លើក រួមមានកាកបាទក្រហមខេត្ត ចំនួន១,១០០គ្រួសារ កាលពីថ្ងៃទី០៦ ខែកញ្ញា និងជំនួយរបស់ប្រមុខរាជរដ្ឋាភិបាល សម្តេចបវរធិបតី ហ៊ុន ម៉ាណែត ចំនួន១,៩២៩គ្រួសារ ចែកជាពីរដំណាក់កាល រួមមានថ្ងៃទី៥ វិច្ឆិកា ចំនួន៦១១គ្រួសារ និងរសៀលថ្ងៃទី១០ ខែវិច្ឆិកា ឆ្នាំ២០២៦នេះ ចំនួន១,៣១៨គ្រួសារបន្ថែមទៀត ដែលធ្វើឱ្យគ្រួសារទទួលបានស្បៀង សរុបចំនួន៣,០២៩គ្រួសារ។
ក្នុងពិធីសំណេះសំណាលនៅទាំងពីរទីតាំង លោក ខូយ រីដា បានពាំនាំនូវការផ្តាំផ្ញើសាកសួរសុខទុក្ខ ពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលតែងតែគិតគូរជាប្រចាំចំពោះសុខទុក្ខ និងជីវភាពរបស់ប្រជាពលរដ្ឋដោយមិនទុកឱ្យនរណាម្នាក់ស្លាប់ដោយអត់បាយ ឬដោយសារកង្វះស្បៀងនោះឡើយ។
លោកអភិបាលខេត្ត បានគូសបញ្ជាក់ពីការយកចិត្តទុកដាក់របស់រាជរដ្ឋាភិបាល ក្នុងការជួយសង្គ្រោះប្រជាពលរដ្ឋទាន់ពេលវេលា មិនថាក្នុងកាលៈទេសៈគ្រោះមហន្តរាយទឹកជំនន់ ឬគ្រោះរាំងស្ងួតនោះឡើយ។
បន្ថែមពីលើនេះ លោក ខូយ រីដា ក៏បានអំពាវនាវដល់បងប្អូនប្រជាពលរដ្ឋទាំងអស់ រួបរួមសាមគ្គីគ្នា ស្រលាញ់រាប់អានគ្នាដូចបងប្អូនក្នុងគ្រួសារតែមួយ និងបន្តរក្សាភាពស្ងប់ស្ងាត់ព្រមទាំងផ្ដល់ការគាំទ្រយ៉ាងពេញទំហឹងដល់រាជរដ្ឋាភិបាល ក្នុងការដោះស្រាយរាល់បញ្ហាជាតិ ជាពិសេសបញ្ហាជម្លោះព្រំដែនកម្ពុជា-ថៃ ដោយប្រកាន់ខ្ជាប់នូវការដោះស្រាយដោយសន្តិវិធី ស្របតាមច្បាប់អន្តរជាតិ និងយន្តការដែលមានស្រាប់ ដើម្បីការពារបូរណភាពទឹកដី និងរក្សាបាននូវសុខសន្តិភាព ស្ថិរភាពសង្គម និងការអភិវឌ្ឍជាអចិន្ត្រៃយ៍។
លោកក៏បានក្រើនរំលឹកដល់អាជ្ញាធរមូលដ្ឋាន និងប្រជាពលរដ្ឋទាំងអស់ ឱ្យបន្តការប្រុងប្រយ័ត្នខ្ពស់ចំពោះការប្រែប្រួលអាកាសធាតុ ជាពិសេសផលប៉ះពាល់ពីបាតុភូត អែលនីញ៉ូ (El Niño) ដែលបង្កឱ្យមានគ្រោះរាំងស្ងួត និងអាកាសធាតុប្រែប្រួលខុសប្រក្រតី ព្រមទាំងត្រូវយកចិត្តទុកដាក់ខ្ពស់លើការសម្អាតអនាម័យបរិស្ថាន រក្សាភូមិឋានស្អាត និងការរស់នៅស្អាត។ លើសពីនេះ ត្រូវខិតខំស្តារមុខរបរ និងផលិតកម្មកសិកម្មឡើងវិញ ក្រោយពេលជួបគ្រោះមហន្តរាយ ដើម្បីធានាបាននូវស្ថិរភាពជីវភាពគ្រួសារប្រកបដោយចីរភាព៕
